Af hverju Rússland en ekki Tyrkland?

Af hverju fordæma Bandaríkjamenn og Evrópusambandið ekki aðför Erdogans forsætisráðherra að lýðræðinu í Tyrklandi. Erdogan hefur látið fangelsa stóran hóp blaða- og fréttamanna, dómara, saksóknara og rannsóknarlögreglumanna til að koma í veg fyrir umfjöllun og rannsókn á spillingarmálum forsætisráðherrans og aðilum honum tengdum.

Af hverju fordæma Bandaríkjamenn og Evrópusambandið ekki Tyrkland fyrir að hafa stuðlað að uppreisn í Sýrlandi og stuðla að áframhaldi ófriðarins o...g hörmunga sýrlensku þjóðarinnar

Af hverju er ekki beitt refsiaðgerðum gegn Tyrklandi og tyrkneskum embættismönnum fyrir mannréttindabrot, ásælni gagnvart nágrannaríkjum og hernðaraðgerðum þar?

Af hverju telur Evrópusambandið rétt að fá Tyrki í Evrópusambandið en útiloka Rússa?

Óneitanlega virðist heimssýn forustufólks í Bandaríkjunum og Evrópusambandinu ekki hafa þróast mikið síðan í kaldastríðinu.

Svo kemur þessi Guðs volaði Gunnar Bragi Sveinsson utanríkisráðherra og fetar dyggilega í slóð Evrópusambandsins og Bandaríkjanna og styður hefndaraðgerðir gegn vinaþjóð. Má ég þó af tvennu :::::: biðja um Ólaf Ragnar.

Heróín og stríð í Afganistan

Þegar Tony Blair þáverandi forsætisráðherra Bretlands reyndi að réttlæta innrás í Afganistan árið 2001  sagði hann mestu skipta að með því mætti draga úr heróínframleiðslu og viðskiptum.  Raunar höfðu Talíbanarnir sem þá stjórnuðu landinu hafið þá vinnu og náð þeim árangri að framleiðslan var aðeins 1% af því sem hún hafði áður verið.

Eftir 12 ára stríð Bretlands, Bandaríkjanna og NATO í Afganistan slær heróínframleiðslan og viðskiptin öll fyrri met. Ræktun jókst um 36% árið 2013 og Afganistan framleiðir nú yfir 90% af öllu heróíni skv. skýrslu þar til bærrar nefndar Sameinuðu þjóðanna.

Vesturveldin hafa því líka tapað eiturlyfjastríðinu í Afganistan. Tony Blair og öðrum mátti vera ljóst áður en herhlaupið til Afganistan hófst, að við erum aldrei tilbúin til að beita jafnhörkulegum meðulum til að uppræta andþjóðfélagslega starfsemi og Talibanar.  Þetta yfirvarp Blair var fölsk ástæða til að réttlæta innrás.  Hvernig svo sem litið er á þetta herhlaup til Afganistan þá er það algjör mistök og billjónum bandaríkjadala og þúsundum mannslífa hefur verið fórnað. 

Atlantshafsbandalagið (NATO) breytti um ásýnd og tilveru með því að taka þátt í árásarstríði á Afganistan hversu réttlátt eða óréttlátt sem stríðið að öðru leyti kann að vera. Með því að taka þátt í stríðinu í Afganistan og árásum á Serba á sínum tíma þá breytti NATO um eðli úr varnarbandalagi í árásarbandalag þegar það á við. 

NATO ríkin þurfa að endurskoða tilgang og tilveru bandalagsins. NATO var mikilvægasta friðarbandalag heims á tímum kalda stríðsins í anda þeirrar aldagömlu rómversku speki að vopnin verja friðinn (arma tuendum pace) En vopnin verja ekki friðinn þegar þeim er beitt til árása. Endurskoða þarf NATO sáttmálann og setja skýr ákvæði og ótvíræð sem ekki verði vikið frá að NATO er varnarbandalag og því verði ekki beitt og hernaðarmætti þess með öðrum hætti.  

Evrópusambandið og kosningar um aðildarviðræður

Áhugi fyrir aðild að Evrópusambandinu er innan flestra stjórnmálaflokka. Samfylkingin hefur gert málið flokkspólitískt. Ríkisstjórn Jóhönnu Sigurðardóttur samþykkti að hefja viðræður um aðild Íslands að Evrópusambandinu í andstöðu við annan stjórnarflokkinn. Samfylkingin rak málið á flokkspólitískum grunni og skipaði samninganefnd eftir eigin höfði án samráðs við önnur pólitísk öfl í landinu. Þessi framganga Samfylkingarinnar skaðaði vitrænar umræður um aðild Íslands að Evrópusambandinu og olli málstað þeirra sem vilja aðild miklu tjóni.

Þau tæpu 4 ár sem aðildarviðræður hafa staðið að undirlagi Samfylkingarinnar hefur ekkert verið gert eða rætt sem máli skiptir. Umræðuferlið hefur verið alvörulaus kampavíns og matarboðsvettvangur.

Stefna ríkisstjórnarflokkana nú er ljós. Flokkarnir vilja ekki aðild. Þjóna aðildarviðræður tilgangi þegar ríkisstjórn er á móti aðild? Slíkt væri niðurlægjandi fyrir ríkisstjórn og samningsaðila. Sama var raunar um að ræða þegar fyrir lá í síðustu ríkisstjórn að annar stjórnarflokkurinn var alfarið á móti aðild.

Nú hamast stjórnarandstæðingar að því að þjóðaratkvæðagreiðsla fari fram um aðildarviðræður og vísa til stefnu Sjálfstæðisflokksins um að þjóðin fengi að greiða atkvæði áður en aðildarviðræður hæfust. Nú þegar afstaða ríkisstjórnarinnar liggur fyrir þá þjónar litlum tilgangi að greiða atkvæði um áframhald viðræðna. Væru þær samþykktar þá færu þær fram í andstöðu við vilja ríkisstjórnar og skiluðu engu en væru þær felldar þá er staðan óbreytt. Til hvers þá að kjósa?

Hvort sem Evrópusambandssinnum eða andstæðingum líkar betur eða verr þá verður alltaf að taka tillit til pólitísks veruleika. Í dag er hann sá að það þjónar ekki tilgangi að halda sýndarviðræðum um aðild að Evrópusambandinu áfram hvort sem mér eða öðrum landsmönnum líkar betur eða verr.

Spygate

Leyniþjónusta Sovétríkjanna KGB var umtöluð á sínum tíma fyrir að setja hljóðnema út um allt, en jafnvel þó allt það sem um þá leyniþjónustu var sagt hefði veri rétt, þá jafnast það ekki á við þær ofurnjósnir sem ríkisstjórn Bandaríkjanna stendur fyrir. 

Síðustu daga haf borist upplýsingar um að ríkisstjórn Obama hafi víðtækt njósnanet hjá þeim þjóðum sem þeim eru vinnveittust.  Fylgst er með því sem kemur frá ríkisstjórnum í Evrópu og Evrópusambandinu sem og tölvupóstsamskiptum stjórnmála- og embættismanna. Fyrst svona víðtækt njósnanet hjá helstu vinaþjóðum Bandaríkjanna er talið nauðsynlegt af Obama forseta til að tryggja öryggi Bandaríkjanna, hvað þá um ríki sem eru Bandríkjunum óvinveitt.

Þessar víðtæku njósnir Bandaríkjanna eru óafsakanlegar.  Bandaríkin hafa misst bæði traust og álit og þa verður erfitt að endurvinna það. Einhverjir verða að bera ábyrgð á þessum mannréttindabrotum og liggur þá beinast við að þeir sem halda um taumanna á þeim stofnunum sem þessar njósnir stunda segi af sér. Þá verður heldur ekki hjá því komist að Barrack Obama verði að axla ábyrg með sama hætti og Richard Nixon gerði á sínum tíma og segi af sér. 

Þessar njósnir eru það víðtækar og hafa staðið það lengi að það er útilokað að þær hafi verið skipulagðar og stundaðar án vitundar og beinna fyrirmæla frá sjálfum Bandaríkjaforseta.  

Sú var tíðin að forstöðumaður CIA í Mið-Austurlöndum skrifaði um að njósnakerfi Bandaríkjanna þar væri í molum og hann hætti og skrifaði bókina "Sleeping with the Devil." sem fjallar um samskipti Bandaríkjanna og Saudi Arabiu. Merk lesning sem sýnir að því miður er langt síðan Bandaríkin fóru hugmyndafræðilega út af sporinu.

En með spygate er gengið út yfir öll mörk í samskiptum þjóða og Bandaríkin verða að endurvinna traust með því að viðurkenna og samþykkja að þeir lúti sömu lögmálum og aðrar þjoðir og  þeir sem ábyrgð bera á þessari njósnastarfsemi segi af sér.

Dýr mundi Steingrímur allur

Nú liggur fyrir að ákvarðanir Steingríms J. Sigfússonar varðandi sparisjóðinn í Keflavík mun kosta skattgreiðendur 25 milljarða króna.  Tap af aðgerðum Steingríms vegna Sjóvá-Almennar tryggingar kostar 4 milljarða og Byr-ákvarðanir Steingríms kosta a.m.k.  100 milljónir. 

Þessu til viðbótar fengu VBS, Saga Capital og Askar Capital  52 milljarða frá Steingrími þegar hann lánaði þessum félögum þá fjárhæð.  Í ákvörðun eftirlitsstofnunar EFTA kemur fram hvað VBS og Saga Capital mátu þennan ríkisstuðning til margra milljarða þannig að það þarf enginn að velkjast í vafa um það.

Beint tap ríkisins vegna Steingríms er hátt í 80 milljarðar króna. 

Þá er ótalið mögulegt tjón vegna gengisákvæða í uppgjörssamningum Landsbankans. Undirverðlagning við sölu bankanna til kröfuhafa (vogunarsjóða). 

Sem betur fer tókst Steingrími ekki að koma 500 milljarða Icesave kröfunni til viðbótar á þjóðina eins og hann lagði til eftir sumarsamninga flokksbróður hans Svavars Gestssonar, sem sá enga ástæðu til að gæta hagsmuna íslensku þjóðarinnar af því að það var komið sumar. 

Til hamingju Ísland.

Við getum vissulega óskað hvort öðru til hamingju íslendingar vegna sigurs í ICESAVE málinu. 

Það eru einkum tveir menn sem öðrum fremur komu fram með þeim hætti að Ísland samdi ekki af sér með því að samþykkja ICESAVE samninga ríkisstjórnarinnar, Davíð Oddsson ritstjóri Morgunblaðsins og Ólafur Ragnar Grímsson forseti lýðveldisins.

Allt frá upphafi var Davíð Oddsson sannfærður um það að Íslandi bæri ekki að greiða vegna ICESAVE og fór hamförum gegn samningum ríkisstjórnarinnar svo sem honum einum er lagið. Með skrifum sínum og andstöðu hafði Davíð þau áhrif að mikill meiri hluti þjóðarinnar snérist gegn samningum ríkisstjórnarinnar. Ólafur Ragnar Grímsson neitaði ítrekað að samþykkja vilja merihluta Alþingis. Sú afstaða forsetans hefur nú fengið verðskuldaða réttlætingu með dómi EFTA dómstólsins.

Dómur EFTA dómstólsins leiðir til þess að við losnum undan milljarðasúpunni sem ríkisstjórnin vildi að við greiddum. Þó þeir Davíð og Ólafur hafi orðið merkisberar baráttunnar gegn því hryðjuverki sem ríkisstjórnin vildi vinna þjóðinni þá eiga ýmsir aðrir einnig mikinn heiður skilið og skal hér látið nægja að minnast á framlag þeirra Stefáns Más fyrrum prófessors og Lárusar Blöndal lögmanns sem og Indefense hópsins.

Eftir stendur að ríkisstjórn Íslands og meirihluti Alþingis getur ekki hlaupist undan því að hafa viljað leggja óbærilegan skuldaklafa á íslensku þjóðina, sem framsýnir og glöggir menn eins og Davíð Oddsson og Ólafur Ragnar Grímsson gátu með hörku og einbeitni komið í veg fyrir.

Er ekki rétt að þau Jóhanna Sigurðardóttir og Steingrímur J. Sigfússon axli ábyrgð og segi af sér ekki síðar en þegar í stað?

Ólafur Ragnar fordæmir Níðhögg

Níðhöggur var ormurinn nefndur sem nagaði rætur Yggdrasils, lífsins tré í Ásatrú.

Gordon Brown var  Níðhöggur þegar hann vó að fullveldi og afkomu Íslands í kjölfar bankahrunsins. Ólafur Ragnar Grímsson Forseti lýðveldisins á þakkir skildar fyrir að fordæma Níðhögginn Gordon Brown. Slík fordæming hefði átt að koma strax og Bretar beittu hryðjuverkalögum gagnvart Íslandi.

Við Guðni Ágústsson höfum nýlega vakið á því athygli í tveim greinum í Morgunblaðinu, að Bretar beittu hryðjuverkalögunum án þess að hafa nokkrar forsendur til þess og hafa aldrei getað komið með réttlætingu á þeirri aðför að frjálsu fullvalda bandalagsríki. Við vöktum líka athygli á nauðsyn þess að slíta stjórnmálasambandi við Breta í kjölfar þessarar aðfarar og taka málið upp á vettvangi NATO og Sameinuðu þjóðanna og gera bótakröfu á hendur Bretum fyrir þessa tilhæfulausu aðför að Íslandi.

Nú hefur Forseti lýðveldisins réttilega vakið athygli á ábyrgð Gordon Brown og á hann miklar þakkir skildar fyrir að gera það að þessu ómenni viðstöddu. Í kjölfar réttmætrar og skörulegrar málafylgju Forsetans ber þinginu að samþykkja að krefjast réttmætra bóta vegna þess níðhöggsins sem Níðhöggur Brown og félagar hans beittu Ísland þegar verst stóð á.

Þorvaldur í framboð fyrir Dögun

Ég hef það frá þrem heimildarmönnum sem ég tel áreiðanlega að Þorvaldur Gylfason ætli í framboð fyrir Dögun.  Aðrir öfgafyllstu stjórnlagaráðsmennirnir munu einnig ætla að munstra sig í áhöfnina.

Það er því ljóst að það fjarar hratt undan Jóhönnu Sigurðardóttur forsætisráðherra, sem hefur gengið erinda þessa fólks af ótta við að það mundi annars valda usla fyrir Samfylkinguna í næstu kosningum. 

 Þá er spurning hvort að bestu menn Samfylkingarinnar taki ekki völdin af Jóhönnu og leiti samninga við stjórnarandstöðuna um þær breytingar  á stjórnarskrá sem samkomulag ætti að nást um t.d. auðlindaákvæði, þjóðaratkvæðagreiðslur og valdsvið forseta lýðveldisins.Tillögum stjórnlagaráðs yrði síðan sturtað niður eins og vera ber við vandað löggjafarstarf.

Þorvaldur er öfgafullur Evrópusinni vill leggja landbúnaðarkerfið niður. Meðframbjóðendur hans í Dögun,  Guðjón Arnar, Þór Saari og Gísli Tryggvason eru eindregið á móti þessu og Pétur Gunnlaugsson útvarpsmaður fjandskapast út í allt og alla sérstaklega Evrópusambandið.  Flottur málefnagrundvöllur?  

Kjósendur geta þá séð hilla undir Dögun nýrrar ósamstöðu fari svo ólíklega að þessi söfnuður nái Þorvaldi á þing.

Velsæld er vond

Umhverfisráðherra var í hópi 17.000 opinberra starfsmanna á loftslagsráðstefnunni í furstadæminu Qatar, þar sem samþykktar voru aðgerðir sem fela í sér nýja skatta og takmarka framkvæmdir. Að vísu ná samþykktir ráðstefnunar aðeins til 15% af heildarlosun gróðurhúsalofttegunda í heiminum skv. upplýsingum ráðherrans í morgunútvarpinu.

Í viðtalinu sagði upptendraði umhverfisráðherrann í tengslum við þessa loftslagsráðstefnu,  að hún hefði móast gegn nýrri stóriðju í landinu. Atvinnulausir landsmenn hljóta að færa ráðherranum sérstakar þakkir fyrir það.

Einnig sagði ráðherrann gott að útblástur gróðurhúsalofttegunda hefði minnkað í kreppunni. Var á henni að skilja að það væri hið besta mál og við ættum að keppa að því að vera í viðvarandi kreppu. Þannig verður það raunar ef fólk eins og Svandís Svavarsdóttir halda áfram að stjórna landinu.

Athyglisvert var að heyra  frá umhverfisráðherranum að við heyrum undir lögsögu Evrópusambandsins í loftslagsmálum, en þar er rekin vitlausasta stefna sem um getur í þessum málaflokki. Ráðherrann sagði að losun í stóriðju og flugi væri alfarið á valdi Evrópusambandsins fyrir Ísland.

Evrópusambandið er eini hópur iðnríkja sem hafa með ákvörðunum sínum á ráðstefnunni í Qatar dæmt íbúa sína til að þola samdrátt og lakari lífskjör vegna pólitísku veðurfræðinnar. Einnig að dragast aftur úr öðrum þjóðum í iðnaði og annarri framleiðslu. Það er eðlilegt að ráðherra Vinstri grænna fagni að vera í þeim hópi.

Hvaða gjaldmiðill?

Steingrímur J. Sigfússon hefur sagt að íslenska krónan reynist okkur vel og á honum er að skilja að hún sé besti gjaldmiðill í heimi. Um hvaða krónu er hann  að tala?

Er hann að tala um krónuna sem notuð er til að borga fyrir vörur og þjónustu sem sveiflast upp og niður þrátt fyrir gjaldeyrishöf. Lækkaði t.d. um rúm 7% í síðasta mánuði gagnvart Evru og Dollar.

Eða verðtryggðu krónuna sem étur upp eignir alþýðufólks?  Verðtryggð lán eru verstu neytendalán í okkar heimshluta. Verðtryggða krónan stenst ekki reglur um lánasamninga til neytenda að Evrópurétti. 

Eða innflutningskrónu Más Seðlabankastjóra, sem gefur forréttindaaðlinum kost á að koma með gjaldeyri og breyta í íslenskar krónur á yfirverði?  Þannig verða hundrað milljónir að hundrað og tuttugu. Hækkun við landtöku. Flott kerfi fyrir forréttindaaðalinn og þá sem geta stöðugt látið peningana hringsóla og fá 20% álag í hvert skipti.

Hvernig ætla menn að reka réttlátt og sanngjarnt þjóðfélag með svona kerfi?  

Var furða að spænski doktorinn í Evrópurétti spyrði hvers vegna fólk gerði ekki byltingu í landinu.