Ríkisstjórnin fallin.

Það eru stórtíðindi þegar slitnar upp úr ríkisstjórnarsamstarfi eftir samfellda 12 ára samstarf. Sjálfstæðisflokkurinn á þá kost á að mynda ríkisstjórn til vinstri með Samfylkingunni og langt til vinstri með Vinstri grænum eða mynda Frjálslynda umbótastjórn með Frjálslynda flokknum hugsanlega þannig að Framsóknarflokkurinn mundi verja þá ríkisstjórn eða koma að þeirri ríkisstjórn. En valið er alfarið Geirs Haarde eins og staðan er í dag og fróðlegt að sjá hvað kemur upp úr þeim hatti. 

Það er frumskylda stjórnmálamanna að mynda starfhæfa ríkisstjórn sem fyrst. Nútíma þjóðfélag þolir illa að vera með starfsstjórn til lengdar. Sá sem fær umboð forseta væntanlega Geir Haarde ber því mikla ábyrgð á því að unnið sé hratt og allir möguleikar séu skoðaðir.

Ekki grundvöllur fyrir áframhaldandi samstarfi stjórnarflokkanna

Það verður að tryggja öryggi lögreglumanna

Það verður að tryggja öryggi lögreglumanna betur en nú er gert. Refsingar við árásum á lögreglumenn verður að þyngja og þær á aldrei að binda skilorði.

Um 70% lögreglumanna hefur verið hótað á síðustu fimm árum

Nú er mál að linni.

Þessar raðkannanir Capacent Gallup eru svo ónákvæmar að þær gefa mjög takmarkaðar vísbendingar. Sveiflurnar á fylgi flokkana sýnir það. Dagsveiflan í fylgi er ekki sú sem að Þessar skoðanakannanir eru að mæla.  Öllum sem fylgjast með stjórnmálum er því ljóst að þessar kannanir eru ónákvæmar og  að því er mér virðist rangar.  Nú eru rúmir tveir dagar þangað til kjörfundur byrjar. Væri ekki gott fyrir kjósendur að fá að hugsa mál sín í friði fram að kosningum í stað þess að vera með rangar ávirkar skoanakannanir. 

Fylgi Framsóknarflokksins tekur stökk

Þarf Wolfowitz að taka pokann sinn.

Sennilega þarf Wolfowitz að hætta sem bankastjóri Alþjóðabankans af því að hann notaði eða misnotaði aðstöðu sína til að rugla biðröðinni fyrir ástkonu sína. Vel kann að vera að þessi kona sé yndisleg og væn kona og duglegur starfsmaður og vel að þessu komin. Það er hins vegar ekki það sem málið snýst um heldur það að bankastjórinn misnotaði aðstöðu sína. Málið snýst ekkert um konuna eða hæfi hennar heldur misnotkun á aðstöðu.

Með sama hætti þá snýst málið hvað ríkisborgararétt tengdadóttur Jónínu Bjartmars umhverfisráðherra ekki um tengdadótturina að neinu leyti heldur um misnotkun á aðstöðu. Ráðandi aðilar í landinu hafa reynt að afflytja þetta mál og vekja upp meðaumkun með stúlkunni. En málið snýst ekki um hana heldur afskipti ráðherrans. Spurningin er ruglaði ráðherrann biðröðinni. Sé svo á þá ekki að gilda það sama um ráðherrann og bankastjóra Alþjóðabankans? 

Wolfowitz sagður hafa brotið starfsreglur

Best að vera móðir á Íslandi

Að sjálfsögðu er og á að vera best að vera móðir á Íslandi. Við erum ríkasta þjóð í heimi og höfum gert vel við unga foreldra. Það er líka best að vera faðir á Íslandi. Þjóðfélagið hefur lagt áherslu á að gera vel við foreldra og þannig á það að vera. Við verðum hins vegar að endurskoða fæðingarorlofslögin með tilliti til jafnaðar í þjóðfélaginu og mismuna ekki borgurnum.

Best að vera móðir í Svíþjóð og á Íslandi

Takmarkað upplýsingagildi skoðanakönnunar?

Svona skömmu fyrir kosningar gefur skoðanakönnun eins og þessi takmarkaðar upplýsingar. Það ber þó að nefna að það sem skoðanakannanir mæla best er hvort flokkur er á upp- eða niðurleið. Samkvæmt því eru þrír flokkar á uppleið samkvæmt skoðanakönnunninni Frjálslyndir, Sjálfstæðisflokkurinn og Samfylkingin. Framsóknarflokkurinn tapar enn fylgi og sama er um Íslandshreyfinguna. Að þessu leyti getur skoðanakönnunin gefið vísbendingar.

Ánægjulegu tíðindin fyrir okkur Frjálslynd er að við erum á uppleið og það er í samræmi við það sem við höfum fundið undanfarna daga. Fólk hefur streymt til okkar og sjálfboðaliðum okkar er vel tekið. Vonandi skilur þjóðin nú sínn vitjunartíma, fellir ríkisstjórnina og kýs með þeim hætti að mögulegt verði að mynda Frjálslynda umbótastjórn.

Samfylking og Sjálfstæðisflokkur bæta við sig fylgi

Var kveikt í?

Hafi verið kveikt í gám við Valhöll hús Sjálfstæðisflokksins þá er það fordæmanlegt.  Brotnar hafa verið rúður á skrifstofum Frjálslynda flokksins í Aðalstræti og sjálfur varð ég fyrir því að hent var grænni snöru inn í garðinn heima hjá mér. Svona atvik eru slæm og fordæmanleg. Virðing fyrir skoðunum annarra er grundvöllur menningarsamfélags og virks lýðræðis.

Allir stjórnmálaflokkar verða að taka höndum saman um að vinna gegn fordómum og neikvæðri andfélagslegri hegðun gagnvart andstæðingum sínum.

Eldur í gámi við Valhöll

Sterkur forseti.

Nicolas Sarkozy gefur vonir um kærkomnar breytingar í frönskum stjórnmálum. Sitjandi forseti hefur setið of lengi og er dæmi um hvað þráseta getur verið skaðleg í stjórnmálum. Kyrrstaða og úrræðaleysi einkennir jafnan stjórnmálamenn og stjórnmálaöfl sem sitja of lengi sbr. Sjálfstæðisflokkinn og Framsóknarflokkinn hér.

Nicolas Sarkozy er á móti því að Tyrkir verði aðilar að Evrópusambandinu. Ég er sammála honum. Þeir eiga ekki erindi í Evrópusambandið. Hann leggur áherslu á að ná góðu sambandi við Bandaríkjamenn. Sérstaða Frakka í NATO og gagnvart Bandaríkjunum ætti því brátt að heyra sögunni til. Það er gott að nú skuli vera í forustu í þrem öflugustu ríkjum Evrópu, Bretlandi. Þýskalandi og Frakklandi fólk sem skilur mikilvægi góðra samskipta Evrópu og Bandaríkjanna.

Sarkozy lýsir yfir sigri í Frakklandi

Pólitísk misnotkun

 

Þessi samningur er dæmi um misnotkun ríkisstjórnarinnar á fé skattborgarana í kosningabaráttu. Engin heimild er í fjárlögum fyrir þessu. Af hverju er verið að gera þetta núna.

Hvernig stendur á því að það eru allt í einu til peningar til ýmissa góðra mála sem ríkisstjórnin hefur ekki sinnt og ekki sinnt að leggja til við Alþingi að fjárveitingar yrðu lagðar til þessara mála.

Núna í kosningabaráttunni er gengið frá samningum og peningum ausið út í því skyni að slá ryki í augu á fólki og kreista út atkvæði til handa stjórnarflokkunum.

 Spilling? Er ekki ástæða til að gera úttekt á fjárveitingum ríkisstjórnarinnar og ráðherra í kosningabaráttunni?

Samið um tannlæknaþjónustu og forvarnarskoðanir 3 og 12 ára barna

Ekkert augljóst jafnvægi í nánd í hagkerfinu.

Mat hagdeildar ASÍ er að ekkert augljóst jafnvægi sé í nánd  í hagkerfinu. Þá er komist að þeirri niðurstöðu að vextir verði áfram háir og einnig verðbólga. Þá kemst hagdeildin að þeirri niðurstöðu að ekki verði séð að viðskiptahallinn verði viðráðanlegur í náinni framtíð.

Þetta mat hagdeildar ASÍ er alvarlegt. Greinilega eru mikil vandkvæði í hagkerfinu. Hvergi má út af bregða til að ekki fari illa. Ríkisstjórnin hefur í svo mörgum efnum strengt bogann til hins ítrasta. Svo mjög að hann er við það að bresta.

Einar Þambaskelfir á að hafa sagt þegar boginn hans var höggvin í tvennt og Ólafur konungur Tryggvason spurði hvað brast svo hátt "Noregur úr hendi þinni konungur"  Kjósendurn verða að átta sig á að stefnan sem ríkisstjórnin fylgir er að stjórna frá degi til dags í þeirri von að allt fari vel.  Þannig er ekki hægt að reka efnahagskerfi endalaust. Við verðum að fá ábyrga ríkisstjórn sem gætir aðhalds í ríkisbúskapnum, lækkar ríkisútgjöld og skatta.  Ná verður niður verðbólgunni og taka upp aðra viðmiðun varðandi gjaldmiðilinn til að draga úr viðskiptahallanum.

Ný ábyrg ríkisstjórn verður að taka við.

ASÍ gerir ekki ráð fyrir harðri lendingu hagkerfisins