Á að hengja bakara fyrir smiði?

Í Staksteinum Morgunblaðsins í dag kemur fram að sá fulltrúi flokkseigendafélags Sjálfstæðisflokksins sem þar skrifar er búinn að finna sökudólginn í stóra REI/Orkuveituhneykslsimálinu. Sá heitir Guðmundur Þóroddsson forstjóri REI og áður um árabil forstjóri Orkuveitunnar. Sök hans er sú að hann hafi ekki upplýst borgarfulltrúa Sjálfstæðisflokksins um gang mála af nægjanlegri kurteisi. Niðurstaða Staksteinahöfundar er síðan sú að embættismenn eins og Guðmundur séu valdir að glundroða og stjórnmálamönnum með bein í nefinu beri að stöðva slíkt stjórnleysi.

Spurning er hins vegar hvort Guðmundur Þóroddsson var nokkurn tímann stjórnlaus? Hefur eitthvað komið fram sem bendir til þess að hann hafi ekki í einu og öllu fylgt þeim fyrirmælum sem honum voru gefin af stjórn fyrirtækjanna sem hann starfaði hjá. Ekkert hefur komið fram í þessu hneykslismáli sem bendir til þess að Guðmundur Þóroddsson hafi ekki rækt starfsskyldur sínar af kostgæfni í samræmi við ákvarðanir stjórnmálamanna.

Í ljósi þessa eru ummæli Staksteinahöfundar með ólíkindum og bera þess merki að reynt sé að koma ábyrgð á orkuhneykslinu á embættismenn í stað þess að láta þá stjórnmálamenn sem tóku ákvarðanir og málið heyrir undir bera þá ábyrgð sem þeim ber.

Ljóst er að ákvarðanir um stofnun REI og starfsemi duttu ekki af himnum ofan. Þar er um nokkuð langt ferli að ræða þar sem stjórnmálamennirnir sem að málinu stóðu mótuðu stefnuna og embættismennirnir framkvæmdu það sem stjórnmálamennirnir lögðu fyrir þá. Það er með ólíkindum að halda því fram að stjórnmálamennirnir hafi ekki komið að málum varðandi fyrirtækið þegar vélað var um kaupréttarsamninga fyrir hundruðir milljóna og hverjir fengju að kaupa. Slíkt er með þvílíkum ólíkindum að útilokað er að leggja trúnað á slíkar draugasögur.

Áður en bakarar eins og Guðmundur og þess vegna Hjörleifur Kvaran verða hengdir fyrir smiðina Vilhjálm Þórmund, Guðlaug Þór og Björn Inga er nauðsynlegt að fá öll spil á borðið. Upplýsa almenning um það hvað raunverulega skeði og hvenær. Fram hefur komið að helstu gerendum orkuhneykslisins ber ekki saman.

Eftir því sem ég best fæ séð þá var um ákveðna pólitíska stefnumörkun að ræða sem borgarstjóri hafði ekki samþykki fyrir í sínum flokki og þegar almenningur í borginni reis gegn þessu þá reyndu menn að finna útgönguleiðir með öllum ráðum. Er það ekki mergurinn málsins.

Einhvern veginn minnir þessi umræða mig á þá stöðu sem einu sinni kom upp í Sjálfstæðisflokknum þegar flokkurinn tapaði stórt í kosningum og sett var á laggirnar rannsóknarnefnd og það eina sem gert var í framhaldinu var að sendillinn var rekinn. Mér virðast Orkugreifar Sjálfstæðisflokksins vera á góðri leið með að hanna svipaða atburðarás.

Athugasemdir

[Ljónsmakkinn (IP-tala skráð) 10.10.2007 kl. 11:17]

Að sjálfsögðu bera pólitískir fulltrúar einir ábyrgð á atburðarásinni. Vilhjálmur situr sjálfur í stjórn Orkuveitunnar og fulltrúi hans situr í REI.

En ég spyr, hvað er Vilhjálmur að gera á stjórnarfundum Orkuveitunnar? Situr hann gónandi út í loftið og skoðar enga pappíra? Eða er sameining REI og GGE bara smá mál sem ekki þarf að kynna sér?

[Gísli Baldvinsson (IP-tala skráð) 10.10.2007 kl. 11:25]

Spuninn er samt slappur. Ég er ekki viss að hann sé saminn af VÞV. Hann fær handrit í hendurnar og tekur þátt í þessu. Verst að hann virðist verða tvísaga á blaðamannafundi. Vinkonur mínar Ritt Bjerrgaard og Mona Salin fengu reisupokann. En þær risu upp aftur.

Líka sendillinn í Bolholtinu. Góður fótboltamaður, KFUM drengur og valsari..ekki satt?