Ástæða til að kaupa Morgunblaðið í dag.

Flest blöð sem vilja láta taka sig alvarlega hafa ákveðna fasta dálkahöfunda. Margir kaupa blöð eingöngu til að lesa slíkar greinar.  Morgunblaðið hefur ekki farið þá leið en nýtur þess að mikið af góðum greinarhöfundum skrifar í blaðið.

Full ástæða er til að benda á að í dag er mikið af góðum greinum í blaðinu. Jónas Elíasson prófessor skrifar um Bjallavirkjun með einkar skýrum hætti eins og honum er lagið. Í greininni bendir hann á hversu innantóm og andstæði heilbrigðri skynsemi barátta virkjana andstæðinga í Vinstri grænum og Samfylkingunni eru.

Grein Ragnars Önundarsonar fyrrverandi bankastjóra "Um bókstafstrú og mistök í hagstjórn" er framhald góðra greina Ragnars um efnahagsmál þar sem hann bendir á með glöggum hætti þau vandamál sem hafa orðið í hagstjórn síðustu ára.

Þröstur Ólafsson hagfræðingur skrifar um stóriðju og efnahagsstefnu. Gott innlegg í umræðuna og hvaða veruleiki blasir við okkur í efnahags- og atvinnumálum að mati höfundar.

Síðast en ekki síst skrifar Gauti Kristmannsson dósent grein sem hann velur heitið Krónuskatturinn og fjallar um hvað það kostar okkur mikið að vera með krónuna sem gjaldmiðil. 

Morgunblaðið var virkilega hverrar krónu virði í dag og það vegna þess sem ólaunaðir dálkahöfundar blaðsins höfðu fram að færa. Það væri vel þess virði fyrir blaðið að fá þessa menn og fleiri til að skrifa greinar með reglulegu millibili.  Það er alltaf gaman að lesa greinar eftir fólk sem hefur mikið fram að færa og gerir það með greinagóðum hætti eins og þeir sem skrifa ofangreindar greinar.

Athugasemdir

[Jón Valur Jensson, 14.9.2008 kl. 18:13]

Gauti Kristmannsson er ágætur maður á sínu sviði, en þegar hann fer út fyrir það eins og í gróðurhúsaáhrifamálunum eða hagfræði og peningamálum, er hann ekki minn vegvísir, með fullri virðingu.

[Jón Valur Jensson, 14.9.2008 kl. 18:49]

Gefðu þér ekki neitt um þetta síðastnefnda, nafnlausa Lotta. Ég skrifaði þetta ekki af því, að ég hafi ekki lesið greinar Gauta, þær sem ég nefndi. Mér sýnist hann nú dottinn ofan í krónu-niðurrifstalið sem svo margir hans pólitísku félagar ástunda svo skefjalaust nú um stundir –– undarlegt nokk: gjarnan sömu menn og vilja koma okkur undir klafa hins hrörnandi tröllabandalags EBé!

[Sigurður Þórðarson, 14.9.2008 kl. 20:10]

Sammála fottar greinar í sunnudags Mogganum

[Ómar Ragnarsson, 14.9.2008 kl. 20:44]

Einkennilegt er að mönnum finnist sú röksemd Jónasar Elíassonar boðleg að alls staðar sé réttlætanlegt að færa land í fyrra horf og sökkva lendum þar sem áður var vatn fyrir þúsundum ára. Samkvæmt þessu væri þarfasta framkvæmdin sú að sökkva Suðurlandsundirlendinu undir vatn vegna þess að það var undir vatni fyrir 11 þúsund árum.

Einnig að sökkva Fnjóskadal af sömu ástæðu. Að ekki sé talað um að í besta lagi væri hver sú framkvæmd sem eyddi öllum gróðri í Flóanum af því að þar var hraun fyrir þúsundum ára. 

Þessi endurheimtarröksemd var notuð um Hálslón en þess ekki getið að hið nýja lón er margfalt stærra en það gamla.  

[Gunnar Rögnvaldsson, 14.9.2008 kl. 21:15]

Sælir

Ég þakka Jóni Magnússyni fyrir ábendinguna um greinarnar. Ég hef lesið þær á tölvuskjánum mínum hérna í stórveldi stöðugleikans og sett fram athugasemdir um þær hér

Kveðjur

[Jens Sigurjónsson, 15.9.2008 kl. 00:03]

Mogginn stendur alltaf fyrir sínu.

[Sigurgeir Jónsson, 15.9.2008 kl. 17:44]

Það eru ekki síður ástæður til að lesa.Fréttablaðið þann 13. september.Þar segir muslimi, flóttamaður, móðir, sögu sína.Þar kemur fram að Bandaríkjamenn eru eftir innrásina í Írak að hrekja palestínska muslima, flóttamenn til íslands.Öfgamenn sem eru með stöðugan áróður til stuðnings Bandaríkjunum og Israel hefðu gott af að lesa þetta viðtal, nema þeir vilji fylla landið af muslimum og gera landið að rétttrúnaðarríki muslima.