Úrræði eða úrræðaleysi

Ríkisstjórnin birti í vikunni aðgerðaráætlun til aðstoðar skuldsettu fólki. Athygli vekur að ekkert í aðgerðunum nýtist venjulegu  fólki sem horfir fram á vaxandi skuldabyrði og meiri greiðsluerfiðleika vegna hruns krónunnar og þar af leiðandi stökkbreytta höfuðstóla verð- og gengistryggðra lána.  

Þjóðfélagsúrræði verða að miða að því að taka á sértækum vanda venjulegs fólks vegna hruns gjaldmiðils með tilheyrandi verðbólgu sem hefur stökkbreytt höfuðstólum lána. Ekkert í nýjasta aðgerðarleysispakka ríkisstjórnarinnar sem heitir  aðgerðarpakki gerir neitt í þeim málum.  Er það furða þó fólk sé orðið uppgefið á úrræðalausri ríkisstjórn.

Áfram  skal haldið að innheimta að fullu stökkbreyttu höfuðstóla húsnæðislána svo lengi sem hægt er að kreista nokkuð blóð undan nöglum skuldara. Þegar það er ekki lengur hægt þá býður ríkisstjórnin upp á tímabundinn aðgerðarpakka við nauðungaruppboð, gjaldþrot eða greiðsluaðlögun. Skuldarar hljóta síðan að fagna því að stofna á nýtt embætti umboðsmanns skuldara þar sem einn Samfylkingarfursti í viðbót verður settur á spenann.

Aðgerðarpakki ríkisstjórnarinnar sem heitir "Umfangsmiklar aðgerðir vegna skuldavanda heimilanna" er athygliverð lesning.  Samantekt, efnisyfirlit og lýsing á því sem gert hefur verið tekur 6 blaðsíður af 12 og megin hluti þess sem síðan er talið eru hlutir sem stefnt er að því að gera einhvern tíma í framtíðinni.

Í hvert skipti sem ríkisstjórnin kynnir aðgerðir til aðstoðar skuldsettu fólki þá er ég svo einfaldur að halda að nú muni ríkisstjórnin ætla að gera eitthvað að viti en verð eilíft og ævinlega fyrir vonbrigðum við að sjá stefnu-úrræða- og getuleysi þessa fólks. 

Ríkisstjórnin þyrlar upp reykskýí  og gefur fyrirheit en þegar rykið sest þá blasir áfram við endalaus sandauðnin og tilboðið er aðeins um áframhaldandi eyðimerkurgöngu í boði ríkisstjórnarinnar. 

Upplýsingaleki?

Sigurður G. Guðjónsson hæstaréttarlögmaður heldur því fram að hann hafi séð hluta af skýrslu rannsóknarnefndar Alþingis. Þrátt fyrir allt dramað sem nefndin hefur haldið fram um leyndina og lögregluvörð við prentun skýrslunnar þá hefur fólk út í bæ eins og Sigurður G er í þessu tilviki séð nógu mikið af skýrslunni til að gera sér grein fyrir því sem máli skiptir að hans mati.

Nú er eðlilegt að rannsóknarnefndin geri grein fyrir því hvernig stóð á því að Sigurður G fékk að lesa úr skýrslunni og hvort það var með vitund og vilja rannsóknarnefndarinnar eða einstakra nefndarmanna.

Þá er líka athyglivert það sem Sigurður G segir um skýrsluna, efnistök og líkleg áhrif hennar á landsmenn.  Líklega er það rétt hjá Sigurði að tárfellingarstuðull þjóðarinnar er annar en umboðsmanns Alþingis. 

Annars eru þessi vinnubrögði rannsóknarnefndarinnar við vinnslu og birtingu skýrslunnar óeðlileg. Fyrst skýrslan er til þá á að birta hana án tafar í stað þess að fáir útvaldir eins og Sigurður G. Guðjónsson hafi aðgang að henni. Af hverju er skýrslan ekki prentuð á einum sólarhring og sett í dreifingu og birt á netinu. Hvað veldur þessum töfum?

Auðkýfinga á heimsmælikvarða eigum við enga

Enginn íslendingur er lengur á lista Forbes yfir þá í heiminum sem eiga einn milljarð Bandaríkjadala eða meira. Sú var tíðin að við áttum nokkra á þessum lista en nú er engin eftir.

Óneitanlega hef ég velt því fyrir mér hvernig á því stendur að engin Íslendingur skuli nokkru sinni hafa komist á þenan lista Forbes vegna uppfinninga eða nýunga t.d. í sjávarútvegi og fiskvinnslu. Ef til vill er það vegna þess að við höfum haldið þessari atvinnugrein of lengi í viðjum ráðstjórnar með vafasamri gengisskráningu krónunnar og kvótakerfi.

Hingað til höfum við bara átt pappírsbaróna á listanum en hvorki uppfinningamenn né dugandi rekstrarmenn framleiðslufyrirtækja. Það eru þó bara þeir síðarnefndu sem stuðla í raun að varanlegri velferð fólks, héraða og þjóða.  

Samningar

Ég hef alltaf verið talsmaður samninga um Icesave og er enn. Það er hins vegar ekki hægt að samþykkja vonda samninga og þeim var þjóðin að hafna í þjóðaratkvæðagreiðslunni á laugardaginn. Það er síðan misskilningur að okkur liggi reiðarinnar ósköp á eins og Svavar Getsson lét í veðri vaka í fyrra þegar hann þurfti að klára samningana fyrir sumarleyfi.

Nú hefur verið upplýst að áður en Steingrímur J. Sigfússon undirritaði Svavarssamninginn í sumar þá var honum ljóst að ekki var þingmeirihluti fyrir málinu en samt undirritaði hann samninginn.  Hvað gekk manninum eiginlega til? Steingrímur stóð síðan að öðrum samningi sem þjóðin hefur nú lýst andstöðu sinni við.

Getur þessi sami Steingrímur haft forustu um nýja samninga um málið?

Vissulega eigum við að standa við fjölþjóðlegar skuldbindingar okkar en hvað með að Bretar geri það lika og verði látnir svara á sama tíma fyrir aðgerðir sínar gegn Íslandi og íslenskum hagsmunum sem felldi a.m.k. tvö íslensk fjármálafyrirtæki erlendis og kostaði okkur gríðarlega fjármuni. Þarf ekki að taka tillit til þeirra hagsmuna líka í samningum við þá?

Loks verður ekki séð að það þurfi endilega að gera samninga samtímis við Hollendinga og Breta eða á sömu forsendum. Af hverju ekki einbeita sér að Hollendingum?

Til hamingju Ísland

Til hamingju kæru landsmenn. Um 98% þeirra sem afstöðu taka í þjóðaratkvæðagreiðslunni sögðu nei. Yfirgnæfandi meiri hluti hafnaði  samningum Steingríms og Jóhönnu.

Þrátt fyrir að þjóðin hafi talað með afgerandi hætti þá láta Steingrímur og Jóhanna eins og ekkert hafi í skorist.  Það er rangt.  Bæði reyndu þau að fá fólk til að mæta ekki á kjörstað og hvorugt þeirra kaus. Í annan stað voru lögin sem þau þvinguðu í gegn um Alþingi kolfelld af þjóðinni.

Vandamálin sem hafa skapast í kring um þetta mál eru fyrst og fremst á ábyrgð Steingríms J. Sigfússonar sem tók málið strax eftir kosningar úr  farvegi og setti það í flokkspólitíska forsjá vina og vopnabræðra þeirra Svavars Gestssonar og Indriða Þorlákssonar.

Hvaða rökræn glóra er í því, að fjármálaráðherra sem hefur sett mál í þann farveg sem þjóðin hafnar með svo afgerandi hætti, sitji áfram sem ráðherra?  Í öðrum lýðræðisríkjum mundi Steingrímur J. Sigfússon biðjast lausnar fyrir hádegi á mánudaginn og axla þar með pólitíska ábyrgð á Icesave samningsklúðrinu sem hann ber ábyrgð á.

Nei

Nú skiptir máli að sem flestir mæti á kjörstað og sýni samstöðu þjóðarinnar um að hafna ólögum.

Við skulum sýna með ótvíræðum hætti hver er vilji íslensku þjóðarinnar. Látum ekki Steingrím og Jóhönnu villa okkur sýn þegar þau halda því fram að það skipti engu máli hvernig þjóðaratkvæða- greiðslan fari. Hún skiptir miklu máli.

Í fyrsta lagi skiptir hún máli til að sýna heiminum fram á samstöðu þjóðarinnar gegn erlendu valdi.

Í öðru lagi skiptir hún máli til að sýna fram á að þjóðin sættir sig ekki við ólögin ríkisstjórnarinnar.

Í þriðja lagi til að nýta mannréttindi frjálsborins fólks í lýðræðisríki.

Mætum öll  og kjósum  með frelsi gegn helsi.

Við segjum NEI.

Forsætisráðherra, lýðræðið og þjóðin

Forsætisráðherra lýsti því yfir í gær að hún ætlaði ekki að nýta lýðræðisleg réttindi sín og kjósa í þjóðaratkvæðagreiðslunni um Icesave. Forsætisráðhera ætlar að sitja heima og fara hvergi á kjörstað. Með því gefur forsætisráðherra ákveðin skilaboð til þjóðarinnar. Hún er á móti þjóðaratkvæðagreiðslu um málið og getur ekki mætt á kjörstað til að nýta sér þá þrjá valkosti sem eru í boði. Það að segja já, nei eða sitja hjá.

Staðreyndin er raunar sú að forsætisráðherra og fjármálaráðherra börðust fyrir samþykki þeirra laga sem nú verða borin undir þjóðaratkvæði og sögðu ítrekaða í þringræðum að mikilvægt væri að samþykkja lögin. Nú þegar lögin eru borin undir þjóðina þá treystir forsætisráðherra sér ekki til að kjósa með sínum eigin lögum og óvíst hvort fjármálaráðherra gerir það. ´

Hvað hefur breyst? Gilda ekki sömu rök og sjónarmið núna og í desember s.l. þegar ríkisstjórnin fékk þingmeirihluta sinn og Þráinn Bertelsson sérstakan sérfræðing um andlegt hæfi þjóðarinnar til að greiða atkvæði með lögunum? Af hverju þorir þetta fólk ekki að standa við eigin gerðir lengur?

Miðað við yfirlýsingu forsætisráðherra og tvíátta yfirlýsingar fjármálaráðherra að teknu tilliti til þess sem gerðist við umræður um málið í kjölfar neitunar forseta á því að samþykkja lögin þá verður ekki hjá því komist að líta á það sem vantraust á verk ríkisstjórnarinnar í Icesave málinu segi meiri hluti þjóðarinnar nei í kosninguum á morgun.

Nú er þjóðinni gefin kostur á beinu milliliðalausu lýðræði og að sjálfsögðu á þjóðin að notfæra sér þau lýðréttindi og mæta á kjörstað og kjósa samkvæmt sannfæringu sinni. Leyfum forsætisráðherra og öðrum sem vilja ekki að þjóðin njóti beins og milliliðalauss lýðræðis þegar þeir ráða að sitja heima. Yfirlýsing Jóhönnu um að neita sér um að nýta lýðréttindi sín eru sennilega einsdæmi um forsætisráherra í lýðfrjálsu landi.

Hrun VBS á ábyrgð Steingríms fjármálaráðherra?

  Fyrir ári síðan tók fjármálaráðherra með blessun ríkisstjórnarinnar þá geðþóttaákvörðun að veita VBS fjárfestingafélagi og Saga Capital tuga milljarða lán úr ríkissjóði. Þetta var eftir bankahrun og allar kennitölur í rekstri fyrirtækjanna ljósar þegar ákvörðunin  um að  veita tugum milljarða af almannafé til fyrirtækjanna.  Um var að ræða fjármálafyrirtæki sem skiptu engu máli varðandi fjármálastarfsemina almennt í landinu. Samt sem áður veitti Steingrímur þeim tuga milljarða fyrirgreiðslu á niðurgreiddum vöxtum allt í boði skattgreiðenda.

Nú er rekstur VBS kominn í þrot þrátt fyrir að hafa fengið 26 milljarða vildarlán frá Steingrími J. fyrir ári síðan.  

Hremmingar VBS er ekki eftirskjálfti af bankahruninu eins og forstjóri Fjármálaeftirlitsins heldur fram. Þetta er allt annað og sjálfstætt mál og allar niðurstöður varðandi VBS lágu fyrir þegar Steingrímur J. ákvað að veita þeim 26 milljarða lán á Bónus vöxtum frá skattgreiðendum.

Ætlar Steingrímur J að axla ábyrgð af því að hafa misfarið með almannafé? 

Hefur Steingrímur J. þá afsökun að honum hafi verið veittar rangar upplýsingar. Var e.t.v ekki gætt nægjanlega að framvindu mála og starfsemi VBS eftir lánveitingu Steingríms? Hverjir eru það þá sem eiga að axla ábyrgð efþað er ekki Steingrímur J? 

Eðlilegt er að fram fari opinber rannsókn á þessum milljarðafyrirgreiðslum Steingríms J. og með hvaða hætti staðið var að málum það eina ár sem tók síðan að stýra fyrirtækinu í þrot. Rannsóknarskýrsla gæti verið tilbúin 1. maí á hátíðisdegi verkalýðsins til upplýsingar um það með hvaða hætti fjármálaráðherra "fólksins" misfer með fjármuni alþýðunnar í þeirri viðleitni sinni að standa við bakið á þeim kapítalistum sem honum eru hugnanlegir.