Verðtrygging er verri en gengislán

Hvernig sem það er reiknað þá eru verðtryggð lán til langs tíma verri lán en gengislán þó að gengishrun verði.  Sé miðað við lánstíma til 20 ára eða lengri þá kemur verðtryggða lánið  verst út.

Enginn gjaldmiðill í öllum heiminum stenst sterkasta gjaldmiðli heimsins snúning. Sá gjaldmiðill er verðtryggða íslenska krónan. Þessi gervimynt, útreikningsmynt hagfræðinga sem kyndir undir verðbólgubál og stuðlar að óábyrgri lánastarsemi.

Það er einstakt að fulltrúar verkalýðsins skuli harðast verja verðtrygginguna eins og forseti ASÍ og aðrir lífeyrisfurstar. Þá er það einstök upplifun að sjá gamla komma eins og Mörð Árnason og Kristinn H. Gunnarsson sameinast í kröfunni um, að þeir sem hafa verið skornir niður úr skuldasnörunni með dómi Hæstaréttar verði hengdir upp á aðra verri þ.e. verðtryggingarsnöruna.

Verðtryggingin kann að vera lögleg en hún er algerlega siðlaus. Þegar ég settist á þing lét ég verða eitt mitt fyrsta verk að setja fram kröfu um að fólkið í landinu byggi við sambærileg lánakjör og fólk á hinum Norðurlöndunum. Athyglivert að aðilar vinnumarkaðarins, lífeyrissjóðirnir og bankarnir skyldu vera á móti því.  Af hverju skyldi það vera?

Er hægt að halda uppi þjóðfélagi sem er á algjörum sérleiðum í lánamálum og gjaldmiðilsmálum?

Ég  held ekki.

Athugasemdir

[Brjánn Guðjónsson, 22.6.2010 kl. 22:41]

Jón. Ég hef ekki alltaf verið skoðanabróðir þinn, en stundum. Í þessu máli er ég hjartanlega sammála þér.

[Jón Magnússon, 23.6.2010 kl. 00:11]

Þakka þér þá alla vega fyrir það í þessu máli.  Að losna úr viðjum verðtryggingar er annað af mikilvægustu málum sem þarf að koma þessu þjóðfélagi úr.

[Guðrún María Óskarsdóttir., 23.6.2010 kl. 01:58]

Takk fyrir þetta Jón, mæltu manna heilastur.

kv.Guðrún María.

[Eirikur Stefánsson (IP-tala skráð) 23.6.2010 kl. 02:47]

Kristinn talar af illmennsku og heimsku en Mörður af fljótfærni og heimsku.

Gömul kona í verkalýðs-og jafnréttisbarráttu sagði að skuldug kona væri ekki frjáls kona.

www.thjodareign.is

[Eirikur Stefánsson (IP-tala skráð) 23.6.2010 kl. 03:06]

Jón, Danskurinn Glístrup sagði að Danir ættu að leggja niður Danska herinn og setja upp símsvara sem segði í sífellu ef ráðist yrði á Danmörk,við gefumst upp, við gefumst upp.

Sama gildir um verkalýðs-og lífeyrisbaróna, burt með þá alla. Ráða eina konu á skrifstofu við að senda út jólakort. Ef menn vilja halda uppi kolgjeggjuðu lífeyriskerfi sem hirðir 12% af launum hvers einasta vinnandi manns á hverjum degi,þá þarf að taka það úr höndum manna sem haga sér eins og ríki í ríkinu,hóta sitjandi ríkisstjórnum á laun með þessu fjármagni. Braska með það eins og þeim dettur í hug. Aldrei myndu þeir þora að braska eins með eigin fjármuni. Leggja þarf allar lífeyrisgreiðslur inn í Seðlabanka Íslands með ríkisábyrgð og greiða þaðan út lífeyri. Burt með lífeyrisbarónanna, þeir eru óvinir hins vinnandi manns.

[Halldór Jónsson, 23.6.2010 kl. 08:17]

Það er gaman að þú skulir loks vera kominn á mína skoðun sem var að verðtryggð íslensk króna sé sterkasti gjaldmiðill heims.

Það er bara sá hængur á að hann er sá besti til að spara í en sá versti til að skulda í. Og verkurinn er að enginn má vera að því hér að spara til að geta keypt seinna eins og Þjóðverjar hugsa. Hér verður allt að ske strax. Lán eiga að leysa allan vanda og þau eru þeim mun betri sem minna þarf að borga til baka.

Hvar í veröldinni getur þú lagt fyrir án þess að stolið sé af þér?(NB gef ég mér að jónarásgeirar stjórni ekki öllu bankakerfiniu). USA ? Japan? Brüssel? Uganda ? Afganistan?

[Jón Ottesen (IP-tala skráð) 23.6.2010 kl. 09:21]

Ég er sammála þessu og mun aldrei taka verðtryggt lán.

 Þá er bara spurningin hvað sérðu fyrir þér í gjaldeyrismálum??

[Kjartan Jónasson (IP-tala skráð) 23.6.2010 kl. 10:44]

Það er víst alveg óraunhæft að leggja af verðtryggingu á meðan krónan er ekki traustari mynt en raun er á.   Hvernig væri að berjast frekar fyrir leiðréttingu á verðtryggingargrunninum, þannig að til komi einhver leiðréttingarþáttur vegna verðbólgu í viðskiptalöndum.  Vandamálið við verðtrygginguna er einmitt að hún oftryggir fjármagnseigendur og þeir þurfa ekki, öfugt við aðra fjármagnseigendur í veröldinni, að sæta neinum afföllum vegna peningabólgu (sem að hluta til er ígildi framfara í kjörum og gæðum).

[Snjalli Geir, 23.6.2010 kl. 11:20]

Ef þú villt tryggja velgengni bankakerfisins, gjaldþrot lífeyrissjóðanna og koma í veg fyrir sparnað í peningum þá er í góðu lagi að afnema verðtrygginguna. 

Lántakendur munu alltaf borga  HÁA VEXTI sem eru verðbólga plús raunvextir hjá bankakerfinu.  Hinsvegar munu innlánsvextir vera lágir og langt undir verðbólgunni sem þýðir að sparnaður brennur upp á verðbólgu bálinu.

Ég skal bara taka kúlu lán í þínum lífeyri á ca 2% vöxtum til 40 ára eða þegar þú þarft á honum að halda. Ég held að þú verðir ekki ánægður með eftirlaunin þín þá.

Áhugamaður um fjármál á Íslandi ætti að geta lesið sér til um hvað varð um sparifé fólks og lífeyrissjóðina áður en verðtryggingin kom til sögunar.

Ég held að skrif þín um verðtrygginguna beri vott um mikið skilningsleysi á samfélaginu í heild og horfir einungis á eigin sérhagsmuni.

Ég man 120% verðbólgu 1982.  Ég hef séð dollarinn fara í ca 110 kr í kringum 2001. Það hefur ekkert gerst hér á Íslandi í hruninu sem ekki hefur gerst áður.

Mér datt ekki í hug að fara og taka 20 milljón króna lán til að kaupa íbúð á 3 földu verði 2007!  Ég tók ekki myntkörfulán til að kaupa bíl (enda vissi ég ekki þá 2007 að þau væru ólögleg). Ég keypti mér gamla Toyotu model 2001 og það í júlí 2007.

Ríkisvaldið kann ekki með pening skattgreiðenda að fara.  Þess vegna verður til verðbólga, hvort sem hún er búin til á Íslandi eða annarsstaðar.  SEÐLAPRENTUN FRAMELIÐIR VERÐBÓLGU, ekki verðtryggingin.

Hvenær leiðréttust  lífeyrissjóðirnir eða sparifjárbækurnar hjá fólkinu sem missti allt sitt í verðbólgunni áður en verðtryggingin kom til?

Hver á að borga þessa 12 þúsund milljarða sem töpuðust út úr kerfinu okkar?

Ég ætla að koma og fá lánaða einn poka af sykri í kvöld hjá þér.  Á morgun ætla ég að skila þér hálfum poka af sykri.  Ertu sáttur??? Ég er ekki sáttur ef ég þarf að standa í svoleiðis lánastarfsemi.

Launin þurfa bara að hækka til samræmis við lánin.  Það er kaupmáttarrýrnunin sem er að gera út af við fólk, ekki verðtryggingin sem slík.

Það kvartaði engin þegar launavísitalan hækkað umfram lánskjaravísitöluna og þú skuldaðir færri og færri mánaðarlaun í húseigninni.  Þá voru skuldarar ekki að kvarta.  Ég er að tala um "lánæris" árin upp úr 2003 og fram að hruni.

Af hverju er saksókknari ekki að smala lögfræðingunum saman og láta dæma þá í  fangelsi sem sömdu þessa lánasamninga? Af hverju gerir þú ekki kröfu um það?

Viðbrögð ríksvaldsins við Hæstraréttardómnum um gengistrygginguna sanna það sem ég hef alltaf sagt:

ÞAÐ ER HLUTVERK RÍKISVALDSINS AÐ ARÐRÆNA ALMÚGAN OG PÚKKA UNDIR AÐALINN.

Lifið heil á banana og klíkuveldinu Íslandi.

[Jón Magnússon, 23.6.2010 kl. 12:05]

Þakka þér fyrir Guðrún María

[Jón Magnússon, 23.6.2010 kl. 12:07]

Ég er ekki sammála þér Eiríkur að Kristinn tali af illmennsku. Þetta er hans skoðun, en ég er sammála þér að Mörður hafi verið fljótfær og farið fram úr sér.  En ég er töluvert sammála þér með verkalýðsrekendur og lífeyrisbarónanna.

[Jón Magnússon, 23.6.2010 kl. 12:09]

Halldór ég hef í mörg ár bent á að verðtryggða krónan sé sterkasti gjaldmiðill í heimi. Þess vegna var það með ólíkindum að lífeyrissjóðirnir skyldu leggjast í víking í stað þess að ávaxta sitt pund þar sem það var öruggt og gaf mesta raunávöxtun.

Getur þú skýrst það fyrir mér Halldór fyrst þér er svona í mun að hugsa um hagsmuni fjármagnseigenda af hverju við getum ekki haft sömu kjör fyrir aðila á lánamarkaðnum og í okkar nágrannalöndum. Ég fer ekki fram á annað en ekkert minna.

[Jón Magnússon, 23.6.2010 kl. 12:10]

Jón ég sé það fyrir mér að við tökum upp fjölþjóðlega mynt eða gengisgtengingu. Annað er gjörsamlega óraunhæft til frambúðar.

[Jón Magnússon, 23.6.2010 kl. 12:11]

Kjartan þetta er alveg rétt hjá þér.

[Jón Magnússon, 23.6.2010 kl. 12:13]

Snjalli Geir mér finnst nú ekki allt mjög snjallt sem þú sendir frá þér í athugasemdinni. Í fyrsta lagi þá veit ég ekki til þess að nokkur af lögfræðingum þeim sem þú ert að tala um að eigi að smala saman hafi gerst brotlegir við refsilög.  Síðan er ég ekki sammála þér með hlutverk ríkisvaldsins enda held ég að þú meinir það ekki heldur sért að tala um það sem viðgangist í dag.

[Snjalli Geir, 23.6.2010 kl. 12:22]

Sæll Jón,

Sá sem er svangur og stelur sér fyrir 1000 krónur út í verslun fer í 5 mánaða fangelsi.

Sá sem "varðveitir" fé fyrir bankann á sínum eigin reikningi 120 milljónir er saklaus.

Her lögfræðinga sem hefur réttlætt ólöglega lánastarfsemi og ætlað að hafa  tugi milljarða af fólki, eyðilagt heimili, gert eigur fólk upptækar og ýtt mönnum út í sjálfsmorð eiga það skilið að ríkisstjórninn komi þeim til aðstoðar.

ÉG HELD AÐ LÖGLÆRIÐIR MENN HAFI RUGLAST EITTHVAÐ Í KOLLINUM.

Hvenær má ég sækja sykurinn?

Kveðja

Geir

[Sigurður Ingólfsson, 23.6.2010 kl. 12:56]

Jón, þessi grein og umræðurnar flestar eru orð í tíma töluð. Það er eins og við komumst ekki upp úr hjólförum peninga- og fjármála hvað sem við reynum og langt mál að skrifa um. Kjarnin er sá að verðtryggingin ver eftirlaunaþega og fjármagnseigendur en kemur yngra fólki á skuldaklafa sem það ræður ekki við og vill frekar flytja af landi brott. Þarna verður að fara millileið. Það er mikið í húfi.

[Jón Magnússon, 23.6.2010 kl. 15:08]

Þetta er dálítið út úr korti hjá þér Geir. Sá sem stelur fyrir þúsund krónur úr verslun fer ekki í fangelsi nema um margítrekað brot sé að ræða. 

Hafi einhver haldið peningum ranglega fyrir öðrum þá ber honum í fyrsta lagi að greiða þá og í öðru lagi þá getur verið að hann hafi gerst sekur um brot á hegningarlögum og tekur þá út sína refsingu ef svo ber undir.

Stundum vilja menn skjóta sendiboðann og þannig er það iðulega með lögmenn að þeir vinna fyrir ákveðna skjólstæðinga svo sem þeim ber að gera samkvæmt sínum siðareglum eins og aðrar háskólastéttir gera og eru síðan sakaðir um hluti sem þeir hafa persónulega ekkert með að gera.  Sem betur fer eigum við marga góða lögfræðinga og lögmenn í þessu landi. 

 Ég átta mig ekki á þessu með sykurinn og þar sem sykurneysla er lítil hér  þá er ekki mikið að sækja.

[Jón Magnússon, 23.6.2010 kl. 15:11]

Þakka þér fyrir Sigurður það er einmitt aðalatriðið að það sé fundin sanngjörn leið í málinu og ég tel að sú leið sé með því að hafa sambærilegt lánakerfi hér og á hinum Norðurlönunum. Athugaðu að íslensku bankarnir meðan þeir stefndu að heimsyfirráðum voru að lána langtímalán erlendis óverðtryggð gegn lægri vöxtum en þeir buðu íslendingum upp á þó um verðtryggingu væri að ræða.

Mér finnst þetta ósköp svipað eins og það var þegar hægt var að kaupa flugmiða í Lúxembourg á mun lægra verði til Bandaríkjanna og til baka en að kaupa flugmiða milli Íslands og Lúxembourg.  Meðan hægt er að svína á neytandanum í skjóli fákeppni þá er það gert.