Mun viðskiptaráðherra axla ábyrgð

Það var fróðlegt að fylgjast með viðtali Helga Seljan við viðskiptaráðherra í Kastljósi nú áðan.  Rætt var um yfirtöku ríkisins á Straumi-Burðarás. Einn banki er fallinn og spurning er hvað þeir sem hæst hafa talað um bankahrun og að það hafi gerst á vakt þessa eða hins og ákveðnir einstaklingar verði að axla ábyrgð segja nú.

Þegar Helgi Seljan ræddi við Björgvin G. Sigurðsson fyrrverandi viðskiptaráðherra í vetur þá spurði hann viðskiptaráðherra að því er mig minnir alltaf að því hvort hann  ætlaði ekki að axla ábyrgð á bankahruninu. Nú beið ég spenntur eftir að sjá hverju núverandi viðskiptaráðherra svaraði þessari spurningu Helga Seljan. En svo merkilega vildi til að Helgi spurði aldrei um þetta. Viðskiptaráðherra nýtur greinilega forréttinda sem Björgvin G. Sigurðsson naut ekki.

En af hverju var þörf á að taka Straum Burðarás yfir. Af hverju var þörf á því að hætta peningum skattborgaranna í þetta ævintýri. Hér var ekki um hefðbundinn viðskiptabanka að ræða og ábyrgð ríkisins því takmörkuð ef nokkur. Af hverju þá að taka ábyrgð á milljarða hundruðum?

Í þessu tilviki hefði verið eðlilegra að bankinn hefði farið í skiptameðferð án þess að ríkið blandaði sér í málið eða liggja einhverjar sérstakar ástæður fyrir því að ríkisstjórnin ákveður að hætta fjármunum almennings með þessum hætti án þess að nokkur þörf sé á?

„Auknar líkur á þjóðargjaldþroti"

Sterkur leiðtogi kveður.

Ingibjörg Sólrún Gísladóttir hefur verið einn sterkasti stjórnmálaleiðtoginn í hartnær tvo áratugi. Hún hefur verið góður foringi Samfylkingarinnar.   Ljóst er að Samfylkingin mun stríða við forustuvanda næstu árin fyrst sterkustu og hæfustu  stjórnmálamenn flokksins að Ingibjörgu frátalinni þau Jóhanna Sigurðardóttir og Össur Skarphéðinsson gefa ekki kost á sér til formennsku í flokknum.  Ég vona að Ingibjörg nái sem fyrst góðri heilsu en það er vafalaust hárrétt ákvörðun hjá henni að hverfa frá alla vega að sinni.

Pólitík er óvægin og Ingibjörg hefur mátt þola það eftir að hún veiktist að hart hefur verið sótt að henni af mörgum, jafnvel svo að það hefur verið fjarri því að vera viðurkvæmilegt. Það virðist því miður vera svo að úlfarnir eru reiðubúnir til að ráðast á hvern þann stjórnmálamann sem sýnir af sér einhvern veikleika. Það mættu allir muna það sem gefa sig að stjórnmálum að tími hetjunnar er alltaf stuttur á þeim vettvangi.

Ég hef oft gagnrýnt Ingibjörgu Sólrúnu vegna andstæðra stjórnmálaskoðana okkar. Ég met hana hins vegar mikils sem einstakling og stjórnmálamann.

Vandamál Samfylkingarinnar voru ærin en verða enn alvarlegri þegar Ingibjörg Sólrún hverfur úr forustunni.

Ingibjörg Sólrún hættir

Vörumst vinstri stjórn.

Svandís Svavarsdóttir segir í kjölfar kosningasigurs síns í forvali VG að stærsta verkefnið séð að tryggja vinstri stjórn eftir kosningar og Sjálfstæðisflokkurinn fái hvíld.  Svandís nefnir hins vegar ekki af hverju þetta er lífsnauðsyn.

Skyldi borgarfulltrúinn Svandís Svavarsdóttir vera svona hrifin af því sem ríkisstjórn Jóhönnu og Steingríms hefur áorkað s.l. mánuð að hún vilji endilega að þetta stjórnarsamstarf haldi. 

Ríkisstjórn Jóhönnu og Steingríms hefur ekki komið með heilstæða áætlun um það með hvaða hætti á að standa að endurreisn efnahagslífsins. Atvinnulausum fjölgar og fleiri og fleiri fyrirtæki fara í þrot.  Hver skyldi vera framtíðarsýn borgarfulltrúa sem talar með þeim hætti að það sé nauðsynlegt að tryggja að vinstri stjórn verði eftir kosningar þegar ekkert liggur fyrir um hvað hún getur eða ætlar sér að gera.

Landsmenn geta hins vegar gert sér grein fyrir því hvað vinstri stjórn hefur í för með sér. Skattar munu hækka verulega. Halli á fjárlögum mun hækka verulega.  Verði stefna Vinstri grænna að veruleika þá verða ekki til mörg arðberandi ný störf í landinu. Atvinnuleysi mun því aukast nema hvað varðar framhald boðaðrar stefnu um atvinnubótavinnu verði að veruleika. Er það þetta framtíðarland sem borgarfulltrúinn Svandís Svavarsdóttir sér fyrir sér í hillingum. Einhvern veginn finnst mér enduróma úr þessum hugleiðingum Svandísar um vinstri stjórn það sem næsta kynslóð vinstri manna á Íslandi á undan Svandísi kyrjuðu jafnan. "Sovét Íslands óskalandið hvenær kemur þú" 

Til þessu eru vítin til að varast og vinstri stjórn er vissulega víti til að varast.

 

Vinstristjórn lífsnauðsyn

500 milljarðar milli vina.

Hvað eru 500 milljarðar milli vina? Í sjálfu sér ekki neitt sem mér eða ykkur kemur við  ef vinirnir hafa algjörlega með það að gera og þetta eru þeirra peningar eingöngu.  Öðru máli skiptir ef um peninga annarra er að ræða. Þá eru það ekki 500 milljarðar milli vina heldur 500 milljarðar sem verður að skýra af hverju var farið með á þann hátt sem gert var.

Kaupþing lánaði stærstu eigendum sínum og vinum 500 milljarða. Var einhver glóra í þeim lánveitingum?

Fást lánin endurgreidd?

Miðað við allar kennitölur þá eru þessar lánveitingar með þeim hætti að gripið hefði verið til aðgerða af hálfu yfirvalda fyrir minni fjárhæðir en þessar og það með þeim hætti að lántakar og lánveitendur hefðu þurft að þola opinbera gistingu og fæði þangað til þeir hefðu skýrt af hverju þessar sérstöku fjárráðstafanir voru með þeim hætti sem Morgunblaðið greinir frá í dag.

Finnst sérstökum saksóknara ekki ástæða til að gera eitthvað í málinu strax?

Hvað skyldi dómsmálaráðherra hafa um málið að segja?

Já og viðskiptaráðherra? 

Viðskiptaráðherra ætti að geta tjáð sig um þessar sérstöku lánveitingar ekki síður en hann gat upplýst þjóðina um skoðanir sínar og álit á mótmælafundum áður en hann settist í ráðherrastól.

Er ekki eðlilegt að þjóðin krefji ofangreinda embættismenn svara?

 

Af hverju á músikhúsið að hafa forgang

Músikhúsið við höfnina er dæmi um  furðulega hugaróra sem allt of margir voru haldnir allt of lengi. Talið var eðlilegt og sjálfsagt að leggja út í margra tugamilljarða framkvæmd. Ljóst var að framkvæmdin mundi þegar músikhúsið væri fullbyggt leggja mikinn kostnað á ríki og Reykjavíkurborg. Samt var haldið áfram á þeim tíma þegar þjóðin taldi sig vera eina ríkustu þjóð heims. Jafnvel á þeim tíma þá var bruðlið og óráðssían við þessa framkvæmd óafsakanleg.

Það var þarft af Pétri Blöndal að vekja athygli á þessu máli með þeirri gagnrýni sem hann hafði uppi í dag. Ég hef frá upphafi talið mörg önnur verkefni í þjóðfélaginu mun brýnni en byggingu músikhússins. Nú þegar fyrir liggur að spurning getur verið um það hvort við getum haldið uppi eðlilegu félagslegu öryggisneti og sparað er og skornar niður framkvæmdir og aðgerðir á heilbrigðissviðinu og á vettvangi félagsmála þá finnst ríkisstjórninni eðlilegt að halda áfram eyðslunni við músikhúsið

Er það rétt að uppkomið muni músikhúsið kosta ríkissjóð og Reykjavíkurborg samtals um 3 milljónir á dag alla daga ársins? Sé svo er það þá ekki öldungis merkilegt að ríkisstjórnin skuli setja músikhúsið í forgang

Glundroði í málum tónlistarhúss

Sjálfstæðisflokkurinn á réttri leið.

Sjálfstæðisflokkurinn er hástökkvari þessarar skoðanakönnunar.  Ég tek skoðanakönnunum alltaf með vara en það sem þær mæla best er hvort fylgi er að aukast eða minnka.  Samkvæmt könnuninni er Sjálfstæðisflokkurin að bæta við sig um 3 prósetn frá síðustu könnun. Það gefur vísbendingu um að Sjálfstæðisflokkurinn sé á réttri leið eftir það fylgishrun sem skoðanakannanir hafa sýnt undanfarna mánuði.

Ég legg áherslu á að Sjálfstæðisflokkurinn byggi sig upp  sem víðsýnan breiðan flokk sem leggur höfuðáherslu á mannúðlega markaðshyggju, einstaklingsframtak og takmörkuð ríkisafskipti.  Með slíka stefnu að leiðarljósi verður Sjálfstæðisflokkurinn langstærsti flokkur þjóðarinnar.

Í kvöld var ég á fundi með Sjálfstæðisfólki í Árbæjarskóla. Það var bæði fjölmennt og góðmennt. Þarna voru allir frambjóðendur flokksin í prófkjörinu í Reykjavík og gerðu grein fyrir sér og stefnumálum sínum við væntanlega kjósendur. Það var virkilega gaman og góð stemmning. Það skiptir öllu máli fyrir Sjálfstæðisflokkinn að vel takist til með að velja sigurstranglegan lista til baráttu þannig að þessi fylgisaukning verði bara byrjunin á enn betri uppskeru þegar talið verður upp úr kjörkössunum í lok apríl.

Sjálfstæðisflokkur með mest fylgi

Stýrivextir lækka í Evrópu ekki á Íslandi. Af hverju?

Seðlabanki Danmerkur hefur lækkað stýrivexti sina niður í 2.25% en stýrivextir Seðlabanka Evrópu eru 1.5%. Hér á landi eru stýrivextir enn á annan tug prósenta. Hvað veldur því að við getum ekki verið í svipuðu vaxtaumhverfi og nágrannaþjóðir okkar

Hvernig eiga íslenskar fjölskyldur að geta staðið undir afborgunum lána og kostnaði við að lifa mannsæmandi lífi meðan vaxtaokrið er svona mikið hér á landi?

Hvernig eiga íslensk fyrirtæki að geta staðið sig í samkeppni þegar þau þurfa að greiða margfaldan lántökukostnað á við erlenda samkeppnisaðila.

Er hægt að byggja upp nýsköpun og arðbæran atvinnurekstur meðan helkuldi vaxtaokursins umlykur viðskiptaumhverfið

Það verður að lækka stýrivexti á Íslandi niður í það sama og er í nágrannalöndum okkar það er fogangsatriði.

Stýrivextir lækka í Danmörku um 0,75 prósentur

Starfslítil ríkisstjórn

Ríkisstjórnin hefur ekki komið með tillögur sem máli skipta til lausnar skuldsettum einstaklingum og fjölskyldum.

Ríkisstjórnin hefur ekki komið með tilögur sem máli skipta varðandi lánamál og skuldastöðu fyrirtækjanna í landinu.

Ríkisstjórin hefur ekki markað sér neina stefnu varðandi verðtryggingu lána og ekki virðist nein samstaða um það innan ríkisstjórnarinnar hvert á að stefna í þeim efnum.

Ríkisstjórnin hefur nú starfað í rúman mánuð og svo virðist sem eina málið sem stjórnarflokkarnir hafi náð samstöðu um áður en stjórnin var mynduð hafi verið að bera fram frumvarp til laga til að koma bankastjórn Seðlabankans frá.

Steingrímur J. og Jóhanna bera ábyrgð á því að á hverjum degi fara ný fyrirtæki í þrot og fleiri missa vinnuna.

Það liggur fyrir að það verður að gera grundvallarbreytingar á lánamarkaðnum á Íslandi til að styðja fólk og fyrirtæki.  Þær breytingar máttu ekki bíða þegar ríkisstjórnin var mynduð og það er ábyrgðarleysi að  láta tímann líða án aðgerða.

Svo virðist sem að sé forgangsatriði Samfylkingarinnar og Vinstri grænna að bera fram tillögur um breytingar á kosningalögum og stjórnarskrá í stað þess að beina sjónum að þeim vanda sem fyrir hendi er í þjóðfélaginu.

Engar breytingar hjá VG

Er það ekki aldreilis merkilegt að þeir sem mest tala um breytingar skuli ekki gera neinar breytingar hjá sér. Listi VG í Norðausturkjördæmi verður óbreyttur að því er máli skiptir.  Ég óska Steingrími, Þuríði og Birni til hamingju með 1., 2. og þriðjasætið.  Ef til vill eru engir til að taka við kyndlinum af Steingrími J?

Steingrímur J. efstur í NA

Kærar þakkir

Ég vil þakka þeim fjölmörgu sem komu við opnun kosningaskrifstofu minnar í Síðumúla 35. Mér fannst einstaklega ánægjulegt að þeir Friðrik Sóphusson og Vilhjálmur Þ. Vilhjálmsson skyldu flytja góðar ræður og kveðjur við opnunina.

Við Friðrik áttum samleið allan þann tíma sem ég var í Sjálfstæðisflokknum og eigum enn.  Ég tók við af honum sem formaður Sambands ungra Sjálfstæðismanna en andstæðingur minn í þeirri kosningu var einmitt Vilhjálmur Þ. Vilhjálmsson. Menn kynnast iðulega vel mannkostum manna þegar þeir eiga þá fyrir andstæðinga og þrátt fyrir að við Vilhjálmur ættum ekki alltaf samleið á sínum tíma í Sjálfstæðisflokknum þá tókst með okkur ágæt vinátta sem hefur staðið óháð því hvernig pólitíkin hefur verið og þó gefið hafi stundum á bátinn og nokkrar væringjar verið með mönnum.

Ég vil líka nota tækifærið til að þakka þeim sérstaklega sem gerðu það mögulegt að skrifstofan var opnuð á réttum tíma með þeim glæsibrag sem um var að ræða. Undirbúningurinn var í góðum höndum konu minnar og vina. Okkur Mörtu langar sérstaklega að þakka vini mínum Jóni Magngeirssyni sem alltaf klárar öll verkefni með miklum glæsibrag.