Um hvað reiddust goðin?

Fyrir 1000 árum meðan rökhyggja og ályktunargáfa var í heiðri höfð sýndi Snorri goði Þorgrímsson fram á fánýti trúarlegrar dulspeki með einni setningu þannig að engin mælti í mót.

Tillaga var á Alþingi að kristni yrði lögtekin. Þá kom maður úr Ölfusi og sagði að jarðeldur væri kominn upp og rynni hraunið í átt að jörð og híbýlum eins hálfkristna goðans. Heiðnir menn hlupu þá upp og sögðu þá ljóst, að goðin væri reið yfir því að úthýsa ætti þeim fyrir Hvíta Krist. 

Snorra goða Þorgrímssyni, sem þá þótti með mestu vitmönnum landsins, varð þá að orði: Um hvað reiddust goðin þá, er rann hraunið, er nú stöndum vér á. Heiðnir menn reyndu ekki eftir þessi orð að halda fram að goðin hefðu eitthvað með staðsetningu jarðelda að gera.

Nú er öldin önnur og 70.000 ráðstefnugestir á loftslagsráðstefnu Sameinuðu þjóðanna (SÞ) eru að týnast til Dubai í flugi á einkaþotum eða áætlunarflugi, til þess að fjalla um hvað eigi að gera til að blíðka loftslagsgoðin svo þau útrými ekki öllu lífi á jörðinni.

Hinir sanntrúuðu um ofurhlýnun af mannavöldum hafa bent á mörg dæmi álíka og heiðnir menn gerðu á Alþingi hinu forna árið 1000 um kennileitin sem sýna eiga fram á reiði loftslagsgoðanna.

Fyrir ári snjóaði lítið í Alpana. Fjölmiðlar um allan heim tóku það ítrekað upp og sögðu að skíðaferðir mundu leggjast af þar sem ekki mætti búast við því í heimi hlýnunarinnar að það snjóaði framar í Alpana. 

En náttúran er söm við sig og nú hefur snjóað meira í norðurhlíðar Alpana en í langan tíma og ýmis skíðasvæði opin sem hafa ekki verið það lengi. Það breytir engu fyrir trúaða í Dubai ólíkt heiðnum mönnum á Alþingi forðum, sem virtu rökhyggju. 

Hér á árum áður var jafnan greint frá því að veður mundi vera hlýrra og með nokkrum öðrum hætti vegna náttúrufyrirbrigðisins El Nino í Kyrrahafi sem kemur með nokkurra ára millibili. En það hentar ekki loftslagsfræðunum að segja frá því þegar kröftugur El Nino er í gangi eins og verið hefur. Það rýrir hugmyndafræðina um að maðurinn stjórni veðrinu.  

Trúarbrögð og billjóna dollara hagsmunir láta ekki að sér hæða og því er haldið áfram að hræða almenning með einhliða áróðri hefðbundinna fjölmiðla og stjórnmálastéttarinnar. Skattgreiðendur og neytendur bera kostnaðinn af hátíðahöldum hinna 70 þúsund útvaldra í Dubai, en það eru þó smámunir miðað við það sem stjórnmálamenn í Evrópu ætla að skattleggja neytendur og framleiðendur vegna trúarinnar á hinn almáttuga mann, sem getur með aðgerðum sínum stjórnað veðri á jörðinni.  

Svor rammt kveður að ruglinu og frávikinu frá vísdómsorðum Snorra goða að öfgaloftslagssamtök í Bretlandi hyggjast nú stefna fjölmiðlum fyrir alþjóðlegan glæpadómstól (sem fæst við glæpi gegn mannkyninu)  vegna þess að fjölmiðlarnir leyfa sér að benda á staðreyndir um loftslagsmálin. 

Að sjálfsögðu má ekkert skyggja á velferð veislunnar í Dubai og áframhald þess að hin vita gagnslausu samtök Sameinuðu þjóðirnar, sem mega muna sinn fífil fegri, geti haldið áfram að þyrla upp moldviðri til hagsbóta fyrir hina 70.000 útvöldu og billjónamæringana,sem græða ótæpilega á ruglinu.

 

70 þúsund

Þ.30. nóvember n.k. munu 70 þúsund manns koma saman á loftslagsráðstefnu Sameinuðu þjóðanna C0P 28 í olíuríkinu Dubai. Skattgreiðendur  borga fyrir þessa 70 þúsund lúxusferðamenn. 

Hvað eru annars 70 þúsund manns að gera á loftslagsráðstefnu í Dubai? Þó að ráðstefnan eigi að standa til 12. desember n.k. þá er ljóst að fáir ráðstefnugesta munu koma nokkru að eða hafa nokkuð að gera annað en að sýna sig og sjá aðra og fá sér gott að borða og drekka á kostnað annarra. Já og skilja eftir sig stórfellt kolefnisspor.

70 þúsund fulltrúar eru, álíka margir og allir íbúar Hafnafjarðar og Kópavogs.

Á ráðstefnunni verður ekki fjallað um hvað spár fyrri loftslags ráðstefna hafa reynst ranga. Að skoða hluti í ljósi sögu og reynslu er bannað þegar trúarbrögð eins og þessi eiga í hlut. 

Framkvæmdastjóri Sþ., Guterres auglýsir nú sem aldrei fyrr  hamfarahlýnunina,sem að hans mati er að drepa allt kvikt á jörðinni. Þær spár hans eru jafn glórulausar og þær sem hann setti fram ásamt Grétu Túnberg á sínum tíma eða þá spár hans frá 13. júní 2019, þar sem hann lét taka myndir af sér  jakkafataklæddum í vatni upp á læri við strönd eyríkisins Túvalú og sagði að eyjan væri að fara í kaf. Staðreyndin er hinsvegar, að land á Túvalú er nú 2.9% stærra. 

En það skiptir engu máli fyrir sanntrúaða hvað bent er á margar og miklar missagnir hjá Guterres og SÞ., hann er að þjóna hagsmunum loftslagstrúboðsins og ofurauðkýfingar heims láta sér vel líka um leið og þeir geta komið og ráðslagast um sölu og kaup á loftslagskvótum og öðru slíku fíneríi svo þeir geti grætt sem mest á meðan skattpínd alþýða í Evrópu og neytendur þurfa að greiða meira og meira vegna vitlausustu stjórnmálastéttar, sem nokkru sinni verið við völd  í Evrópu og er þá langt til jafnað. 

Er ekki kominn tími til að þetta trúarsamfélag haldi sína fundi á eigin kostnað og láti venjulegt fólk í friði. 

En hvað skyldu nú fulltrúar Íslands verða margir á þessari trúarsamkomu og skyldi allt ráðherralið sértrúarsöfnuðarins í VG mæta ásamt drjúgum hluta þingflokksins. Það væri þá eftir öllu og allt á kostnað skattgreiðenda.

Já og ekki má gleyma Gulla umhverfis, sem lét vinna rándýra skýrslu um loftslagsþolið Íslands, um þá vá sem að landi við heimskautsbaug í norðri stafar af hnattrænni hlýnun. Sér var nú hver sköpin og væntanlega fær hann að tala í 3 mínútur á trúarsamkomunni vegna þessa merka framlags.  

Að gæta hagsmuna þjóðarinnar

Fróðlegt að lesa frásögn fyrrum forseta Ólafs Ragnars Grímssonar af viðtali við sjónvarpsstöðina Sky, þar sem hann fór réttilega hörðum orðum um Gordon Brown forsætisráðherra Breta fyrir að beita Ísland hryðjuverkalögum og setja okkar í hóp með Al Kaída, Talíbönum og ISIS þegar við áttum hvað erfiðast. 

Afar fróðlegt að heyra að Tony Blair fyrirrennari Gordon Brown skyldi segja við hann að Brown væri þrjótur,sem hann var. 

Ólafur Ragnar stóð sig best í forsetaembætti, þegar hann lét ekki bugast í fjármálahruninu, en stóð með íslenskum hagsmunum hvar svo sem við var komið. 

Davíð Oddsson og Ólafur Ragnar stóðu báðir einarðir með íslenskum hagsmunum varðandi Icesave og náðu ásamt annarra góðra manna hjálp, að koma í veg fyrir að við yrðum beitt afarkostum. 

Því miður voru ekki allir jafn ákveðnir og framsýnir í hagsmunagæslunni fyrir hönd Íslands.

Setning hryðjuverkalaga á Ísland var ólöglegt skv. alþjóðalögum, ósiðlegt og ósæmilegt og gjörsamlega ófyrirgefanlegt gagnvart vinaþjóð og bandalagsþjóð í NATO. Sú aðgerð olli okkur gríðarlegu tjóni. Það tjón vildum við Guðni Ágústsson, að Bretum yrði gert að bæta okkur og settum ítrekað fram þau sjónarmið og kröfur strax eftir að Bretar settu hryðjuverkalögin. 

Því miður var þá og í framhaldinu engin Davíð og engin Ólafur í forsvari fyrir Íslands hönd í ríkisstjórn og þáverandi ráðamenn og þeir sem við tóku sáu því miður ekki ástæðu til að standa með málstað Íslands gagnvart þeirri fólskulegu árás sem Bretar beittu okkur. 

Það skiptir alltaf máli fyrir þjóðir, að hafa góða málsvara á hvaða vettvangi sem er. Fólk, sem þorir sérstaklega þegar bjátar á, að standa með Íslandi, Íslendingum og íslenskum hagsmunum. 

Gordon Brown er bara þrjótur

Skynsemi eða hægri öfgar

Geert Wilders og flokkur hans Frelsisflokksins (PVV)vann afgerandi sigur og tvöfaldaði fylgi sitt í þingkosningunum í Hollandi s.l. miðvikudag. Frelsisflokkurinn er nú stærsti stjórnmálaflokkur Hollands.

Flokkurinn vill að hugsað sé fyrst og fremst um hagsmuni Hollendinga, ganga úr Evrópusambandinu, stöðva innflutning múslima,  moskur og Kóran skóla svo dæmi séu tekin.

Sigur Wilders sýnir að vaxandi fjöldi kjósenda treystir ekki lengur hefðbundnum hægri flokkum, sem hafa brugðist kjósendum sínum á ýmsa og allt of marga vegu. Ísland er því miður ekki undanskilið.

Stöðugt vaxandi fjöldi fólks snýr sér til fylgis við það sem stjórnmála- og fjölmiðlaelítan kallar öfga hægri og pópúlisma, þó þeir flokkar séu að berjast fyrir þjóðlegum gildum og vinna gegn glæpum og öryggisleysi almennra borgara. Hægra "öfgafólkið" í Evrópu er ekkert öfgafólk. Það berst ekki fyrir því að lýðræðið, stjórnkerfið eða stjórnsýslustofnanir séu teknar úr sambandi eða vikið sé frá gildum samkeppnisþjóðfélagsins og gildum almennra mannréttinda. 

Hvað sem stjórnmálaelítan og fjölmiðlaelítan heldur fram, þá er það rangt að kalla Wilders og t.d. Melloni á Ítalíu öfgafólk. Þau svara kalli sífellt stærri hóps fólks í Evrópu, sem sættir sig ekki við að innflytjendur taki yfir og glæpagengi taki heilu hverfin undir sig eins og í Svíþjóð, Frakklandi já og höfuðborg Evrópu, Brussel. 

Sem betur fer telja fleiri og fleiri kjósendur um alla Evrópu sig eiga meiri samleið með þeim sem vilja hugsa um eigin borgara og öryggi þeirra fyrir erlendum glæpahópum. Þessvegna stækka flokkar eins og AfD í Þýskalandi. Flokkur Giorgia Meloni á Ítalíu, Marine Le Pen í Frakklandi og nú Wilders í Hollandi.

Hefðbundnir hægri flokkar eiga ekki lengur erindi við kjósendur þ.m.t.Sjálfstæðisflokkurinn á Íslandi og Íhaldsflokkurinn breski nema þeir séu tilbúnir að svara kalli kjósenda sinna um að gæta að þjóðlegum gildum og stöðva innflytjendastraumin og tryggja öryggi borgaranna fyrir erlendum glæpagengjum, en gengjastríð er þegar hafið á götum Reykjavíkur og þessvegna  Litla Hrauni.

Vopnahlé

Samkomulag hefur náðst um nokkurra daga vopnahlé á Gasa og 50 af 230 gíslum Hamas samtakanna verði skilað. Hvað með hina gíslana 180? Eru þeir e.t.v. ekki gíslar lengur heldur lík. Varnarlaust fólk, myrt af Hamas án þess að siðferðispostular vinstrisins á Vesturlöndum og harðlínufólksins í Háskóla Íslands sem undirritaði stuðningsyfirlýsingu við Hamas hafi nokkuð við það að athuga.

Hvernig skyldi annars standa á því, að þrátt fyrir að Hamas liðar hafi byggt um 500 kílómetra af neðanjarðargöngum þar sem hryðjuverk eru skipulögð, þá hafi þeim ekki komið til hugar að byggja loftvarnarbyrgi eða annan varnarviðbúnað fyrir almenning. Er það ekkert sem veldur háskólafólkinu afvegaleidda, sem skrifaði undir Gyðingahatursyfirlýsingu Semu Erlu Serdar í HÍ neinum vökum.

E.t.v. ekki frekar en, að Hamas skuli vera með stjórnstöðvar undir sjúkrahúsum m.a. sjúkarhúsinu sem barist hefur verið við og um undanfarna daga, sem og skólum og leikskólum, þar sem almennir borgarar eru notaðir til að verja vígamenn Hamas og nota það í áróðursstríði sínu til að afvegaleiða fólk á Vesturlöndum.

Hvernig skyldi standa á að skriffinnum haturslista Semu Erlu Serdar skuli ekki hafa hugað að því, að Ísraelsmenn hafa aldrei meinað rýmingu af sjúkrahúsum á Gasa. Þvert á móti hafa þeir hvatt til rýmingar og að almenningur yfirgefi átakasvæði. Það hafa Hamas liðar hinsvegar iðulega komið í veg fyrir til að fá skjól af sjúklingum og óbreyttum borgurum. 

Í Úkraínu er háð styrjöld þar sem rúmlega 300 þúsund ungir menn hafa verið drepnir og fjöldi óbreyttra borgara. Mun fleiri en á Gaza. Hvernig skyldi standa á því að engin gerir athugasemd við það og Háskólafólk skuli ekki sjá neina ástæðu tli að tjá sig um þau ósköp á meðan það hatast út í Gyðinga sem eru að reyna að tryggja tilverurétt sinn og öryggi eigin borgara í Ísrael með því að ganga á milli bols og höfuðs á hryðjuverkaliði Hamas.

Við erum epli sögðu hrútaberin og það sama virðist eiga við um fólkið í HÍ sem skrifaði undir hatursyfirlýsingu Semu Erlu gegn Ísrael. 

Nú er tími til að brosa í Argentínu.

Um aldamótin 1900 var Argentína í hópi þriggja ríkustu þjóða heims ásamt Sviss og Svíþjóð. Upp úr miðri 20.öldinni seig á ógæfuhliðina. Stjórnlyndir stjórnmálamenn, sem vildu allra vanda leysa með auknum ríkisumsvifum gerðu sitt til að eyðileggja efnahag ríkisins á grundvelli og forsendum meintrar góðmennsku. 

Allar götur síðan hefur Argentína verið í erfiðleikum og frekar sigið á ógæfuhliðina. Verðbólga hefur verið í hæstu hæðum og gjaldmiðill þjóðarinnar oftar en einu sinni orðið ónýtur og Argentína hefur ekki getað staðið við skuldbindingar sínar. 

Skriffinskubáknið í Argentínu hefur verið stórt og stjórnmálastéttin hefur aukið umsvif ríkisins og fjölgað starfsmönnum ríkisins. 

Nú er nóg komið og Argentínumenn kusu þann frambjóðanda sem var lengst til hægri og vill beita markaðslausnum. Fækka ríkisstarfsmönnum, auka svigrúm einstaklinga til að stofna og reka fyrirtæki og einkavæða sem mest og taka starfsemi Seðlabankans til endurskoðunar hugsanlega leggja hann niður og hætta að færa fórnir á altari loftslagsbullsins. Fólkið í Argentínu kaus hann vegna þess, að allar vinstri lausnirnar hver á fætur annarri hvort sem var hjá hershöfðingum eða sósíalskri verkalýðshreyfingu landsins hafa verið haldlausar. 

Spurning er hvernig gengur nýja forsetanum að glíma við vandamálin. Vonandi vel, en hann fær ekki gott veganesti. Skuldir Argentínu við Alþjóðagjaldeyrissjóðinn nema 44 þúsund milljónum dollara svo þess eins sé getið. En kjósendur mátu það greinilega þannig, að hann og stefna hans væri besti kosturinn þar sem að mótframbjóðandi hans var fulltrúi stjórnmálastéttarinnar og var hafnað.

Þetta flotta og stolta ríki og þjóð á skilið að fá skynsamlega stjórn eftir óstjórn í tæpa öld. Vonandi fær nýr forseti svigrúm til að koma framfarasinnaðri stefnu sinni í framkvæmd.

Vonandi þarf Argentína ekki lengur að gráta heldur getur brosað út í bæði. 

Fólk innviðir og svonefndir hælisleitendur.

13.nóv. samþykkti Alþingi með ógnarhraða lög um vernd mikilvægra innviða á Reykjanesskaga. Engar skilgreiningar eru í lögunum hvað átt er við með innviðum eða almannahagsmunum, en svo virðist sem átt sé við að heimila skurðgröft ýmiskonar og byggingu varnargarða um veitumannvirki.

Margt er athyglisvert við þessa lagasetningu, en það þó helst, að í öllum asanum og látunum við að koma þessum lögum á koppinn, datt engum þingmanna í hug, að það væri líka mikilvægt að byggja vörn fyrir fólk ekki síður en innviði. 

Íbúar í Grindavík munu ekki geta búið heima hjá sér um ófyrirsjáanlega framtíð. Vonandi verður það stutt, en engin veit á þessari stundu hver framtíð byggðar í Grindavík verður. Meðan á því stendur er brýn nauðsyn að Alþingi setji lög og reglur sem tryggi sem best stöðu íbúa Grindavíkur og möguleika þeirra á að komast í mannsæmandi húsnæði og aðstöðu sem fyrst. 

Hér er mikill fjöldi ólöglegra innflytjenda, sem hafa fengið húsnæði, fæði, klæði, læknisaðstoð og meira að segja  farsíma á kostnað skattgreiðenda vegna fráleitrar löggjafar. Nánast undantekningarlaust er þetta fólk ekki raunverulegir flóttamenn.

Nú þurfum við á öllu okkar að halda til að tryggja mannsæmandi kjör íslenskra ríkisborgara í neyð. Þessvegna liggur beint við að setja lög, sem loka landinu algjörlega fyrir svonefndum hælisleitendum ótímabundið meðan við búum við það neyðarástand sem nú hefur skapast og flytja þá sem hér eru ólöglega af landi brott þegar í stað. 

Við erum í vanda og verðum því að taka til okkar ráða og hætta  að henda peningum skattgreiðenda í rugl eins og hælisleitendur þar sem meir en 99% eru á fölskum forsendum.

Það er nefnilega aldrei nóg til eins sumir hafa hafa haldið fram. Þannig hefur ríkisstjórnin stolið peningum úr hamfarasjóðum til að fjármagna dekur sitt við ólöglega innflytjendur og fleiri ónauðsynleg verkefni og reynt með því að fela framlög og kostnað.

Við verðum að beina öllum okkar krafti að því að fólkið í Grindavík njóti alls hins besta. Þau eiga það skilið. 

 

Varnarsveitir Ísrael eru að vinna sigur

Dálkhöfundurinn og hernaðarsérfræðingurinn Richard Kemp segir eftirfarandi í grein í DT í dag: 

Varnarsveitir Ísrael hafi barist á Gasa undanfarnar vikur og náð meiri árangri en þeir sjálfir höfðu þorað að vona. Sótt fram með meiri hraða og eyðilagt mikið af stjórnstöðvum Hamas, náð mikilvægum gögnum og beðið minna manntjón en búist hafði verið við.

Þegar Hamas réðist á Ísrael 7.október vissu þeir, að Ísraelar mundu svara og undirbjuggu sig fyrir það með eins góðum hætti og þeim var unnt m.a. með því að færa allar meiriháttar stjórnstöðvar undir sjúkrahús og skóla til þess að fullkomna þá stefnu sína að óbreyttir borgarar mundu líða og deyja frekar en nauðgarar og barnamorðingjar Hamas.

Varnarsveitir Ísrael hafa sprengt göng Hamas ofan frá með góðum árangri. Þó að varnarsveitir Ísrael hafi ekki náð að staðsetja og drepa æðstu stjórn hryðjuverkasamtaka Hamas þá eru augljós merki þess, að Hamas er undir miklu álagi. Eldflaugaskot frá Gasa eru í algjöru lágmarki og sagt er að leiðtogar Hamas biðji Hisbollah í Líbanon um að gera árásir til að Varnarsveitir Ísrael þurfi að berjast á fleiri vígstöðvum.

Annað merki þess að Hamas sé í vandræðum er að boðum hefur verið komið til Katar um að reyna að ná samningum við Ísrael um vopnahlé. Ísrael hafnar vopnahléi sem felur það í sér, að þeir dragi herlið sitt til baka og gefi Hamas tækifæri til að endurskipuleggja sig, fávísir stjórnmálamenn á Vesturlöndum þ.á.m. Íslandi krejast þessa líka í stað þess að leggja áherslu á mannúðarhlé til að almennir borgarar geti yfirgefið átakasvæði eins og Ísrael hefur gert reglulega.

Tölur um fallna og særða á Gasa koma eingöngu frá heilsugæslu Hamas, sem gerir engan mun á óbreyttum borgurum í þessu efni og stríðsmönnum Hamas.

Varnarsveitirnar fara að alþjóðalögum um hernað og vopnaviðskipti og gera sitt besta til að lágmarka manntjón meðal almennra borgara. Sendar eru út viðvaranir til fólks um að yfirgefa væntanleg átakasvæði, svæði sem varnarsveitirnar ætla að ráðast inn á. Síðan stríðið byrjaði hafa varnarsveitirnar sent yfir 1.5 milljónir dreifimiða úr lofti, sex milljónir talskilaboð, 4 milljónir stafræn skilaboð og hringt og gert mannúðarvopnahlé. Þrátt fyrir þessa viðleitni varnarsveitanna hafa margir óbreyttir borgarar dáið á Gasa. Það er sorglegt, en hjá því verður ekki komist meðan Hamas felur sig meðal óbreyttra borgara og þvingar þá iðulega til að vera um kyrrt á svæðum, sem vitað er að verði næst fyrir árásum.

Joe Biden og Rishi Sunak hafa hingað til staðið í lappirnar og staðið gegn kröfum um vopnahlé (annað en Alþingi Íslendinga), þá hafa þeir jafnan tekið fram, að Ísrael verði að fara eftir reglum og alþjóðalögum, sem gilda um hernað og reyna að komast hjá því svo framast verði við komið að óbreyttir borgarar falli. Þeir vita að það er einmitt það sem varnarsveitir Ísrael eru að gera, en telja þetta pólitískt klókt vegna sumra kjósenda sinna að orða þetta svona á sama tíma og það er með öllu ljóst, að á þessari stundu þá er vopnahlé umfram stutt mannúðarvopnahlé eingöngu til þess fallið að koma nauðgurnum og barnamorðingjum Hamas til góða. Svo mörg voru þau orð dálkahöfundar DT. Gott fyrir þá sem hamast við að tala um stríðsglæpi og útrýmingaherferð að skoða málið miðað við það sem kunnáttumenn segja að sé að gerast í stað þess að taka fréttir frá hryðjuverkafólkinu eins og heilögum sannleik. 

Samstaða með lýðræði og frelsi gegn hatri og hermdarverkum.

Fyrir mánuði myrti Hamas 1.400 saklausa einstaklinga með hroðalegum hætti. Þeir pyntuðu fórnarlömbin, nauðguðu konum, drápu og svívirtu líkin, myrtu börn jafnvel ungabörn m.a. með því að kveikja í þeim og brenna þau. Villimennskan var algjör.

Hamas drápu, misþyrmdu og nauðguðu ungu fólki á tónlistarhátíð alls 260 þ.á.m. 22 ára stúlku frá Þýskalandi, sem þeir hópnauðguðu,myrtu, svívirtu líkið og óku með það um Gasa þar sem fólk hrækti á líkið. Villimennirnir kórónuðu ódæðið með því að höggva höfuðið af ungu konunni,sem hafði ekkert til saka unnið.

Búast hefði mátt við fjöldamótmælum á Vesturlöndum m.a.hér vegna morðanna og kröfu fólks um að varnarlausum gíslum 230 manns, verði sleppt. Fjarri fór því. Haldinn var samstöðufundur með íbúum á Gasa og Hamas í Háskólabíó 5.nóv. Samúð fundarmanna náði ekki til saklausra fórnarlamba Hamas og gísla þeirra.

Hluti fólksins á samstöðufundinum eru nytsamir sakleysingjar, sem óar við stöðugum áróðri RÚV um hörmungar og tölu fallina á Gasa skv. upplýsingum villimannasamtakanna. Svo er annar hluti, sem mætir vegna haturs á Ísrael. Væri ekki svo, þá mundi þetta fólk ekki síður halda samstöðufundi vegna hryllingsins sem er að gerast í  Armeníu og Súdan.

Hvernig getur fólk á Vesturlöndum tekið afstöðu með rasískum,hómófóbískum samtökum eins og Hamas, sem dásama hryðjuverk,telur samkynhneigð dauðasök. Samtök sem hika ekki við að byggja stjórnstöðvar sínar, vopnabúr og birgðageymslur undir sjúkrahúsum og skólum á Gasasvæðinu.

Hamas liðar líta á að mannfórnir á Gasa þegar Ísrael slær til baka eftir hryðjuverk Hamas, sem lið í baráttunni fyrir því að grafa undan velvild í garð Ísrael, sem það gerir óneitanlega.

Á meðan öfgamennirnir í framlínu Hamas beita öllum ráðum til að drepa sem flesta, lifa forustumenn Hamas í vellystingum á lúxus hótelum í löndum eins og t.d. Qatar.

Fyrir miðja síðustu öld voru 150.000 Gyðingar í Írak, 75.000 í Egyptalandi og tugir þúsunda í Líbýu, Sýrlandi, Jemen og Líbanon. Nánast allir þessir Gyðingar þurftu að flýja til Ísrael og meira en helmingur Gyðinga sem býr í Ísrael eru afkomendur þessa fólks. Þessir Gyðingar eiga bara Ísrael sem heimaland.

Ísrael er á örlítið land. Gyðingar hafa breytt því úr hrjúfu örfoka landi í gróðurvin, þar sem velmegun er mikil og landið í fremstu röð þjóða í efnahagslegu, menningarlegu og vísindalegu tilliti. Nágrannar þeirra búa yfir miklum óbyggðum landssvæðum, en dettur ekki í hug að bjóða Palestínufólki að byggja þau.

Ísrael er eina lýðræðisríkið fyrir botni Miðjarðarhafsins og borgararnir búa við öll almenn mannréttindi. Fimmti hver borgari í Ísrael eða 20% íbúa eru Arabískir Ísraelsmenn, sem hafa sama kosningarétt og rétt til embætta og annarra réttinda. Margir þeirra gegna mikilvægum ábyrgðarstöðum . Tæplega 20% Ísraela eru Múslimar en hafa sömu lýðréttindi og aðrir borgarar. Hvernig rímar það við slagorð Gyðingahataranna um að í Ísrael ríki apartheit eða aðskilnaðarstefna?

Þessar staðreyndir valda vinstra liðinu og Gyðingahöturnum ekki vökunum þegar þeir þykjast taka sér stöðu á grundvelli frjálslyndra skoðana og mannréttinda með einræðishyggju og ofbeldisliði Hamas, sem byggir á andlýðræðislegri miðaldahyggju, heimsyfirráða múslima og útrýmingu allra Gyðinga í heiminum.

Vonandi tekst að lama starfsemi Hamas og vonandi tekur skynsamt fólk við stjórn hjá Palestínumönnum þannig að grundvöllur skapist fyrir friði og tveggja ríkja lausnin, Ísrael og Palestína nái fram að ganga með friðsæl býli og gróandi mannlíf friðar og velsældar. Samstöðufundurinn í Háskólabíói þ 5. nóvember var ekki lóð á þá vogarskál heldur þvert á móti.

Kyrrstöðustyrjöld

Yfirmaður Úkraínuhers segir Úkraínustríðið kyrrstöðustyrjöld. Zelenskí hugmyndafræðin um að vinna til baka allt landssvæði sem hann telur tilheyra Úkraínu þ.á.m.Krímskagann gengur ekki upp og NATO átti að vera ljóst frá upphafi og hafa vit fyrir Zelenskí.

Gagnsókn Úkraínu hefur ekki borið neinn árangur. Þúsundum, tugþúsunum og e.t.v. hundruðum þúsunda mannslífa, hermanna, sem skipað var í tilgangslausar sóknir til að ná e.t.v. til baka sundurskotnum þorpum, hefur verið fórnað í tilgangsleysi. Enginn hernaðarsigur er í sjónmáli fyrir Úkraínu. Engin varnarlína hefur verið rofin.

Mörgum Evrópuleiðtogum er ljóst m.a.Giorgiana Meloni, að það þarf að finna leið til að ljúka átökunum. Skyldi Bjarna Benediktssyni og Katrínu Jakobsdóttur vera það ljóst.

Einhverjum kann að finnast að með samningum við Rússa, þá líti Pútín út  fyrir að vera sigurvegari, en það er hann ekki. 

Árás Rússa á Úkraínu hefur sýnt fram á veikleika Rússa sem herveldis, en um leið sýnt að efnahagslegar refsiaðgerðir Vesturveldanna gegn Rússum bitnar meira á þeim sjálfum en Rússum. 

Vesturveldin hefðu átt að leggja áherslu á samninga frá upphafi í stað þess að búa til óraunhæfar og hugmyndir um að niðurlægja Rússa og Úkraínuher gæti unnið sigur á Rússum.  

Skammtímaafleiðingar þessarar vanhugsuðu stefnu birtast nú með auknum samskiptum Rússa og Norður Kóreu. Slit Rússa á samskipti við Ísrael en vinsamleg samskipti við Hamas fyrir og í kjölfar hryðjuverkaárásanna. Aðkoma Rússa af hryðjuverkaárásinni eru enn óljós, en hið sanna mun koma í ljós.  Sigur Aserbajan á Armenum og landvinningum í Nagorno Karabak, þar sem hundruðir þúsunda Armena voru reknir frá heimkynnum sínum þar sögðu Vesturveldin ekkert enda upptekin við að magna kyrrstöðustyrjöldina.

Skammtíma sjónarmið í utanríkismálum eru skaðleg. Það þarf alltaf að skoða heildarmyndina. Pútín verður ekki eilífur, en það eru langtímahagsmunir Evrópu, að eðlileg og friðsamleg samskipti verði byggð upp við Rússa. Stjórnmálamönnum var það ljóst á tímum Sovétríkjanna,en þau ólíkt Rússlandi stefndu að heimsyfirráðum.