Lausnin mikla og neyðarástandið.

Nýtt slagorð heimsstjórnmálanna hefur rutt sér svo til rúms, að innviðauppbygging á í vök að verjast á vinsældalista hefðbundinna stjórnmálamanna. Orkuskipti- energy transition eða Energiewende á þýsku. Þessi orð verða allir "ábyrgir" stjórnmálamenn að hafa á hreinu og muna að  bæta við. Velferð heimsins krefst þess, að orkuskiptum verði hraðað. Nýtt orð mun brátt ryðja sér til rúms í orðasafni pólitísku nýbylgjunnar "lífsháttaskipti".

Svo mjög hafa ýmsar ríkisstjórnir í Evrópu reynt að hraða orkuskiptum, að víða hefur skapast vandræðaástand jafnvel neyðarástand, vegna orkuskorts, hækkunar á verði til húshitunar og rafmagnsverði til neytenda.  

Þjóðverjar hafa hamrað á orkuskiptum til að koma í veg fyrir meinta hnattræna hlýnun af mannavöldum. Vegna stefnunnar þurfti að nota kola orkuver í auknum mæli og byggja ný í fyrra. Svo mjög jókst kolareykur þar í landi að talið er að 1000 ótímabær dauðsföll megi rekja til aukinnar loftmengunar vegna kolareyks.

Til hliðar við orkuskipti hljóta "ábyrgu" stjórnmálamennirnir líka að fara að tala um "lífsháttaskipti" sem felst í því, að stjórnvöld hafa víðtæk afskipti af því hvernig fólk lifir,hvað það kaupir,hvað það borðar, hvort það fær að fara í frí og þá hvert og innleiða refsingar gagnvart "kolefnasóðum."

Hin nýja stétt, hin nýja nomen klatura, heldur öllu sínu áfram sem hingað til eins og loftslagsgsendiboði Biden stjórnarinnar, John Kerry, sem var sæmdur sérstakri viðurkenningu á puntufundi fyrrum forseta, norðurslóðaráðstefnunni. Af því tilefni kom John Kerry að sjálfsögðu í einkaþotu og aðspurður af íslenskum fréttamanni af hverju hann lofstlagsvásendiboðinn sjálfur kæmi á einkaþotu, þá svaraði John Kerry, að það væri væri eina leiðin til að komast til Íslands. Næm heimssýn það. 

Á sama tíma og hin nýja stétt nýtur lífsins í Glasgow án þess að þurfa að hafa áhyggjur af Kóvíd eins og almennir borgarar og og leggur fram tillögur um það, með hvaða hætti megi auka álögur á neytendur, skattgreiðendur og framleiðslufyrirtæki, þá fer sú staðreynd hjá "ábyrgum" stjórnmálamönnum, fréttamönnum, samfélagsmiðlum o.fl., að um 90% dauðsfalla vegna hitastigs í heiminum er vegna kulda, en aðeins 10% vegna hita.

Skv. rannsókn Monash háskólans í Ástralíu dóu 5.083.000 vegna kulda í heiminum en 489.000 vegna hita. Þessvvegna geta "ábyrgir" stjórnmálamenn ekki annað, en lýst yfir neyðarástandi vegna hnattrænnar hlýnunar af mannavöldum.

 

 

30.000

Þrjátíuþúsund sanntrúaðir koma saman í Glasgow á lofstlagsráðstefnu Sameinuðu þjóðanna, COP 26. Fulltrúar Íslands eru 50,fjölmennasta sendinefndin m.v. fólksfjölda. Minna má ekki gagn gera þar sem íslensku sendinefndirnar hafa heldur betur samið af sér bæði í Kýótó og París svo alvarlega að við eigum ekki annars kost ef við viljum búa við góð lífskjör og berjast gegn fátækt í landinu en segja okkur frá þessum samningum.

Á umliðnum loftslagsráðstefnum hefur lítið farið fyrir tillögum íslensku sendinefndanna, jafnvel ekkert. Þó bar svo við í Kaupmannahöfn og París um árið, að íslensku fulltrúarnir, gumuðu af því að hafa komið inn í umræðuna því mikilvæga atriði "kynræn áhrif á loftslagsvandann".

Vel kann að vera að Katrín Jakobsdóttir telji að við svo búið megi ekki standa og íslenska sendinefndin verði nú að láta til sín taka og knýja í gegn ályktun um kynáttunarvanda sem og kynjavandann með tilliti til loftslagshlýnunar af manna völdum þá sérstaklega karlmanna. Slíkt framlag yrði ómetanlegt í baráttunni fyrir vistvænum heimi. 

Þau 30 þúsund sem streyma nú til Glasgow í farþegaflugi og með einkaþotum hafa býsnast yfir því að alþýðan skuli leyfa sér að fara í sólarlandaferð einu sinni á ári og skuli auk þess aka um á einkabíl. Slíkt á ekki að vera í boði fyrir aðra en hina nýju upphöfnu stétt "nomen klatura" ríkisveldis ný-sósíalismans. 

Ráðstefnan í Glasgow er andvana fædd og þar gerist ekkert nema e.t.v. að Evrópa ákveði að hraða enn meir efnahagslegu sjálfsmorði sínu til þess að Kína fái enn meir afgerandi stöðu í heimsviðskiptum.

Kína mætir ekki til leiks og Gréta Túnberg og þau 30 þúsund sanntrúaðir í Glasgow ættu að fara á Torg hins himneska Friðar í Peking til að upplýsa alþýðu um loftslagsvanda af mannavöldum.  Kína ber jú ábyrgð á losun meir en þriðjungi meintra skaðlegra lofttegunda, en Evrópa innan við 10%. Sá er líka munurinn að Kína bætir stöðugt í, en Evrópa dregur úr. 

Hvernig stendur annars á því að þetta vistvæna fólk,sem mætir á trúarbragðahátíðina í Glsgow heldur ekki fjarfund. Af hverju datt hinum hugumstóra,framúrstefnulega forsætiráðherra Íslands í fóstureyðinga, kynjafræði og lofstlagsmálum þetta ekki í hug? 

Hvað svo með Kóvíd. Skiptir það engu máli þegar yfirstéttin kemur saman. Þrjátíuþúsund manns, sem þurfa ekki að undirgangast neinar skimanir og funda mun fleiri saman en þau hámörk sem miðað er við fyrir almenning. Það skiptir engu máli þegar útvaldir eiga í hlut. 

Þegar horft er til þeirra stóru miklu og alvarlegu aðsteðjandi og raunverulegra vandamála, sem heimurinn á við að stríða í dag og veldur dauða þúsunda og hundraðaþúsunda á ári hverju, þá er eðlilegt að spurt sé hvort vandamál, sem raungerist ekki á næstu árum megi ekki bíði um sinn meðan ráðist er að raunverulegum aðkallandi vanda:  

Hungri. Skorti á hreinu vatni. Malaríu og Fátækt. Barátta til að yfirvinna þessi vandamál er mest aðkallandi í núinu en Nomen katúran. Hin nýja stétt virðist ekki sjá það. Því miður. Lúxus nomen klatúrunnar gengur fyrir öðru á kostnað alls annars. 

 

 

Áhrif út yfir gröf og dauða.

Margrét Thatcher er einn merkasti stjórnmálamaður veraldarinnar síðari hluta 20.aldarinnar. Hún og Davíð Oddsson eiga það sameiginlegt, að bjáti eitthvað á hjá fólki vinstra megin við miðlínu stjórnmálanna er nærtækast að kenna þeim um. 

Loftslagsráðstefna Sameinuðu þjóðanna á að hefjast í Glasgow um næstu helgi og svo virðist, sem Glasgow sé nú sem oftast með sóðalegustu borgum á norðurhveli jarðar, þar sem rottugangur og óhreinindi eru ógn við lýðheilsu fólks í borginni. 

Formaður borgarráðs Glasgow  Susan Aitken frá skoska þjóðarflokknum er með það á hreinu, að ástæða þess, að Glasgow skuli vera með sóðalegustu borgum veraldar, sé Margaret Thatcher að kenna. Vinstra fólk á yfirleitt ekki í erfiðleikum með að finna blóraböggla og kenna öllum öðrum um en sjálfum sér og og varast að  horfast í augu við afleiðingar  sósíalískra stjórnunarhátta sinna.

Mikill má máttur Margaret Thatcher vera fyrst hún nú rúmum 30 árum eftir að hún lét af embætti sem forsætisráðherra og rúmum 8 árum eftir að hún andaðist ber alla ábyrgð á sóðaskapnum og rottuganginum í Glasgow eins og borgarráðsformaðurinn í heldur fram.

Sérkennilegt að svona snargalin umræða skuli eiga sér stað og það frá fólki sem gegnir mikilvægum áhrifastöðum og vinstri fjölmiðlaelítan lætur sem ekkert sé og tekur jafnvel undir bullið.

 

Derringur í Erdogan

Einræðisherrann í Tyrklandi Tacip Erdogan lætur eins og sá sem valdið hefur í samskiptum við ríki Evrópu og Bandaríkin. Erdogan hefur fangelsað þúsundir Tyrkja og reynt að þurka út alla gagnrýni á sig. Meðal þeirra sem hafa verið í fangelsi Tyrkja er stjórnarandstöðuleiðtogi sem Erdogan hefur haft í fangelsi frá 2017 án þess að hann hafi nokkru sinni verið leiddur fyrir dóm 

Tíu sendiherrar mótmælti fangelsun stjórnarandstöðuleitogans án dóms og laga þ.á.m. önnur Norðurlönd en Ísland (Ísland er ekki með sendiherra í Tyrklandi) auk landa eins og t.d. Bandaríkjanna, Þýskalands og Frakklands og í framhaldi af því hótar Erdogan að reka þá úr landi. 

Nú ættu viðkomandi ríki að vera fyrri til og kalla sendiherra sína heim og tilkynna Erdogan að þau muni ekki senda þá til baka nema Tyrkir virði almenn mannréttindi. Á sama tíma ættu Evrópusambandsríkin að girða svo af landamæri Tyrklands og Evrópu, að Erdogan geti ekki sent hersveitir svokallaðra hælisleitenda yfir landamærin frá Tyrklandi til Evrópu. Á sama tíma eiga Evrópusambandslöndin líka að hætta að greiða miljarða á miljarða ofan til Tyrklands fyrir að halda hælisleitendum frá Evrópu. Hælisleitendur í Tyrklandi eiga að vera vandamál Erdogan en ekki okkar. 

Aumingjaskapur Vesturlanda gagnvart þessum ofstopamanni er þeim til skammar og nú er nóg komið. 

Vöggustofusiðfræðin

Vöggustofusamfélagið eða eigum við e.t.v. frekar að kalla það barnfóstrusamfélagið okkar segir að það megi ekki kenna unglingum um það sem er þeim að kenna. Það geti valdið þeim vanlíðan, neikvæðni og  öðrum kvillum. 

Í fréttum er það helst, að unglingar birti nektarmyndir af sér á netinu gegn eða án gjalds og selja af sér nærbuxur o.s.frv. Í kjölfar þess koma margvíslegir vandamálafræðingar og segja, að það megi ekki kenna þeim um. Hverjum er þá um að kenna? 

Þessir unglingar hafa verið varaðir við. Auk heldur eiga þeir af eigin hyggjuviti að gera sér grein fyrir hvað þeir eru að gera og hvaða afleiðingar það getur haft. Af hverju má ekki segja þeim að það sé á þeirra ábyrgð og það sé þeim að kenna.

Hvert er vandamálafræðin komin ef að það er ekki gerandanum að kenna? Bera þá ríkisstjórninni, Guð eða foreldrar ábyrgðina?

Eitt það mikilvægasta sem þarf að kenna hverjum einstaklingi er að axla sjálfur ábyrgð á eigin gjörðum og gera sér grein fyrir að gjörðir hafa afleiðingar og þær geta bitnað á þeim. Sé það ekki gert þá eru vandamálafræðingarnir að senda frá sér kolgalin skilaboð, sem eru engum til góðs, en eykur á ábyrgðarleysi. 

Mikið lán var það fyrir mína kynslóð að vera laus við svona vandamálafræðinga og þurfa að sæta ákúrum foreldra og kennara þegar við áttum það skilið. Það er alla vega betri undirbúningur undir lífið en þessi skelfilega vöggustofuvistfræði.  

Danskurinn og fjandskurinn

Stefán Ólafsson í Vallanesi orti á 17.öld eftirfarandi um kaupmanninn á Djúpavogi:

"Danskurinn og fjandskurinn á Djúpavog

 hann dregur að sér auðinn við brimseltusog

 með fjandlega gilding og falska vog

 fari betur að reyrðist um hálsinn hans tog."

Mér datt þessi vísa í hug þegar ég heyrði lögregluyfirvöld í Noregi taka það sérstaklega fram, að maðurinn sem framdi hryðjuverkið í Kongsberg þar í landi væri danskur. 

Í sjálfu sér er eðlilegt að fréttamiðlar geri grein fyrir því hvaðan maðurinn er auk frekari upplýsinga um hann. Það sem er öðruvísi en jafnan er að fréttamiðlar birta almennt ekki slíkar upplýsingar. Hætt var að birta slíkar upplýsingar og talið jaðra við rasisma að gera það sérstaklega þegar framin voru skipuleg hryðjuverk múslima á borgara Vestur Evrópu. 

Þýskir, franskir og breskir fjölmiðlar gefa almennt ekkert uppi varðandi slíka árásarmenn nema væri hægt að segja að þeir væru þýskir,franskir eða breskir ríkisborgarar jafnvel þó að uppruni þeirra væri í Íslömsku ríki. Þagað er, ef uppruni þeirra er t.d. í Sýrlandi, Marokkó, Afganistan eða Írak. 

Þegar þeir sem ábyrgð báru á þessari stefnu fjölmiðla á Vesturlöndum hafa verið spurðir af hverju þeir hafi þessa stefnu, hefur jafnan verið borið við að fjölmiðlar vilji ekki kynda undir óróa í þjóðfélaginu, ekki stuðla að rasisma eða reiði gagnvart einstökum þjóðfélagshópum.

Í samræmi við þessa samstilltu stefnu fjölmiðla á Vesturlöndum er því óeðlilegt að segja frá því að árásarmaðurinn sé Dani, en þess er sérstaklega getið í vestrænum fréttamiðlum. Í þessum sömu fréttamiðlum er nánast aukaatriði ef á það er minnst, að maðurinn sé múslimi. Að sjálfsögðu hlaut það að vera aðalatriði að illyrmið  væri danskur. 

Um Danskinn gilda greinilega aðrar viðmðiðanir enda engin sem býst við neinu illu af þeim ekki einu sinni þeir sem búa nú á Djúpavogi. 

 

  

1000 milljónir dollara

Öfgastjórn Talibana tók völdin í Afganistan með það að höfuðmarkmiði að koma landsmönnum undir harðúð Sharía laga. Konur grýttar, hommum hent fram af húsþökum eða drepnir með öðrum hætti og hendur höggnar af fólki vegna minniháttar brota. 

Vesturlönd fluttu fjölda fólks brott í öryggi Vesturlanda og íslenska ríkisstjórnin samþykkti að taka við á annað hundrað Afgönum á flótta undan villimannastjórninni, svo gáfulegt, sem það nú var. Fréttir berast af miklum fjölda flóttafólks frá Afganistan til Íran. Þaðan mun það streyma til Evrópu með aðstoð smyglara sem græða feitt á málinu og "góða fólksins".

Ingibjörg Sólrún Gísladóttir þróunarstjóri kvennréttinda í Afganistan á vegum Sameinuðu þjóðanna, getur horft yfir rústir starfs síns til margra ára og tekið undir með þjóðskáldinu "Hvað er þá orðið um okkar starf"

Ætla hefði mátt að vestræn ríki mundu bindast samtökum um að útiloka Afganistan frá samfélagi siðaðra þjóða meðan villimennska Talibanana ræður þar ríkjum. Krafist þess, að lágmarksmannréttindi yrðu til staðar í landinu auk ýmiss annars annars yrði engin aðstoð í boði. En það er ekki gert.

Í gær ákvað Evrópusambandið að gefa Talibanastjórninni 1000 milljónir Evra eða 150 milljarða, sem heitir aðstoð. Skattgreiðendur í Evrópu hafa aldrei verið spurðir um þetta eða þeirra samþykkis leitað. Þessir fjármunir hefðu getað nýst vel til uppbyggingar og aðstoðar í Evrópu, en sömu peningunum verður aldrei eytt tvisvar. 

Óneitanlega skýtur það skökku við, að Valdstjórn Evrópusambandsins í Brussel skuli fyrst krefjast þess að lönd Evrópu taki við ómældum fjölda flóttamanna (um 90% þeirra eru ungir karlmenn) vegna ógnarstjórnarinnar í Afganistan og styrkja ógnarstjórnina síðan með gríðarlegum fjármunum. 

Hvers eiga evrópskir skattgreiðendur eiginlega að gjalda. 

Hefur fyrr komið fram hversu gjörsamlega glórulaus utanríkisstefna Evrópusambandsins er og hvernig öllum markmiðum hugsjónum og evrópskum gildum hefur verið kastað fyrir róða af þessu sama Evrópusambandi, sem á stundum virðist í mun að koma öllum evrópskum gildum og viðmiðunum sem lengst út í hafsauga.

 

 

Sérkennilegar staðreyndir

Á síðasta ári því herrans ári 2020 drundi daglega sem fyrsta frétt í útvarpi ríkisins og í öllum fréttatímum til kvölds, að svo og svo margir hefðu dáið í Bandaríkjunum úr Kóvíd og svona margir hefðu smitast. Af fréttunum að dæma mátti ætla að óbærilegt hryllingsástand væri í Bandaríkjunum ólíkt öllu öðru og mun verra en annarsstaðar á heimsbyggðinni. 

Þessi fréttaflutningur útvarps ríkisins hélt áfram fyrstu daga í janúar, en síðan hvarf hann með valdatöku nýs forseta Joe Biden og hamfara Kóvíd fréttir hafa ekki verið á þeim fréttamiðli síðan. 

En hvað gerðist? Hurfu hörmungar Kóvíd daginn sem Joe Biden tók við völdum? Þeir sem hlusta á útvarp íslenska ríkisins eingöngu hlutu að álykta sem svo.

Það skýtur því skökku við þegar alþjóða fréttastofan Al Jaseera birtir frétt um það í dag, að fleiri hafi látist í Bandaríkjunum af völdum Kóvíd á árinu 2021 en árið 2020.

Skrýtið að þessi staðreynd skuli alveg hafa farið fram hjá fréttamönnum hamfaraútsvarps ríkisins. 

Er þetta virkilega svona?

Í leiðara Fréttablaðsins í dag segir m.a.

"Meðalhitastig jarðar hefur aldrei mælst hærra og undanfarin ár hefur hamfaraveður ofhitað Norður-Ameríku, Evrópu, Brasilíu og Ástralíu með tilheyrandi skógareldum. Jöklar halda áfram að hopa, sjávarmál hækkar, flóð og þurrkar geisa og dýrategundir deyja út. Það er í raun óskiljanlegt að umhverfismál skuli ekki vera það eina sem við tölum um!"

Er þetta virkilega svona eins og leiðarahöfundur lýsir eða er þetta rangt. Leiðarahöfundurinn getur afsakað sig með því að í meginhluta hefðbundinna fjölmiðla má finna sambærilegar lýsingar, þó rangar séu. 

Meðalhitastig á jörðinni hefur oft verið hærra en nú er, en það er e.t.v. rétt að yfirborðshiti hafi aldrei mælst hærri þar sem að nýjum  hitamælum í borgum þar sem hitinn er nokkuð hærri en á víðavangi hefur fjölgað mikið og frávikið er svo lítið að líklegasta skýringin á niðurstöðu mælinganna er sú en ekki að um hamfarahlýnun sé að ræða. Blaðamenn og stjórnmálamenn ættu að kynna sér það sem raunverulega stendur í skýrslu alþjóða loftslagsnefndarinnar en ekki láta nægja að lesa bara yfirlit nefndarinnar á niðurstöðum vísindamanna hennar, en þar er um stórlega ýkta mynd að ræða um hamfarahlýnun sem jafnvel þeirra vísindi eru ekki að staðfesta.

Hamfaraverður hefur ekki ofhitað þau svæði jarða sem leiðarahöfundur heldur fram og t.d. í Evrópu hefur hitastig á þessu ári og því síðasta ekki verið sérlega hátt og í Norður Ameríku hefur fer fjarri að hitastig hafi verið hátt á síðustu misserum. 

Fólk ætti að skoða nærumhverfi sitt. Er eitthvað vont að gerast, sem ekki hefur gerst áður. Eru kuldarnir undanfarið og fjárfellirinn dæmi um hlýnanandi veður eða kólnandi. Raunar hvorugt heldur tilvik og veðuraðstæður sem koma öðru hvoru. 

Hefur náttúran með sínum fjölbreytileika ekki verið með þeim hætti að tegundir hafa dáið út og aðrar komið í staðinn. Er eitthvað óvenjulegt að gerast sem bendir til að við þurfum vakin og sofin að óttast hlýnun.

Þannig er það í raun og veru ekki og jafnvel þó að skýrslur Alþjóðlegu loftslagsnefndarinnar væru lagðar til grundvallar, þá er ljóst, að hækkun hitastigs á jörðinni er eftir allt saman ekki meira en það að á ævitíma barns sem fæddist í dag mundi ekkert skelfilegt gerast vegna meintrar loftslagshlýnunar. Það er nú hin raunverulega staða. Annað eru tilhæfulausar upphrópanir. 

Hinir alvitru

Samfylkingin fékk undir 10% atkvæða í síðustu Alþingiskosningum. Í rúman áratug hefur þessi flokkur verið smáflokkur. 

Það skýtur því nokkuð skökku við að 90% af þeim sem Ríkissjónvarpið kallar til sem "sérfræðinga" til að fjalla um mál skuli vera innvígðir og innmúrað Samfylkingarfólk. Nánast ekkert Sjálfstæðisfólk eða Framsóknarfólk er kallað til. Greinilegt að stjórnendum fréttastofu og Kastljóss Ríkissjónvarpsins finnst ekki vera önnur sérfræði sem mark sé á takandi en Samfylkingarsérfræði. 

Sem betur fer er þjóðin á annarri skoðun.

En hvað getur Ríkissjónvarp lengi verið Ríkissjónvarp, sem hafnar því að meirihluti þjóðarinnar og meirihlutaviðhorf fái sambærilega umfjöllun og auglýsingu og Samfylkingar"sérfræðin"?