Bloggsíða veldur vanhæfi

Ég verð að sæta því að almennar skoðanir mínar á þjóðfélagsmálum eru taldar þess eðlis að ég sé ekki hæfur til að gegna starfi sérstaks saksóknara. 

Í bréfi sem ég fékk frá Dómsmálaráðuneytinu varðandi umsókn mína um embætti sérstaks saksóknara kemur m.a. fram eftirfarandi:

"Eins og getið var könnuðum við sérstaklega hvort umsækjendur hefðu tekið þátt í opinberri umræðu eða umfjöllun um þjóðfélagsmál síðastliðið ár með tilliti til þess hvort á einhvern hátt mætti draga óhlutdrægni viðkomandi sem saksóknara ef skipaður væri með réttu í efa skv. g lið 6.gr. 26.gr. laga nr. 88/2008 og lög nr. 135/2008.  Einn umsækjenda Jón Magnússon heldur hins vegar úti heimasíðu á veraldarvefnum jonmagnusson.blog.is. Þar hefur Jón ítrekað tekið til umfjöllunar málefni tengd atburðunum í október 2008 er ríkið tók yfir stjórn viðskiptabankanna þriggja. Hann hefur greint frá skoðunum sínum bæði á mönnum og málefnum í þeim mæli að hætt er við að verulega myndi reyna á álitaefni um sérstakt hæfi hans sem saksóknara í tengslum við þau mál sem embættið hefur til meðferðar."

Frestur var gefinn til dagsins í dag til að skila inn athugasemdum til ráðuneytisins.

Í framhaldi af því ritaði ég eftirfarandi bréf til ráðuneytisins:

DómsmálaráðherraRagna ÁrnadóttirDómsmálaráðuneytinu v. Arnarhvol   Reykjavík, 14. september 2009.   Vísað er til bréfs ráðuneytisins vegna umsagnar embættis sérstaks saksóknara og setts ríkissaksóknara vegna umsóknar minnar um starf saksóknara við embætti sérstaks saksóknara. Samkvæmt tilvitnuðu bréfi er sú eina athugasemd gerð við umsóknina að ég hafi haldið úti bloggsíðu og tekið þátt í opinberri umræðu, m.a. um málefni er tengjast þeim atburðum er ríkið  tók yfir stjórn viðskiptabankanna.  Er talið að vegna þessa gæti reynt á álitaefni tengdu sérstöku hæfi við möguleg störf mín sem saksóknari. Undirritaður mótmælir þessari athugasemd og bendir á að enginn sérstök ummæli eru tilgreind í bréfi ráðuneytisins, en slík framsetning getur vart talist málefnaleg stjórnsýsla og gerir það að verkum að ekki eru forsendur til að beita andmælareglu. 

Undirritaður telur sig í skrifum sínum hafa sett fram sjónarmið sem lúta að almennum viðhorfum og leitast við að halda þeirri grunnreglu á lofti að menn séu saklausir þar til sekt þeirra sé sönnuð.  Hafa stærri orð fallið af hálfu einstaklinga sem tengjast rannsóknum sérstaks saksóknara án þess að gerðar hafi verið sérstakar athugasemdir.  Virðast þær yfirlýsingar falla betur að pólitísku viðhorfi samtímans.

 Eins og nefnt var þá er undirrituðum fyrirmunað að nýta andmælarétt sinn þar sem ekki er um málefnalega framsetningu að ræða.  Jafnframt er ljóst að dómsmálayfirvöld hafa ekki áhuga á að nýta sér starfskrafta undirritaðs, langa lögmannsreynslu og reynslu af starfsemi fjármálastofnana, en leita að einstaklingi með þóknanlegri viðhorf.  Af þeim ástæðum dreg ég umsókn mína til baka.  Virðingarfyllst,  

Jón Magnússon, hrl.

Athugasemdir

[Björn Birgisson, 14.9.2009 kl. 13:36]

Áreiðallega nokkuð erfitt að finna fólk í þessar stöður. Hafa ekki allir Íslendingar verið að tjá sig um þessi mál?

[Ómar Bjarki Smárason, 14.9.2009 kl. 14:16]

Ég man ekki betur en að einn núverandi hæstaréttardómara hafi tekið mjög virkan þátt í þjóðfélagsumræðunni áður en hann fékk það embætti. En það gilda kannski aðrar reglur um það en embætti sérstaks saksóknara?

Það er greinilegt, Jón, að það er öruggast að halda sínum skoðunum fyrir sig og láta sem minnst í sér heyrast.....en mikið langar mig nú samt að fara í Ráðhúsið á morgun og mótmæla sölu Orkuveitunnar á HS-Orku til Magma Energy, Sweden. Það er ekki oft sem mér ofbýður stjórnsýslan, en þarna finnst mér of langt gengið til að þjóna hagsmunum þröngs hóps á kostnað heildarinnar. Það verður gaman þegar verðið á heita vatninu verður farið að fylgja olíuverðinu....eða hitt þá heldur.

[TómasHa, 14.9.2009 kl. 14:20]

Ekki erum við nú alltaf sammála, hins vegar sé ég fátt í skrifum þínum sem gefa tilefni til þessara ummæla. Ég fagna því að þú sért áfram á blogginu. Ég verð nú að segja að bloggið þitt hefur vaxið töluvert síðan þú lést af störfum sem þingmaður.

Gangi þér annars vel.

[Guðmundur Ásgeirsson, 14.9.2009 kl. 14:25]

Jón, var ekki sonur þinn yfirmaður Fjármálaeftirlitsins, og þar með að hluta til ábyrgur fyrir þeim skorti á eftirliti sem gerði bönkunum kleift að veðsetja hálfa þjóðina? Myndir þú þá ekki teljast vanhæfur til þess að rannsaka mál sem leiddu af þessu, rétt eins og Valtýr Sigurðsson ríkissaksóknari er álitinn vanhæfur vegna fjölskyldutengsla í málum sem tengjast bankahruninu? Burtséð frá ofangreindum athugasemdum vegna bloggsíðu þinnar þá held ég að á grundvelli þessara tengsla séu málefnaleg rök fyrir því að þú sért e.t.v. ekki heppilegasti einstaklingurinn til að ráða í starfið. Ég vona að þú túlkir það ekki sem persónulega óvild þó að ég bendi á þetta, en svona blasir þetta við mér og örugglega fleirum sem fylgjast með fréttunum.

[Jón Snæbjörnsson, 14.9.2009 kl. 14:31]

Undarlegt þegar komið er fram á heiðarlegan hátt undir nafni og ekki neinu leynt, að hafa skoðun verður það þá "erft" við mann um ókomna tíð ?

[Gísli Baldvinsson (IP-tala skráð) 14.9.2009 kl. 14:37]

Ég held að á árinu 2007 hafi svona sýn á störfum umsækjenda ekki verið reitt til. Það mætti þess heldur vísað í önnur opinber ummæli þín á miklu víðtækara torgi, sjálfu Alþingi. Þetta er álitaefni og ekki góð stjórnsýsla. Menn þurfa að vera mjög pólitískt hreinir til að fá störf á þessu sviði. Ég vildi að sama mætti segja um banka- og skilanefndir bankanna.

Vona að þinn skarpi penni nýtist hér um sinn. kv  gb

[Finnur Bárðarson, 14.9.2009 kl. 14:49]

Er til einhver sem ekki hefur neina skoðun á einu eða neinu ? Mér sýnist að blogg Jóns sé alltaf í hógværari kantinum og upphrópunarmerki fáséð.

[Nonni (IP-tala skráð) 14.9.2009 kl. 14:54]

Var ekki sonur þinn forstöðumaður í fjármálaeftirlitinu ?   .....er það ekki næg ástæða til vanhæfni.

[Hulda Haraldsdóttir, 14.9.2009 kl. 15:06]

Þetta segir manni bara það að betra er að fara leið hins huglausa og blogga og viðra skoðanir sínar undir rós. Þetta er dapurlegt á að hlýða.

[Þóra (IP-tala skráð) 14.9.2009 kl. 16:05]

Þurfa menn að vera skoðanalausir til þess að geta orðið saksóknarar? 

Hvar ætla menn að finna slíkt fólk?

Eða verða menn að hafa réttar skoðanir til þess að vera saksóknarar?  Ég held að það sé málið.

Í því árferði sem nú er á Íslandi er varla til sá einstaklingur sem er skoðanalaus á málefni og atburði samfélagsins.

[Jón Magnússon, 14.9.2009 kl. 16:19]

Ég er hræddur um það Björn að það hafi fólk gert með einum eða öðrum hætti.

[Jón Magnússon, 14.9.2009 kl. 16:23]

Það reynist mörgum vel að tjá sig ekki Ómar. Með því bakar fólk sér síður óvild ráðamanna.

[Jón Magnússon, 14.9.2009 kl. 16:25]

Þakka þér fyrir Tómas. Það eru engir tveir einstaklingar alltaf sammála.  Mér finnast skoðanaskipti alltaf skemmtileg ef þau eru málefnaleg óháð því hvort fólk er mér sammála eða ekki.

[Jón Magnússon, 14.9.2009 kl. 16:26]

Guðmundur. Vanhæfisreglur koma ekki til skoðunar vegna sonar míns það gera sér allir grein fyrir því sem þekkja til þeirra reglna og þess verksviðs sem um er að ræða hjá Sérstökum saksóknara. Ég tjái mig ekki að öðru leyti um það.

[Jón Magnússon, 14.9.2009 kl. 16:27]

Þakka þér fyrir nafni Snæbjörnsson. En þannig er þetta iðulega því miður.

[Jón Magnússon, 14.9.2009 kl. 16:28]

Ég er sammála þér Gísli en það hefði verið eðlilegt að tilgreina hvaða ummæli það væru sem menn teldu að kæmu í veg fyrir að ég geti gegnt þessum störfum með hlutlægum hætti.

[Jón Magnússon, 14.9.2009 kl. 16:29]

Ég veit ekki Finnur það eru ýmis ummæli á blogginu en ég tek það jafnan fram að það beri að hafa í heiðri þá meginreglu réttarríkisins að hver maður skuli talinn saklaus þangað til sekt hans er sönnuð.

[Jón Magnússon, 14.9.2009 kl. 16:31]

Mér finnst þetta líka dapurlegt Hulda og Þóra mér sýnist sem sumir í þjónustu sérstaks saksóknara fái að tjá sig með mun afdráttarlausara hætti en ég hef gert án þess að athugasemd sé gerð við það.

[Jón Snæbjörnsson, 14.9.2009 kl. 16:38]

mér verður þá kanski vísað úr fulltrúaráðinu  

[Jón Magnússon, 14.9.2009 kl. 18:07]

Nei Jón ég vona að svo verði ekki.  Þar gildir sama regla og í Gullna hliðinu.

[Rauða Ljónið, 14.9.2009 kl. 21:10]

Sæll. Jón einhvernið lagðist það í mig þegar ég vissi að þú hafðir sótt um að þú mundir ekki hljóta náð né umsókn þín njóta sammælis.

Það virðist en gilda að sumir eru jafnari fyrir lögum en aðrir og það sannar bréf Dómsmálaráðuneytisins varðandi umsókn þína. Gangi þér allt í haginn.

Kv. Sigurjón Vigfússon 

[Guðbjörn Guðbjörnsson, 14.9.2009 kl. 21:39]

Jón:

Ég er feginn að ég er stjórnsýslufræðingur og ekki lögfræðingur, líkt og ég hef rifið kjaft í mörg ár! 

[Jón Magnússon, 14.9.2009 kl. 23:44]

Þakka þér fyrir það. Já þetta virðist vera eins og í skáldsögu George Orwell, Animal Farm. Sum dýrin eru jafnari en önnur dýr. Er það ekki alltaf þannig í sósíalistaríkjum?

[Jón Magnússon, 14.9.2009 kl. 23:47]

Það er ekkert öryggi í því Guðbjörn að vera stjórnsýslufræðingur en ekki lögfræðingur. Öryggið er raunar ekki til og það fékk Tomas More að finna á tímum Henriks 8. þegar hann taldi sig öruggan með því að þegja en hann var hálshöggvinn af því að hann þagði en lofaði ekki aðgerðir konungs. Þannig getur það nú verið. Það er ekki á vísan að róa með öryggið.

[Björn Birgisson, 15.9.2009 kl. 00:14]

Hér er langt til seilst í röksemdafærslunni. Hausar farnir að fjúka um hvippinn og hvappinn! Færslan snýst um hæfi eða vanhæfi. Ég er svolítið skotinn í Rögnu dómsmálaráðherra og held að hún hafi ekki skrifað bréfið til þín Jón. Ég sagði hér fyrr að erfitt yrði að finna hlutlausan landa í þetta verkefni. Flestir hafa tjáð sig um hrunið. Þeir sem ekki hafa gert það, eru ekki alvöru Íslendingar. Í besta falli skoðanalaus viðrini. Leitum til Færeyja. Þar eru vinir okkar.

[Guðrún María Óskarsdóttir., 15.9.2009 kl. 00:25]

Sæll Jón.

Einhvern tímann hefði þetta verið kallað " aðför að tjáningarfrelsinu " tel ég vera, þ.e þessar röksemdir.

Hins vegar finnst mér liggja milli línanna að ekki eigi að ráða hægri sinnaðan saksóknara, samkvæmt mínu pólítíska nefi.

kv.Guðrún María.

[Njáll Harðarson, 15.9.2009 kl. 18:35]

Kæri Jón,

fyrrverandi og núverandi Sjálfstæðismenn (Skófla er skófla) hafa bakað þjóðinni það ok sem fyllti mælinn. Það að þú Jón minn gafst upp á flokknum um stund er þér til málsbóta, en ég óttast að  þegar öll kurl koma til grafar þá munir þú enn borga, alveg eins og við hin sem tökum við moðinu eftir flokkinn.

Þetta hefur ekkert að gera með bloggið þitt.

Bestu kveðjur,