Er ekki kominn tími til að ríkisstjórnin dragi úr skattheimtu af bensíni?

Heimsmarkaðsverð á olíu hækkar og hækkar með þeim afleiðingum að verð á bensíni og olíum til neytenda á Íslandi hækkar og hækkar. Sverasti olíufurstinn á Íslandi er ríkissjóður sem tekur stóran hluta af verði á bensíni og olíum í ríkissjóð. Þeim mun meira sem olía hækkar í verði þeim mun hærri verða álögur ríkisins af því að þær reiknast hlutfallslega af útsöluverði.

Hækkun á olíum og bensíni á síðasta ári var 25% sú hækkun hækkar vísitölu nesysluverðs til verðtryggingar. Þar með hækka vísitölubundin lán. Ríkissjóður getur verið fullsæmdur af því að taka þá krónutölu af olíum og bensíni sem hann tók áður en heimsmarkaðsverð á olíu fór að hækka. Með því að halda óbreyttum hlutfallslegum álögum á bensín og olíur er ríkissjóður í raun að hækka skatta og hækka skuldir fólksins í landinu.

Með því að gera ekkert til að draga úr skattheimtu og vinna gegn verðbólgu leggur ríkisstjórnin grunn að því að erfiðleikar verði meiri í efnahagskerfinu en þeir þurfa að vera. Hvaða tilgangi þjónar það eiginlega hjá ríkisstjórninni að stuðla að þessum ofurhækkunum á nauðsynjavöru eins og bensíni og olíum. Markaðshyggjuríkisstjórn mundi ekki haga sér með þessum hætti. Frjálslynd umbótastjórn mundi þegar í stað draga úr álögum sínum til að tryggja hagsmuni borgaranna og koma í veg fyrir að ríkissjóður taki stöðugt hærra hlutfall til sín af þjóðarframleiðsslunni.

Það er ekki hægt að vinna gegn verðbólgu á Íslandi af nokkru viti með stýrivaxtahækkunum eingöngu. Mun mikilvægara í því sambandi er aðhaldssöm stefna ríkisstjórnar í ríkisfjámálum. Því miður þá ætlar ríkisstjórnin að fara þveröfuga leið.  Það er alvarlegt  mál og ógnar stöðugleika í þjóðfélaginu og lífskjörum almennings. 

Eldsneytisverð hefur hækkað

Athugasemdir

[Eggert Sigurðsson (IP-tala skráð) 3.1.2008 kl. 22:51]

Sæll Jón.

Nei, tíminn er ekki kominn.

Hvað er það í raun og veru sem réttlætir það að dregið verði úr skattheimtu af bensíni. Röksemdafærsla í kring um áhrif á vísitölu neysluverðs er að mínu mati einkar vafasöm, sérstaklega ef tekið er mið af hvernig bílafloti landsmanna lítur út. Göturnar eru fullar af nýjum eða nýlegum bílum sem falla gríðarlega hratt í verði ár hvert, langt umfram eldsneytiskostnað.

Við þurfum þess í stað að reyna að koma af stað hugarfarsbreytingu hjá annarsvegar vegfarendum og hvetja til aukinnar notkunar á almenningssamgöngum og svo framvegis. Við sjáum líka allt of mikið af því að í þessu nýju og glæsilegu bifreiðum sem fylla götur Reykjavíkur upp að þeim mörkum að umferðartafir verða dag hvern á háannatímum situr einungis ökumaðurinn.

Hins vegar þurfum við að koma af stað hugarfarsbreytingu hjá ráðamönnum þjóðarinnar. Hér gefst einstakt tækifæri till að draga úr umhverfisáhrifum ef litið er fram á við. Í stað þess að lækka skatta á bensíni mætti eyrnamerkja hluta af þeim fjármunum sem renna inn í ríkissjóð og nota til uppbyggingar á almenningssamgöngum. Þess eru dæmi á norðurlöndunum að bæjarfélög hafa byrjað að bjóða upp á ókeypis strætisvagnasamgöngur svo dæmi sé nefnt.

Væri ekki til fyrirmyndar að geta státað af slíku, ekki aðeins á höfuðborgarsvæðinu heldur einnig um land allt. Áhrifin yrðu ákaflega jákvæð, bæði fjárhagslega og umhverfislega séð.

[Anna Benkovic Mikaelsdóttir, 4.1.2008 kl. 00:26]

goð hugmynd

[Baldur Freyr Guðmundsson (IP-tala skráð) 4.1.2008 kl. 03:05]

Ekki sammála, en það væri kanski hægt að gera undantekningar fyrir leigubíla og alla vinnubíla. En þá í svona takmörkuðum aflsætti(ekki prósenta). Við þurfum að fara sparlega með mengandi orkugjafa, þar sem þeir kosta peninga og hækka viðskiptahallan (og menga), sem er nú ansi sætur núna.  Það ætti frekar að lækka skatta og að mínu mati bara skattleysismörkin undir núverandi aðstæðum. Annars myndi ég vilja hækka skatta að öðru leiti, svo að svo að ráðstöfunartekjur fátæka fólksins hætti að lækka stanslaust og fari að aukast.