Hvað er sjálfstæð rannsókn?

Nýr stjórnarformaður Orkuveitu Reykjavíkur neitar því sem Júlíus Vífill Ingvarsson heldur fram að stjórn Orkuveitunnar hyggist hefja sjálfstæða rannsókn á málefnum REI.  Samt sem áður viðurkennir stjórnarformaðurinn  að ákveðið hafi verið að nýjum stjórnarmönnum Orkuveitunnar verði afhent gögn varðandi REI þannig að þeir geti gert sér grein fyrir forsögu málsins.

Túlkun orða og orðskilningur getur verið vandmeðfarinn en vegna þessara yfirlýsinga annars vegar Júlíusar Vífils Ingvarssonar fulltrúa Sjálfstæðisflokksins í stjórn Orkuveitunnar  og hins vegar Bryndísar Hlöðversdóttur stjórnarformanns Orkuveitunnar á vegum BorgarBræðingsins, þá liggur alla vega fyrir að nýir stjórnarmenn Orkuveitunnar eiga að fá öll gögn í hendur varðandi REI. Til hvers er það gert? Væntanlega er ætlast til þess að nýir fulltrúar lesi gögnin en fari ekki að eins og fyrrverandi stjórn. Hvað svo geri einhver hinna nýju fulltrúa athugasemd við eitthvað sem fram kemur í gögnunum. Athugasemd sem á við full rök að styðjast. Verður hún þá ekki tekin til greina? Eiga stjórnarmenn Orkuveitunnar bara að skoða gögnin eins og um einskonar lestraræfingu á síðkvöldum sé að ræða? Eða er þetta sjálfstæði rannsókn af þeirra hálfu?

Af sjálfu leiðir að þegar lagt er fyrir starfsmenn Orkuveitunnar að útvega öll gögn um REI þá er það gert til að stjórnarmenn  geti kynnt sér þau sjálfstætt og gert sínar sjálfstæðu rannsóknir á þeim.

Hvað kallaði þá á yfirlýsingu Bryndísar Hlöðversdóttir um að túlkun Júlíusar Vífils væri fráleit? 

Yfirlýsing stjórnarformanns OR: Túlkun Júlíusar Vífils fráleit

Athugasemdir

[Jensen (IP-tala skráð) 23.10.2007 kl. 23:55]

Þettað er alveg óskiljanlegt,það er bara verið að kasta ryki í augu eigenda O R sem er almenningur.Trúi ekki öðru en því að Svandís Svavarsdóttir standi við kæruna,hún verður að gera það.Mér sýnist að Júlíus Vífill sé mikill og sterkur karakter,er algjörlega sammála honum og hans skoðunum í þessu máli.(ég er ekki sjálfstæðismaður.)en stend fyllilega með Júlíusi,vona að Svandís klikki ekki í eftirfylgni sinni.

[Guðrún María Óskarsdóttir., 24.10.2007 kl. 00:43]

Já góð spurning í þessu sambandi Jón.

Það er greinilegt að BorgarBræðingurinn þarf nauðsynlega að vera ósammála Júlíusi, bara svona einhvern veginn.

kv.gmaria.