Lögreglunám í boði pólitískra hrossakaupa?

Það kom á óvart að menntamálaráðherra skyldi ákveða að pólitískum geðþótta að nám lögreglumanna skyldi vera við Háskólann á Akureyri, þrátt fyrir að Háskóli Íslands hefði verið talinn bestur skv. könnun ráðherrans.

Vegir skringilegra pólitískra ákvarðana eru oft álíka órannsakanlegir og almættisins. Stundum er þó varpað skímu á hvað veldur og það hefur rektor Háskólans á Bifröst gert með athyglisverðum hætti í viðtali í blaðinu Skessuhorn og á sjónvarpsstöðinni Hringbraut. Vilhjálmur rekur þau undirmál,sem urðu þess valdandi að menntamálaráðhera tók þessa ákvörðun.

Saga Vilhjálms er ekki falleg um pólitísk undirmál, hrossakaup og tilraunir hins nýja flokkseigendafélags í Sjálfstæðisflokknum til að varða stöður. Aðstoðarmaður Innanríkisráðherra og aðstoðarmaður Fjármálaráðherra hafa brugðist hart við ummælum Vilhjálms, en bæði eru í prófkjörsframboði í NV kjördæmi og þykir að sér vegið. 

Hver er þá sannleikurinn? Er það rétt eða rangt sem Vilhjálmur heldur fram?

Vilhjálmur Egilsson hefur hvatt sér hljóðs í þjóðmálaumræðunni, sem framkvæmdastjóri Verslunarráðs, alþingismaður, framkvæmdastjóri samtaka atvinnulífsins og nú háskólarektor á Bifröst. Vilhjálmur nýtur þess álits að vera talinn sannorður og fara ekki með fleipur.

Svo mætti minnast þess fornkveðna að sjaldan er reykur þá engin er eldurinn.

Til hvers flokksþing Framsóknarmenn?

Eitt af séreinkennum íslenskrar stjórnmálaumræðu er að mótmæla því sem liggur í augum uppi.

Þingmaður Framsóknarflokksins kom í fréttaviðtal í 22 fréttum RÚV í gær af því tilefni að ákveðið var að halda flokksþing Framsóknarflokksins. Hann sagði að það væri ekki til að losna við formanninn heldur vegna þess að Framsóknarfólki fyndist svo gaman að vera saman.

Ekki skal dregið í efa að Framsóknarfólki þyki gaman að vera saman. Samt er sú eina ástæða til að boða til flokksþings að mikil óánægja er með að Sigmundur Davíð leiði flokkinn í komandi kosningum. Framsóknarfólk er ekki skyni skroppið og gerir sér grein fyrir því að þrátt fyrir að Sigmundur hafi margt gott gert þá væri samt heppilegra að velja aðra forustu.

Af hverju þá ekki að segja það? Af hverju keppast flokksbroddar Framsóknarflokksins við að lýsa yfir stuðningi við Sigmund Davíð á meðan víðtæk samantekin ráð eru um að losa sig við hann sem formann. Af hverju má ekki segja það sem allir sjá og skynja?

Halldór Laxnes Nóbelskáld lýsir þjóðareðli okkar í Innansveitarkróníku og segir að því hafi verið haldið fram að íslendingar "verði skelfingu lostnir og setji hljóða hvenær sem komið er að kjarna máls." - Nú mætti bæta við "eða haldi því fram sem allir vita að er ekki rétt til að komast hjá að ræða kjarna málsins."

 

Útlendingalögin-Þjóðfylkingin og Tjániningarfrelsið

Þjóðfylkingin mótmælti útlendingalögunum á Austurvelli. Mótmælin voru friðsamleg. Að mómælendum var sótt af þeim sem líkaði ekki skoðanir þeirra. þ.á.m. þingmaður Pírata sem stóð á öskrinu og tilnefndi fjarstadda menn mig og Ásmund alþm. sem hann sagði að hefðu rangt fyrir sér, þó þess væri ekki getið í hverju.

Afstaða Þjóðfylkingarinnar getur verið góðra gjalda verð en ég þekki hana ekki gjörla enda ekki í þeim hópi eða þáttakandi í mótmælunum. Hvað svo sem því líður þá er full ástæðu til að taka Útlendingalögin til endurskoðunar og breytinga með tilliti til þess raunveruleika sem nú er í Evrópu.

Engin fréttamaður ræddi við fyrirsvarsmann mótmælenda.

Af gefnu tilefni hefur fjölmiðlunum RÚV, Mbl.is og visir.is þótt ástæða til að fjalla um málið, en þá talað við flutningsmann frumvarpsins og starfsmann ráðuneytis sem hafði með frumvarpið að gera. Ekki var rætt við forsvarsmenn mótmælenda. Þeir fengu ekki að tjá sig. Skyldi þetta vera hlutlæg málefnaleg fréttamiðlun að mati t.d. RÚV sem á skv. lögum að standa fyrir slíkri umræðu.

Svona fréttamennska er tilraun til skoðanakúgunar og aðför að tjáningarfrelsinu, auk þess sem hún er óttalega skítleg.

Daglega berast fréttir af vandamálum vegna innflytjenda, af því að Evrópuþjóðirnar tóku upp rugllöggjöf eins og lögfest var með Útlendingalögunum í vor. Það er þörf á að breyta þessum lögum til að við náum stjórn á landamærunum og hleypum ekki inn óþjóðalýð, sem líkur standa til að okkur muni stafa ógn af í framtíðinni.  Allt annað er fásinna og heimska.