Sjómannaafsláttur

Fyrir nokkrum dögum sagði Steingrímur J. Sigfússon að ekki stæði til að afnema sjómannaafsláttinn. Nú hefur hann sett fram tillögur um að gera það í áföngum á kjörtímabilinu.

Röksemd Steingríms nú(sem er önnur en hún var fyrir tveim dögum) er að unnt sé að afnema sjómannafsláttinn í áföngum en byrja þó ekki strax af því að sjómenn hafi fengið launahækkun á árinu á meðan flestar aðrar stéttir hafi þurft að sæta launalækkun.  Í framhaldi af þeirri fullyrðingu telur Steingrímur eðlilegt að byrja að skerða sjómannaafsláttinn eftir tvö ár þó ekkert sé vitað hver kjör sjómanna verða þá.

Eðlilegt er að Steingrímur sé spurður að því í framhaldi af þessum vangaveltum sínum af hverju það er verjandi að þyngja skattheimtuna á þeim sem lækkað hafa í launum strax en fresta skattaþyngingunni hjá þeim sem hafa hækkað í launum um tvö ár. Þurfa ekki þeir sem hafa nú verri kjör frekar á umþóttunartíma að halda en þeir sem hafa notið kjarabótar á árinu?

 

Athugasemdir

[Sigurjón, 27.11.2009 kl. 19:25]

Sæll Jón.

Þetta eru mjög góðar spurningar hjá þér og fróðlegt væri að krefja SJS svara við þeim.  Grunar mig að það verði fátt um svör, nema þetta falska bros sem hann setur upp á mínútu fresti í hverju viðtali...

Kv. Sigurjón

[Eiður Svanberg Guðnason, 27.11.2009 kl. 21:48]

Sæll Jón,

Spurt er af forvitni: Ert þú hlynntur því eða andvígur að sjómannafrádrátturinn sé  afnuminn ? Pétur  Blöndal , samherji þinn og fyrrum kollega þinn gaf skýr svör úi kvöld.

Það þarf pólitíoskt hugrekki til að taka á þessu máli. Það hefðu menn átt  að gera fyrir löngu.

[Svavar Bjarnason (IP-tala skráð) 27.11.2009 kl. 21:52]

 

Blessaður Jón.

Fróðlegt væri að fá þína skoðun á tilverurétti sjómannafsláttarinns. 

Ekki veit ég hvort þessi sjómannaafsláttur hafi verið réttlátur á sínum tíma, þegar hann var settur á. Hugsanlega hefur einhver réttlæting verið til þá, vegna einhvers þjóðfélagsástands. En þessi gjörningur var vissulega barn síns tíma og ætti að hafa verið afnuminn fyrir löngu.

Sá rökstuðningur, sem maður heyrir frá sumum fyrir áframhaldi þessa gernings er að mínu mati algerlega ga ga.

Þegar ég var ungur maður sigldi ég á fraktskipi í eitt ár.

Í meira en 30 ár vann ég hjá stóru opinberu fyrirtæki ,við vinnu sem var að stórum hluta fjarri heimili mínu í langan tíma, oft uppi í óbyggðum. Í þessari fjarveru  frá fjölskyldu minni naut ég ekki jafn góðrar viðveru og ég hafði haft þegar ég var á sjónum. Ekki hafði ég skattaafslátt fyrir þessa vinnu. En ég fékk ýmist borgað uppihald og fæði eða var á lögboðnum dagpeningum allt eftir samningum við vinnuveitanda.

Aðstaða sjómanna og fæði um borð hlýtur alfarið að vera samningur milli þeirra og útgerðarmanna.

Ríkið á ekki að borga neina niðurgreiðslu í þessu sambandi.

En ert þú sammála flokksfélaga þínum, Pétri Blöndal?

[Jón Magnússon, 27.11.2009 kl. 22:27]

Hann setur örugglega upp brosið Sigurjón

[Eiður Svanberg Guðnason, 27.11.2009 kl. 22:32]

 Jón, ertu sammála Pétri, eður ei ?

[Jón Magnússon, 27.11.2009 kl. 22:34]

Eiður og Svavar ég þakka ykkur fyrir góðar færslur en sem svar við því sem þið spyrjð mig að þá vil ég gjörbreyta skatta- og velferðarkerfinu.  Þannig verði allar undanþágur afnumdar og þeir sem eru með tekjur yfir ákveðnu lágmarki sem nægir til framfærslu greiði skatta en þeir sem eru með tekjur undir því lágmarki fái greitt úr sameiginlegum sjóðum. Þetta væri mun ódýrara kerfi en við höfum í dag. Þá mætti um leið afnema þvingaðan lífeyrissparnað, ellilífeyri, örorkulífeyri o.s.frv. Þegar talað er um tekjur þá á ekki að skipta máli hvernig þær verða til þ.e. hvort heldur fyrir vinnu, vexti af dauðu fé eða húsaleigutekjur o.s.frv.

Einmitt í stöðu eins og við erum í núna þarf að hugsa málin upp á nýtt og athuga hvað er hagkvæmast að gera í skatta- og velferðamálum. Því miður er Steingrímur ekki að standa sig og virðist ekki hafa unnið heimavinnuna sína og snýst því eins og skopparakringla aftur og aftur m.a. í þessu máli varðandi sjómannaafsláttinn.

[Svavar Bjarnason (IP-tala skráð) 27.11.2009 kl. 23:18]

Þakka svarið jón.

Ég get tekið undir með þér að mestu með viðhorf þín til skatta- og velferðamála.

En ég tek alveg undir með SJS um sjómannafrádráttinn.

m.b.k.

[Eiður Svanberg Guðnason, 27.11.2009 kl. 23:58]

 Jón, þú svarar ekki því sem um er spurt !

[Guðmundur (IP-tala skráð) 28.11.2009 kl. 10:38]

Kerfið sem við erum með í dag er mjög einfalt og fáar undanþágur í því.  Einu undanþágurnar í kerfinu snúa að opinberum starfsmönnum og hálaunastéttum.  Þ.e. sjómannaafsláttur, laun í formi dagpeninga hjá flugmönnum og stjórnmálamönnum. 

[Jón Magnússon, 28.11.2009 kl. 10:48]

Eiður er það ekki fullnægjandi svar að ég segist vilja afnema allar undanþágur í skattalögum?

[Jón Magnússon, 28.11.2009 kl. 10:49]

Góð ábending Guðmundur þakka þér fyrir.

[Sigurður Þórðarson, 28.11.2009 kl. 16:14]

Ólíkt því sem margir halda þá er sjómannaafsláttur ekki séríslenskt fyrirbrigði, það hins vegar fiskimannaafslátturinn eftir því sem eg veit best.

Satt best að segja veit ég ekki um neitt land þar sem farmönnum er gert að skila sömu sköttum og öðrum stéttum. Ég er ekki viss um ástæðuna en mig grunar að það sé vegna þess að þessi grein er í alþjóðlegri samkeppni, jafnvel enn frekar en tryggingafélög og bankar.

Íslensk stjórnvöld hafa verið mjög treg að átta sig á þessu. Fiskveiðar sem ekki eru í alþjóðlegri samkeppni hafa notið mikilla skattfríðinda og mun meiri en vöruflutningar sem keppa á alþjólegum markaði. Niðurstaðan er sú að íslenskir farmenn borga flestir skatta í Færeyjum og Danmörku.

[Ragnar Gunnlaugsson, 29.11.2009 kl. 12:08]

Gaman væri að vita hvað ríkið borgar í dagpeninga á ári eins og vitað er eru ekki borgaðir skattur af þeim og atvinnu veitandinn þarf ekki að borga tryggingagjald af þeim heldur.

Hef unnið örfáa daga fyrir ríkisstofnun þá fékk ég laun greidd að stórum hluta sem dagpeninga,var svo sem ánægður með það en kannski ekki sanngjarnt.

[Lúðvík Júlíusson, 29.11.2009 kl. 22:37]

Afnám sjómannaafsláttar mun skerða laun sjómanns með 2 milljónir á ári um 11,5% á meðan laun sjómanns með 16 milljónir skerðast um aðeins 1,5%.

Laun allra sjómanna hafa ekki hækkað, laun sumra hafa staðið í stað eða jafnvel lækkað.  Frjálslyndir hagfræðingar eru mjög andstæðir meðaltölum því það eru einstaklingarnir sem skipta máli, ekki meðaltalið.  Er réttlætanlegt að hækka skatta á lágtekjufólk um 11,5% út af meðaltali?

Er ekki komið nóg af því að skattpína láglaunafólk?

[Jón Magnússon, 30.11.2009 kl. 17:22]

Þetta er góð athugasemd Sigurður þakka þér fyrir.

[Jón Magnússon, 30.11.2009 kl. 17:23]

Ragnar það þarf vissulega að taka margt til skoðunar því víða er potturinn mölbrotinn eins og þú bendir réttilega á.

[Jón Magnússon, 30.11.2009 kl. 17:26]

Lúðvík ég vil draga úr skattpíningu og hefði viljað afnema tekjuskatt með öllu nema á hátekjum. Annað er væri komið upp svokölluðu neikvæðu tekjuskattskerfi.  Skattpíningin veldur því að við fáum óréttlátt skattkerfi sem líkist helst svissneskum osti að því leyti að holurnar taka meira pláss en maturinn.