Veruleikafirring forstjórans

Það er með miklum ólíkindum, að verða vitni að því, að forstjóri Haga skuli tala með þeim hætti, að hann átti sig hvorki á verði eða verðmyndun. Það kann ekki góðri lukku að stýra fyrir íslenska neytendur þegar slíkur maður heldur um stjórnvölin hjá stærstu viðskiptakeðju landsins. 

Staðreyndin er einfaldlega sú, að matarkarfan á Íslandi er iðulega dýrust og aðeins Noregur og Sviss eru á svipuðu róli. 

Það er ekki von til þess, að vel gangi að eiga við verðbólgu í landinu, þegar talsmaður stærstu verslunarkeðjunnar í landinu fer með öfugmæli um að ódýrara sé að kaupa í matinn á Íslandi en annarsstaðar í Evrópu, þrátt fyrir að það sé dýrara og notar til þess reikniskúnstir, sem Sólon Íslandus hefði talið sig fullsæmdan af þegar hann reiknað barn í konu og úr henni aftur. 

Nær hefði verið að forstjóri Haga hefði gert neytendum grein fyrir því hvernig á því stendur, að erlendar pakkavörur hafa margar hækkað gríðalega að undanförnu þrátt fyrir sterkara gengi íslensku krónunnar. Hvernig er hægt að réttlæta það?

Er e.t.v. verið að fara í þennan talnaleik til að draga athyglina frá þeirri staðreynd, að verðhækkanir að undanförnu hafa verið meiri en eðlilegt er og við það er ekki hægt að una.

 

Matvara ódýrari hér en í Evrópu

Geðþóttaákvörðun erfðaprinsessunar

Svandís Svavarsdóttir tók einhliða ákvörðun í byrjun sumars að banna hvalveiðar án þess að nokkur ástæða var til. Ljóst er að hún ætlaði sér að slá sér upp pólitískt innan VG og hugsanlega hefur vakað fyrir henni að knýja fram stjórnarslit til þess að get tekið við keflinu af Katrínu Jakobsdóttur. 

Hvað svo sem vakti fyrir Svandísi, þá var um vanhugsaða órökstudda einhliða geðþóttaákvörðun hjá henni að ræða. Hún hagaði sér eins og einvaldskonungur undir formerkjum arfakónga á umliðnum öldum: "Vér einir vitum".

Einhliða tók Svandís ákvörðun, sem tefldi lífsafkomu fjölda fólks í hættu og skaðaði fyrirtæki í fullum rekstri auk þess sem órökstutt bann við veiðum var órökstudd geðþóttaákvörðun. 

Nú liggur fyrir þegar Svandís heimilar hvalveiðar án þess að nokkuð hafi breyst, að ákvörðun hennar var algjör geðþóttaákvörðun sem var andstæð þjóðhagslegum hagsmunum og hagsmunum þeirra sem höfðu framfæri sitt af veiðunum. 

Það er ekki hægt að sætta sig við það að ráðherra sem hagar sér svona sitji áfram í ríkisstjórn. Svandís Svavarsdóttir verður að fara frá. Það er ekki við það unandi að hafa ráðherra sem taka einhliða geðþóttaákvarðanir þvert á hagsmuni þjóðarinnar, fólks og fyrirtækja. Því miður er Svandís ekki ein um þessa hitu en nú hefur hún sjálf með því að breyta afstöðu sinni staðfest hversu glórulaus della ákvörðun hennar var í byrjun sumars.