Koma verður í veg fyrir mannsal og misnotkun á fólki.

Það eru rúm 200 ár síðan Bretar og Danir samþykktu lög sem bönnuðu þrælasölu. Samt sem áður les maður um að viðskipti með fólk hafi aldrei verið meiri en einmitt núna. Í Bandríkjunum og Evrópu eru ungar konur m.a. hnepptar í kynlífsþrælkun. Gegn þessu verður að vinna með öllum ráðum.

Ég hef sett fram þá hugmynd að við legðum til að sett yrði á fót sérstök samevrópsk lögregludeild.  Sem hefði það sérstaka verkefni að uppræta mannsal í hvaða formi sem það væri og vinna að því að koma í veg fyrir því að frelsi fólks væri af því tekið. Þetta er ósómi sem verður að vinna gegn. Hvort heldur mannsal viðgengst á Íslandi eða ekki þá eigum við að taka forustu um að koma þessum ófögnuði út í ystu myrkur.

 

Rannsaka þarf hvort mansal teygi anga sína hingað

Bjarni Benediktsson gerðu grein fyrir málinu.

Bjarni Benediktsson er eitt glæsilegasta foringjaefni Sjálfstæðisflokksins. Ég hef bundið miklar vonir við hann sem framtíðarleiðtoga í íslenskum stjórnmálum. Björn Bjarnason frændi hans er besti fagráðherra síðari ára og að mínu mati með heiðarlegustu stjórnmálamönnum landsins.

Það eru meiri kröfur gerðar til þeirra sem miklar væntingar eru bundnar við. Þess vegna skiptir máli nú fyrir Bjarna Benediktsson að hann komi fram og geri heiðarlega grein fyrir afgreiðslu 3 manna nefndar Alsherjarnefndar Alþingis á máli tengdadóttur Jónínu Bjartmars. Hver fór fram á afgreiðslu nefndarinnar? Hvaða atriði skoðaði nefndin? Hvað réðí því að nefndin lagði til að stúlkan fengi ríkisborgararétt? Var Sigurjóni Þórðarsyni sem situr í Alsherjarnefnd gerð grein fyrir málinu? Var Kolbrúnu Halldórsdóttur sem er áheyrnarfulltrú í Alsherjarnefnd gerð grein fyrir málinu?

Þessar skýringar verður Bjarni að gefa strax undanbragðalaust. Góður maður eins og Bjarni Benediktsson á ekki að láta svona mál flækjast fyrir sér.

Jónína Bjartmars og ríkisborgararéttur tengdadótturinnar.

Sumir muna e.t.v. eftir hremmingum við stjórnarmyndun borgaraflokkana í Svíþjóð eftir síðustu kosningar þar sem tvær konur sem áttu að verða ráðherrar urðu að hætta við það.

Það var leiðinlegt að sjá þau Bjarna Bendiktsson Guðjón Ólaf Jónsson og Guðrúnu Ögmundsdóttur segja það í sjónvarpinu að allt hefði verið í lagi með afgreiðslu á máli tengdadóttur Jónínu Bjartmarz og og þau hefðu ekki vitað um þessi tengsl. Þessar staðhæfingar þeirra  eru rangar.

Það er verklagsregla þegar mál eins og mál tengdadóttur Jónínu eru til skoðunar hjá 3 manna nefnd Alsherjarnefndar Alþingis að kannað er sérstaklega hvar viðkomandi einstaklingur býr, fjárhagsaðstæður og hverjum viðkomandi tengist hér á landi. Hafa verður í huga að þegar málið komi til skoðunar á borði þeirra Bjarna Benediktssonar, Guðjóns Ólafs og Guðrúnar að þá hafði umsókn tengdadótturinnar verið hafnað af útlendingaeftirlitinu og dómsmálaráðuneytinu.

Þriggja manna nefnd alsherjarnefndar sem þau Bjarni, Guðjón og Guðrún sátu í bar að athuga mál og stöðu tengdadóttur Jónínu í samræmi við verklagsreglur í nefndinni. Það hljóta þau að hafa gert og vitað nákvæmlega um stöðu mála og tengsl stúlkunnar við Jónínu. Annars hefðu þau  brotið gegn þeim starfsreglum sem hafa verið viðhafðar í alsherjarnefnd. Hafi þau lagt til að stúlkunni væri veittur ríkisborgararéttur án þess að hafa kannað málið með eðlilegum hætti  þá hafa þingmennirnir vanrækt starfsskyldur sínar. Hvorki staðhæfingar og skýringar þingmannana í Alsherjarnefnd Alþingis né skýringar Jónínu Bjartmars standast skoðun.  Því miður.

Sjálfstæðisflokkurinn eyðir mestu en ekki minnstu

Í Morgunblaðinu í dag er segt frá auglýsingarkostnaði stjórnmálaflokkana. Margir Sjálfstæðismenn halda því fram í fullri alvöru að þessar upplýsingar Morgunblaðsins sýni ótvírætt að Sjálfstæðisflokkurinn eyði minnstum peningum í kosningabaráttuna en það er rangt.

Sjálfstæðisflokkurinn er með yfir 100 manns á launum í kosningabaráttunni eða mun fleiri en nokkur annar flokkur. Sjálfstæðisflokkurinn er með flesta launaða starfsmenn allt árið. Kosnigabarátta er ekki bara nokkrar vikur fyrir kosningar. Sjálfstæðisflokkurinn er með flestar kosningaskrifstofur og birtir þar auglýsingar í gríð og erg. Fleira mætti nefna.

Þegar allt er talið þá liggur fyrir að Sjálfstæðisflokkurinn eyðir langmest í kosningabaráttuna beint.

Það er líka til að taka að stjórnarflokkarnir nota fé skattgreiðenda óspart í kosningabaráttunni. Ráðherrar láta mynda sig við að klippa á borða eða taka skóflustungur fyrir mannvikjum og öðru þess háttar.  Það heitir ókeypis auglýsing en til upprifjunar fyrir þá Frjálshyggjumenn sem enn styðja þennan stjórnlynda sósíaldemókratíska flokk Sjálfstæðisflokkinn skal á það bent að Milton Friedman sagði á sínum tíma "There aint no such thing as free lunch". Þannig er það heldur ekki með skóflustungu pólitík ráðherrana. Skattgreiðendur borga.

Frjálslyndir vilja eyða biðlistum.

Mér fannst þessi frétt nokkuð sérstök vegna þess að Frjálslyndir hafa haft það á stefnuskrá sinni að eyða biðlistum m.a. þeim biðlistum sem um ræðir í fréttinni án þess að ástæða hafi þótt til þess af fjömiðlum að slá því upp eða geta sérstaklega ummæla frambjóðenda Frjálslyndra í þessu efni.

Ég hef sérstaklega vakið athygli á velferðarhallanum eins og ég kalla það sem hefur skapast í tíð ríkisstjórnarinnar þar sem þeir sem lakast eru settir hafa ekki fengið í sinn hlut þann bata sem orðið hefur á lífskjörum almennings í landinu. Þess vegna er brýnast að leiðrétta velferðarhallann. Eyða biðlistum og borga öryrkjum og öldruðum sómasamlegar bætur og lífeyri. Velferðarkerfið á Íslandi á að bjóða þeim sem þurfa á því að halda mannsæmandi lífskjör. Ekki bara brýnustu lífsnauðsynjar heldur mannsæmandi lífskjör.

Einn vinur minn er búinn að bíða í marga mánuði eftir aðgerð. Hann gengur um á hverjum degi bryjðandi verkjapillur og skakkur vegna vanlíðunar. Þetta er aðgerð sem tekur ekki langan tíma. En hann er á biðlistanum. Hvað skyldi það kosta þjóðfélagið að sinna ekki slíkum aðgerðum. Þessi vinur minn er hættur að geta sinnt vinnunni sinni. Hvað þarf hann að bíða lengi í kvöl? Það er spurning sem allt of margir þurfa að spyrja.

Samfylkingin vill tryggja börnum og öldruðum á biðlistum örugga þjónustu

Ráðstefna um málefni innflytjenda.

Ég var á athyglisverðri ráðstefnu í dag sem Veraldarvinir gengust fyrir um málefni innflytjenda. Það var gaman að sjá að talsmenn Framsóknarflokksins og Sjálfstæðisflokksins kannast ekkert við það sem þeir bera ábyrgð á í málefnum innflytjenda. Þannig gátu þær Guðfinna Bjarnadóttir frá Sjálfstæðisflokki og Sæunn Stefánsdóttir frá Framsóknarflokki engu svarað þegar ég beindi til þeirra spurningum um innflytjendalöggjöfina sem sýndi fram á hvað málflutningur þeirra var innantómur og í miklu ósamræmi við það sem flokkar þeirra standa raunverulega fyrir. Það var fátt um svör.

Sjálfstæðisflokkurinn og Framsóknarflokkurinn bera ábyrgð á því að undanþágan við óheftum innflutningi fólks frá nýju Evrópusambandsríkjunum var ekki nýtt. Þessir flokkar bera ábyrgð á því að ekkert var gert til að taka vel á móti þeim sem hingað komu og þeir bjuggu og búa iðulega í ófullnægjandi húsnæði og  án nauðsynlegra mannréttinda. Þegar við Frjálslynd bentum á þetta þá snéru þeir út úr umræðunni og sökuðu okkur um að vera fjandsamlegir innflytjendum. Málflutningur þessa fólks dæmir það að lokum

 Á fundinum var bent á siðferðilega skyldu okkar vegna m.a. ástandsins í Írak. Ég er sammála því að við berum siðferðilega ábyrgð vegna skammsýni forustumanna Framsóknarflokksins og Sjálfstæðisflokksins.

Frjálslyndi flokkurinn er eini flokkurinn sem kemur heiðarlega fram í málefnum innflytjenda og bendir á vanda sem þarf að ræða. Framsóknarflokkurinn bauð 150 innflytjendum í mat og drykk í gær til að reyna að sannfæra þá um að Framsóknarflokkurinn væri vænn. Sú tilraun hefur vonandi mistekist.

Frönsku forsetakosningarnar.

Um hvað snúast kosningar og skiptir það einhverju máli hvort Nicolas Zarkosy eða Segolene Royal verður kjörin? Hvað segja skoðanakannanir? Skoðanakannanir spáðu Royal slöku gengi framan af en það kom í ljós að þær voru ekki allskostar réttar. Zarosy leggur meiri áherslu á lög og reglur en Royal og margt fleira. Royal er hlynnt inngöngu Tyrkja í Evrópusambandið eftir ákveðinn tíma en Zarkosy er á móti því að þeir fái inngöngu nokkru sinni.

Athyglivert er að heyra að Zarkosy segir að verstu mistöku sem gerð hafi verið í franskri pólitík nokkru sinni hafi verið 35 stunda vinnuvikan. Royal hefur látið hafa það eftir sér að Kínverskir dómstólar séu skilvirkari en franskir ef til vill ætti hún að kynna sér kínversku refsilöggjöfina.

Miðað við loforð þeirra munu þau auka ríkisbáknið í Frakklandi. Það er annars merkilegt að skattgreiðendur skuli ekki hafa meira að segja í pólitík en raun ber vitni. Ef eitthvað þá sýnist mér Zarkosy vera líklegri til að stjórna betur en Royal sem hefur of  mikið af gamaldags sósíalisma í farteskinu.

Hættuástand framunan?

Jón Baldvin Hannibalsson segir að hættuástand sé framundan og Þorsteinn Pálsson ritstjóri Fréttablaðsins og fleiri geri sér það ljóst. Vaxtamunur milli Íslands og Evrusvæðisins er 11%. Jöklabréf hafa verið gefin út í von um skjótfengin gróða upp á hundruð milljarða. Þetta heldur uppi gengi krónunnar sem aftur veldur viðskiptahalla og þar með er boginn spenntur til gengisfalls síðar með aukinni verðbólgu.

Þetta er sú framtíðarsýn sem fyrrverandi fjármálaráðherra Jón Baldvin Hannibalsson hefur á íslenska efnahagskerfið.

Ég hef undanfarin ár raunar allt þetta kjörtímabil bent á þessar augljósu staðreyndir. Ríkisstjórnin hefur haldið uppi skuldsettri velferð. Stundum held ég að ríkisstjórnarflokkarnir hafi stjórnunarstíl í anda Loðvíks 15 Frakkakonungs sem eyddi gegndarlaust um efni fram en þegar honum var bent á það þá sagði hann "Það lafir meðan ég lifi" Ríkisstjórnarflokkarnir virðast stjórna undir kjörorðinu "Það lafir fram yfir kosningar"

Er ekki kominn tími til að kjósa ábyrga flokka og einstaklinga til forustu. Frjálslynda flokkinn X-F

Hagstjórnarmistök?

Þegar fyrrverandi fjármálaráðherra sem mikið mark er takandi á skrifar þá hlítur maður að leggja við hlustir. Í dag er grein eftir Jón Baldvin Hannibalsson fyrrverandi fjármálaráðherra sem heitir "Fyrirtækin flýja hagstjórnarmistökin" Í greininni bendir hann á að þar sem skuldir heimilanna séu að stærsta hluta á verðtryggðum langtímalánum á föstum vöxtum hafi aðgerðir Seðlabanka til að slá á verðbólguna lítil áhrif til að slá á lánsfjáreftirspurn. En verðbólgureikningurinn sem bætist við höfuðstól lánanna í gegnum verðtrygginguna  hefur aukið útgjöld hinnar skuldugu fjölskyldu um hálfa milljón á ári. Þar með fór hinn prísaða kaupmáttaraukning hjá mörgum fyrir lítið segir Jón Baldvin.

Jón Baldvin bendir á það með skýrum hætti hvaða hættur eru í því að vera með verðtryggð lán í þjóðfélagi þar sem ríkisstjórn hefur gert hagstjórnarmistök. Hann segir að vegna óstöðugleika krónunnar hafi fyritæki neyðst til að fara úr landi.

En venjulegt fólk á þess ekki kost við verðum að búa við hagstjórnarmistök ríkisstjórnarinnar. Heimilin í landinu fá reikninginn þegar gengið fellur. Heimilin í landinu fá reikninginn þegar olíuverðið hækkar.

Eina leiðin er að taka um aðra viðmiðun varðandi gengi krónunnar og afnema verðtrygginguna. Verðtryggingin er hækja gjaldmiðils sem engin treystir.

Góður fundur í Breiðholtsskóla. Umræða eyðir fordómum

Ég var á góðum fundi með frambjóðendum hinna flokkana í Breiðholtsskóla í kvöld. Þar komu m.a. fram að ákveðin vandamál hafa komið upp í grunnskólum í hverfinu vegna vanrækslu ríkisstjórnarinnar á að sinna þeim mikla straumi innflytjenda sem sest hefur hér að á undanförnum árum. Ljóst er að sú umræða sem við Frjálslynd hófum vorið 2006 um vanrækslu ríkisstjórnarinnar í þessum efnum á fullan rétt á sér.  Það skiptir máli að gera vel við þá sem hingað koma og  gæta þess að íslenskt velferðarkerfi starfi með eðlilegum hætti.

Við Frjálslynd höfum ítrekað bent á að vandamálið er ekki innflytjendurnir. Vandamálið er of margir á skömmum tíma. Vandamálið er síðan fyrst og fremst ráðleysi og vanræksla ríkisstjórnarinnar á að taka á málum þannig að öllum sem hingað eru komnir sé tryggð mannréttindi og möguleikar til að aðlaga sig að þjóðfélaginu.

Sem betur fer gera fleiri og fleiri sér grein fyrir að sú umræða sem við Frjálslynd höfum haft um þessi málefni er þörf og til þess fallin að eyða fordómum og búa svo um hnútana að hér skapist ekki vandamál í framtíðinni. Þeir sem hafa reynt að afflytja þessa umræðu gera öllum ógagn. Umræða á aða eyða fordómum. Þannig höfum við nálgast málið við Frjálslynd og munum halda áfram að gera það.