Til hamingju með daginn.

Í dag eru 90 ár liðin frá því að Ísland varð frjálst og fullvalda ríki í konungssambandi við Danmörku. 

Mér finnst þessi dagur merkasti dagurinn í sjálfstæðisbaráttu þjóðarinnar. Þá var fullveldi þjóðarinnar staðfest. Við réðum málum okkar en kusum að láta Dani sjá um ákveðin mál fyrir okkar hönd tímabundið sem var skynsamlegt á þeim tíma. Allt gekk það samstarf með ágætum.

Eins slæmt og það er að vera seldur undir aðra þjóð þá megum við Íslendingar þakka fyrir að Danir skyldu vera okkar nýlenduherrar því hætt er við að fáar aðrar þjóðir hefðu gefið okkur frelsi og fullveldi.

Við ættum að minnast þess í dag hvað íslenska þjóðin hefur þurft að glíma við á þeim árum sem liðin eru frá því að við fengum fullveldið.  Jafnframt að huga að því hvaða skyldur við berum við nútímann og komandi kynslóðir við að tryggja sjálfstæði, framfarir og mannsæmandi lífskjör í landinu.  

Athugasemdir

[Einar Áskelsson (IP-tala skráð) 1.12.2008 kl. 11:22]

Jón, erum við komin 90 ár til baka?  Er ekki skynsamlegt að við látum aðra um að sjá tímabundið um ákveðin mál.  T.d. efnahagsmál.  Er sagan að segja okkur þetta?

[Jón Valur Jensson, 1.12.2008 kl. 11:44]

Til hamingju með daginn, allir Íslendingar!

Vel mælir þú hér, nafni, meðal annars í garð Dana, en ég vil að allir strengi þess heit að standa vörð um það fullveldi og sjálfstæði þjóðarinnar, sem hún endurheimti 1. janúar 1918. Sannarlega var það fullveldi, sem við nutum sem konungsríkið Ísland 1918–1940/44, heilla og óskiptara en sá rýri og skarði hlutur, sem málsvarar innlimunar í Evrópubandalagið boða okkur nú um stundir.

Íslandi allt. 

[Hjörtur J. Guðmundsson, 1.12.2008 kl. 11:58]

Hvernig skilgreinir þú eiginlega sjálfstæði Jón? Þú vilt tryggja sjálfstæði Íslands en vilt á sama tíma ganga í Evrópusambandið þar sem ljóst er að landinu yrði ekki lengur stjórnað af einstaklingum sem kosnir væru af íslenzkum kjósendum heldur erlendum embættismönnum yfirþjóðlegs skriffinskubákns sem enginn kýs.

[Marinó Már Marinósson, 1.12.2008 kl. 13:41]

Vel mælt.    

Svo sorglegt sem það er núna þá höfum við aldrei verið eins nálægt því að glata því sem við höfum áorkað, einmitt á þessum tíma sem nú er að líða.   Vonandi höfum við skynsemi og þor til að komast út úr hyldýpinu sem þjóðin virðist vera í dag.    

[Jón Valur Jensson, 1.12.2008 kl. 13:47]

Já, nú þarf hann nafni minn að svara – og nú í dag ber öllum fullveldissinnum að svara!

Ein leiðin til þess er að mæta á fullveldisfagnaðinn í Salnum í Kópavogi kl. 5 í dag. Ræður góðar, Diddú syngur, Þórarinn Eldjárn les ljóð.

Minni svo á sjálfstæðisbraginn minn, sem ég var að birta á Vísis- og Moggabloggi. – Með heillaósk til allra, jafnvel þeirra sem kunna ekki að meta sitt sjálfstæði,

[Flosi Kristjánsson, 1.12.2008 kl. 22:05]

Er þessum þingmanni ekkert kalt í dag?

[Kristján Helgason (IP-tala skráð) 1.12.2008 kl. 22:47]

SJÁLFSTÆÐI ! Vissulega er það gott , en hversu lengi fáum við að halda því ? Vonandi berum við gæfu til að fara EKKI inn í Evrópusambandið, því þá munum við EKKI getað talað um SJÁLFSTÆÐI lengur. Megi blessaður Bauninn hafa þakklæti fyrir þolinmæði, velvilja og umburðarlyndi í okkar garð. Og Nafni minn Kóngur, Þó seint sé , Takk fyrir STJÓRNARSKRÁNA.

Kv. Nafni kóngsins, Kristján.