Formaður Framsóknarflokksins á móti greiðsluaðlögun.

Það er með ólíkindum með hvaða hætti Sigmundur Davíð Gunnlaugsson formaður Framsóknarflokksins veitist að þingflokki sínum þegar hann segist mótfallinn frumvörpum ríkisstjórnarinnar um greiðsluaðlögun.

Lög um greiðsluaðlögun er eitt helsta baráttumál neytenda til margra ára hvað varðar löggjöf til hagsbóta fyrir skuldsetta einstaklinga.  Hvað rekur formann Framsóknarflokksins til að taka afstöðu gegn þessum frumvörpum einmitt á sama degi og frumvarpið um greiðsluaðlögun varðandi veðskuldir á íbúðarhúsnæði var rætt á Alþingi.

Þingflokkur Framsóknarflokksins studdi frumvörpin um greiðsluaðlögun. Svo virðist því sem formaður Framsóknarflokksins taki afstöðu gegn helstu hagsmunamálum skuldsettra einstaklinga og fjölskyldna og gegn þeirri afstöðu sem þingmenn Framsóknarflokksins hafa talað fyrir á Alþingi nú síðast varaformaður Framsóknarflokksins við umræður á Alþingi í dag.

Greiðsluaðlögun stórhættuleg ein og sér

Athugasemdir

[Helga Sigrún Harðardóttir, 8.4.2009 kl. 17:48]

Útúrsnúningar Jón og þú veist betur en þetta. Við studdum þetta frumvarp á nákvæmlega sömu forsendum og Sigmundur talar um þarna. Við höfum talað fyrir 20% leiðréttingu, eins og Sigmundur gerir, greiðsluaðlögunin er einungis hugsuð sem viðbót við hana í okkar herbúðum. Á þeim forsendum styðjum við hana en ekki sem EINA úrræðið. Nákvæmlega það sama og Birkir Jón sagði í umræðunni í dag. Það sést skýrt og greinilega að þú ert í salnum á meðan hann flutti sína ræðu. Ég geri ráð fyrir að þú hafir verið að hlusta? 

Ef það hins vegar hentar þér að fara vísvitandi með rangfærslur verður þú að eiga það við sjálfan þig og auðvitað segir meira um þig en aðra sem um ræðir í þessu samhengi. 

[Erla Einarsdóttir, 8.4.2009 kl. 18:25]

Sæll Jón. Ég vil bara aðeins leiðrétta þig, Sigmundur Davíð segist vera mótfallinn þessu frumvarpi ef það eigi að vera aðgerðir til hjálpar heimilunum eitt og sér. Það þarf miklu meira til en þetta til að koma til móts við íslenskar fjölskyldur en þetta. Persónulega segi ég að þetta frumvarp hefur nákvæmlega ekkert að segja fyrir mig og fólk í minni stöðu. Mín fjölskylda tók ekki þátt í "neyslurugli" eða neinu sem tengist svokallaðri "útrás" en er samt í erfiðleikum vegna afleiðinganna. Ég held, hvort sem það er sanngjarnt eður ei, að tillaga Framsóknarflokksins um flata 20% niðurfellingu skulda almennings sé það sem leysi vanda miklu fleiri heimila en nokkur önnur tillaga sem ég hef séð hingað til.

Kær kveðja og Gleðilega páska :c)

[Einar Skúlason (IP-tala skráð) 8.4.2009 kl. 18:52]

Jón, hann sagði að greiðsluaðlögun væri stórhættuleg ein og sér.

[Salvör Kristjana Gissurardóttir, 8.4.2009 kl. 19:19]

ekki á móti, bara ekki nóg. horfðu aftur á myndskeiðið. þú tekur ekki nógu vel eftir

[Jón Magnússon, 8.4.2009 kl. 23:23]

Ágætu Framsóknarkonur sem komið með athugasemdir og framkvæmdastjóri þingflokksins. Ég er ekki að snúa út úr. Ég hlustaði á viðtalið við formann Framsóknarflokksins og það var ekki samhljómur með því sem hann sagði og þingmennirnir um greiðsluaðlögunarfrumvörpin. Ég hélt að það væri engin ágreiningur um þau góðu mál og þannig töluðu þingmenn Framsóknarflokksins. Þess vegna komu mér þessi ummæli formannsins gjörsamlega á óvart.

[Haraldur Haraldsson, 9.4.2009 kl. 11:35]

Ég er ekki Framsóknarmaður, en útfærsla þessara svokallaðra greiðsluaðlögunar er til skammar og skil ég vel þá einstaklinga sem gagnrýna þessar tilllögur. Þarna ert þú Jón ekki að hugsa um hag almennings heldur einungis í pólitíkum áróðri. Er það þannig blogg sem við viljum frá svona skörpum manni eins og þér? 

[Jón Magnússon, 9.4.2009 kl. 18:26]

Haraldur ég er mjög ánægður með útfærsluna á greiðsluaðlögunarlögunum að öllu öðru leyti en því sem ég gerði grein fyrir í þingræðu þ.e. að lögin skuli ekki taka til þeirra sem reka eða hafa rekið atvinnustarfsemi síðustu 3 ár. Ég lagði til breytingu á því en hún náði ekki fram að ganga í Allsherjarnefnd Alþingis því miður. Að öðru leyti er ég mjög ánægður með þessa löggjöf og hef raunar barist fyrir því að lög um greiðsluaðlögun yrði sett í rúm 20 ár.

Þannig að ég er ánægður Haraldur og mér finnst það ekki sæma ábyrgum stjórnmálaleiðtoga eins og formanni Framsóknarflokksins að tala þessa löggjöf niður án þess þá að gera góða grein fyrir því hvað hann vill að komi til viðbótar eða í staðinn. Ég ber meiri virðingu fyrir Framsóknarflokknum en svo að mér finnist við hæfi að þar sé viðhaft orðagjálfur eins og ég vek athygli á hér í tveim nýlegum bloggfærslum