Fullveldi að nafninu til?

Í dag er fullveldisdagurinn. Þennan dag fyrir 102 árum öðluðust Íslendingar fullveldi. Þá lýstu Danir yfir í samningi við íslensk stjórnvöld, að Ísland væri frjálst og fullvalda ríki. 

Frá þeim tíma höfum við kosið að deila fullveldinu mismikið m.a. með samningum við aðrar þjóðir m.a. með EES samningnum auk þess,sem við höfum samþykkt að fara eftir niðurstöðu Mannréttindadómstólsins í raun. 

Í dag kvað Mannréttindadómstóllinn í Strassbourg upp þann dóm, að íslenskur ráðherra og Alþingi hefði brotið gróflega af sér við skipun dómara til Landsréttar m.a. vegna þeirrar aðferðar sem Alþingi notaði við að greiða atkvæði um skipun dómara. 

Það er dapurlegt þegar þjóð sem telur sig vera frjálsa og fullvalda telur sig þurfa að hlíta valdboði frá Strassbourg í máli, þar sem íslensk stjórnvöld fóru að öllum lýðræðislegum reglum, máli, sem fékk nákvæma skoðun og ekki var hallað neinum lýðræðislegum rétti, mannréttindum eða pólitísku öryggi borgaranna. Þá er gjörsamlega fráleitt að skipun dómaranna í Landsrétti hafi getað leitt til þess að mannréttindi annarra en þeirra sem ekki fengu skipun væri hugsanlega brotin.

Með þessum dómi reynir Mannréttindadómstóll Evrópu að taka sér vald sem er óeðlilegt þegar í raun engin mannréttindi eru brotin, þó ekki væri farið í einu og öllu að niðurstöðu valnefndar eins og hún væri staðgengill Guðs  á jörðinni. 

Þetta er enn sérstakara þegar fyrir liggur að ábyrgð á skipun dómara er hjá ráðherra og Alþingi en ekki hjá valnefndinni.

Það er sjálfsagt kominn tími til að íslenska þjóðin taki nú undir með forföður sínum Jóni Loftssyni Oddaverja og segi.

"Heyra má ég erkibiskups dóm,en ráðinn er ég í að hafa hann að engu."

Athugasemdir

[Ómar Geirsson, 1.12.2020 kl. 14:36]

Blessaður Jón.

Þú fengir núll komma núll hjá Sigurði Líndal fyrir þessa rökhugsun þín út frá þekktum staðreyndum.

"þar sem íslensk stjórnvöld fóru að öllum lýðræðislegum reglum, máli, sem fékk nákvæma skoðun og ekki var hallað neinum lýðræðislegum rétti, mannréttindum eða pólitísku öryggi borgaranna.".

Þú ert heppinn að þú ert kominn á aldur, og prófið þitt, sem og að Sigurður er allur.

Það á ekki að verja hið óverjanlega Jón.

Í þínu ungdæmi, þegar ég var í barnæsku, þá var slíkt gert á Þjóðviljanum, þegar ég eltist þá hélt jafnvel Austurland ekki út.

Þetta er arfur okkar, vanvirðum hann ekki.

Kveðja að austan.

[Jón (IP-tala skráð) 1.12.2020 kl. 16:51]

Ég geri ráð fyrir að viðbrögð þín hafi verið þau sömu þegar MDE neyddi íslensk stjórnvöld til að breyta dómskerfinu á sínum tíma vegna ómerkilegs umferðalagabrots.

Jón

[Jón Magnússon, 1.12.2020 kl. 21:48]

Ekki veit ég það svo gjörla Ómar hvernig Sigurður Líndal hefði brugðist við, en þú verður eiginelga að leita eftir áliti hans á því í andaheimunum. En í þeim tveim prófum sem ég fór í hjá Sigurði fékk ég 14. í Almennri lögfræði öðru og mig minnir 12 í réttarsögu, en þá var hæst gefið 16 og niður í mínus minnir mig 22. Mér hefur síður en svo farið aftur í lögfræðinni síðan þá Ómar. 

[Jón Magnússon, 1.12.2020 kl. 21:49]

Nei ég hafði löngu áður tekið þá ósvinnu til umræðu að sami maður sæi um lögreglurannsókn og dæmdi síðan í málinu. Það er allt annars eðlis en þetta mál Jón minn hvers son sem þú annars er. 

[Ómar Geirsson, 1.12.2020 kl. 23:32]

Ég efa það ekki Jón, góð próf fara oft saman við að vera góður lögmaður.

En þá hlýtur þú að vita að ráðherrar þurfa að fara að lögum, að ekki sé minnst á lög sem þeir sjálfir setja.

Sem og það þarf að virða niðurstöðu dómsstóla, jafnt Hæstaréttar sem og þeirra alþjóðlegu dómsstóla sem við höfum fríviljug gengist undir.

Og ekki snúa út úr ef við erum ósátt við niðurstöðuna.

Málið fyrir MDE snérist um hvort skipan dómara við Landsrétt hefði staðist lög, ekki um málsmeðferð íslenska ríkisins á viðkomandi sakamáli.

Þær sögur sem ég heyrði af Sigurði Líndali voru þær að hann var lítt gefinn fyrir útúrsnúninga í lögskýringum og ég hygg að ég þurfi ekkert að fara í andaheimi til að fá það staðfest.

Svo gleymi ég aldrei meðan ég lifi inngripi hans í ICEsave deilunni þegar almannarómur lögfræðinga hallaði á þá Stefán og Lárus.

En það er önnur saga.

Kveðja að austan.

[Grímur Kjartansson, 2.12.2020 kl. 09:30]

Ég fór á vefsíðu MDE til að reyna finna út hvernig dómstóllinn er fjármagnaður og þá í leiðinni hvernig þeir velja dómara en tókst ekki að finna neitt.  Hefði haldið að slíkir hlutir ættu að vera á forsíðu til að sýna fram á óhlutdrægni og vönduð vinnubrögð?

[Guðmundur Ásgeirsson, 3.12.2020 kl. 00:27]

"þar sem íslensk stjórnvöld fóru að öllum lýðræðislegum reglum"

ööö... nei það gerðu þau ekki og um það snýst allt málið.

Alþingi greiddi aldrei atkvæði um neina tillögu ráðherra um neinn dómara, heldur aðeins um nefndarálit, en fyrir slíkri afgreiðslu er engin heimild í stjórnarskrá eða þingsköpum.