Ekki skal framfylgja lögum í landinu

Skv. niðurstöðu byggðri á útlendingalögum Íslands, sem eru einna vinsamlegustu lög þeirrar gerðar gagnvart svokölluðum umsækjendum um alþjóðlega vernd,á að vísa nokkrum slíkum úr landi. Enginn dregur í efa að brottvísunin sé byggð á grundvelli íslenskra laga og réttmæt sem slík. 

Þá bregður við að þeir sem vilja hafa galopin landamæri og engar reglur í þessum málum nema þær, að íslenskir skattgreiðendur skuli ala önn fyrir öllum þeim sem hingað vilja koma og leggjast upp á íslenska velferðarkerfið bregðast hart við og krefjast þess að ekki verði farið að íslenskum lögum heldur vikið frá þeim á grundvelli geðþóttaákvörðunar í þessu tilviki og sótt að viðkomandi ráðherra til að fá hann til að taka fram fyrir hendurnar á lögmætum aðilum sem hafa með þessi mál að gera. 

Í Ríkissjónvarpinu í 22 fréttum í gærkvöldi mátti sjá hvílíka óbeit fréttastofan RÚV hefur á því að lögmæt íslensk yfirvöld fari að íslenskum lögum þegar fréttastofa RÚV telur það ekki henta.

Fyrsta fréttin var langhundur um það hve illa væri farið með hælisleitendur í Grikklandi, en þangað eiga þeir að fara sem um ræðir í þessu tilviki. Næsta frétt var harmræn frétt um það að vísa ætti hælisleitendunum úr landi og sótt að embættismanni þar sem ráðherra málaflokksins var ekki tiltækur. Síðan auglýsti fréttastofa RÚV fyrirhugaðar mótmælaaðgerðir þeirra sem vilja opin landamæri. Lengra verður vart komist í pólitískum áróðri fréttamiðils. Þess má e.t.v. geta að þessi fréttamennska fer algjörlega í bág við lög um Ríkisútvarpið,en það virðist ekki skipta máli frekar en að farið skuli að íslenskum lögum um málefni útlendinga.

Asnaspörk í málefnum íslenskra hælisleitenda hvað varðar allt of frjálslynda lagasetningu varðandi móttöku hælisleitenda, kosta skattgreiðendur árlega yfir 10 milljarða íslenskra króna. Sú fjárhæð mun hækka gríðarlega næstu árin ef ekki verður spyrnt við fótum af alefli. Næsta viðfangsefnið er að taka lög um málefni útlendinga til endurskoðunar í því skyni að gera þau skilvirkari og hafna staðfestingu á Marokkósáttmála Sameinuðu þjóðanna um málefni hælisleitenda. 

Verði það ekki gert mun þurfa tugi milljarða í framtíðinni til að mæta þörfum þeirra sem hingað vilja komi í þeim tilgangi að njóta umönnunar íslenska velferðarkerfisins. 

 

Athugasemdir

[Benedikt Halldórsson, 4.7.2019 kl. 14:45]

Viðbrögðin er fyrirsjáanleg. Einn aðili sem mótmælir eru á vegum samtaka sem George Soros stofnaði og er sjálfur í stjórn.

Það er einokun á skoðunum. Google, Tvitter Yutube og Soros og fleiri eru nánast einbráðir í að mata og móta almenning  - að gera heiminn að opnu leiksvæði. Lög og reglur einstakra ríkja er bara hindrun. Þjóðríkið er hindrun sem engin ver. Þeir sem það gera hafa ekki fjölmiðla og menninguna með sér, hvað þá að þeir séu styrktir fjárhagslega. Nei, þeir eru frekar teknir fyrir og æra þeirra fótumtroðinn öðrum til viðvörunar. Æ, færri þora að verja þjóríkið.

Með lögum skal land byggja og ólögum eyða. 

https://www.visir.is/g/2019190709659 

"Ásdís Ólafsdóttir, samskiptastjóri hjá alþjóðasamtökunum Crisis Group"

https://www.crisisgroup.org/who-we-are/board 

"George Soros Founder, Open Society Foundations and Chair, Soros Fund Management"

[Jón Magnússon, 4.7.2019 kl. 17:11]

Takk fyrir þessa góðu athugasemd Benedikt.