Geðþóttaráðning Steingríms J. á ráðuneytisstjóra og umboðsmaður Alþingis

Steingrímur J. Sigfússon hefur nú ráðið ráðuneytisstjóra í hinu "nýja" atvinnuvegaráðuneyti eftir vel sviðsett leikrit með hæfnisnefnd, sem fékk að hitta þrjá núverandi ráðuneytisstjóra.  Starfið var ekki auglýst, þrátt fyrir að slíkt sé meginreglan um störf hjá hinu opinbera og góðir stjórnsýsluhættir.  Var við því að búast af Steingrími J. að hann virti slíkar leikreglur í lýðræðisþjóðfélagi?

 

Starfsauglýsingar hafa það markmið að tryggja að ráðningar hjá hinu opinbera séu gegnsæjar, gætt sé jafnræðis og hæfasti einstaklingurinn verði ráðinn.  Steingrímur Sigfússon hefur ekki áhuga á slíku heldur vill gamaldags pukur og geðþóttaráðningar.

 

Tveir aðrir ráðherrar þau Jóhanna Sigurðardóttir  og Ögmundur Jónasson brjóta jafnræðislög ef þeim þykir þess þurfa.  Þannig er ráðningarferlið hjá ríkisstjórn "gagnsæis" sem sagðist vera á móti "leyndarhyggju".

Fróðlegt verður að sjá viðbrögð Tryggva Gunnarssonar, umboðsmanns Alþingis. Varla telur hann ráðningaferli Steingríms samrýmast góðum stjórnsýsluháttum.  Umboðsmaður birti nýlega sérstakar ábendingar um auglýsingar á lausum störfum hjá ríkinu á vefsíðu sinni.  Umboðsmaður hefur sýnt það að hann lætur slík mál til sín taka. 

Umboðsmaður  ákvað, að eigin frumkvæði, að ávíta Geir H. Haarde þáverandi forsætisráðherra fyrir að auglýsa ekki ráðningu í tímabundið skrifstofustjórastarf á nýrri efnahags-og alþjóðamálaskrifstofu ráðuneytisins í miðju bankahruni.  Málið gegn Geir var keyrt áfram af methraða miðað við almennan málshraða umboðsmanns, en því lauk á 2 mánuðum eða þ. 29/12/2008.

 

Því verður ekki trúað að málið gegn Geir H. Haarde, á viðkvæmum tíma, hafi einungis verið í vinsældarskyni og Steingrímur J. Sigfússon fái aðra meðferð hjá Umboðsmanni. 

 

Þá er samkennd Umboðsmanns Alþingis og núverandi stjórnvalda mun meiri en álitið hefur verið.

ASÍ forustan berst gegn hagsmunum launþega.

Forusta ASÍ hefur orðið viðskila við raunverulega verkalýðsbaráttu. Heildarhagsmunir launþega eru í dag aðrir en þeir hagsmunir sem forusta ASÍ hefur gert að inntaki í starfi sínu.

Hagsmunir launþega er að fá sem mest gæði fyrir laun sín. Þess vegna skiptir máli að verð á nauðsynjum sé sem hagstæðast fyrir launþega. Það skiptir líka álíka máli fyrir launþega að verð á lánum sé lágt.

ASÍ forustan heldur úti verðkönnunum á matvælum öðru hvoru, sem er góðra gjalda vert. En það er ekki nóg að mæla hitastigið á matvælamarkaðnum eins og ASÍ myndast við að gera. Það þarf líka að berjast fyrir og móta tillögur til raunlækkunar vöruverðs í landinu. Það er mikilvægasta kjarabót launþega í landi verðtryggingarinnar.

Hagstæð lán eru líka forsenda góðra kjara launþega. Þar hefur ASÍ forustan ekki bara brugðist, heldur vinnur gegn hagsmunum launþega. ASÍ forustan stendur dyggastan vörð allra um verðtrygginguna sem þýðir óhagkvæmustu lán til neytenda sem til eru í Evrópu og Norður Ameríku. 

ASÍ hefur ekki ljáð máls á því að neysluskattar séu teknir út úr vísitölu neysluverðs til verðtryggingar.  Þess vegna bitna auknir neysluskattar með tvöföldum þunga á launþegum. Hækka matarverð og hækka lán í leiðinni.  Þá berst ASÍ forustan nú fyrir því að launþegar á Íslandi þurfi að þola hækkun lána sinna vegna t.d. uppskerubrests á korni í IOWA í Bandaríkjunum, en lánastofnanir fái meira í sinn hlut vegna þess.

Ekki má gleyma því að forseti ASÍ drap á dreif tilögum um að verðtryggingin yrði tekin úr sambandi með neyðarlögum í október 2008. Hann var formaður nefndar til að fjalla um málið á vegum Jóhönnu Sigurðardóttur og niðurstaða hans og Jóhönnu var sú að frekar skyldu heimilin tekin af fólkinu en að gæta sanngirni á óvissu og erfiðleikatímum.  

Hætt er við að gengi krónunnar gefi eitthvað eftir á næstunni. Það mun hækka verðtryggðu lánin. Þá er framundan veruleg hækkun matvæla vegna verulegrar hækkunar á kornveði. Hækki eldsneytisverð líka verður hér ný verðbólguholskefla. Hún bitnar þyngst á launþegum sem eru með verðtryggð lán. ASÍ forustan virðist neita að horfast í augu við þessar staðreyndir.

Stefna forustu ASÍ gagnvart heimilunum í landinu er álíka og stjórnenda flutningaskips sem byrjar að leka úti á rúmsjó og meðan hásetarnir rembast af öllu afli við að stöðva lekann og ausa þá bora yfirmennirnir stöðugt fleiri göt á skipið. Slíkum stjórnendum yrði kastað fyrir borð til að skipið sykki ekki.  Það þurfa launþegar líka að gera gagnvart forustu ASÍ meðan hún rekur helstefnu gegn heildarlífskjörum launþega í landinu.

Neytendur sviknir. Þess vegna hækka lánin.

Flest lán almennings eru bundin vísitölu neysluverðs til verðtryggingar. Vöruverð í landinu skiptir því meira máli hér en í nokkru öðru landi fyrir velmegun fólksins. Svo virðist sem kaupmenn hafi svikið neytendur í sumar með þeim afleiðingum að neytendur greiddu hærra verð fyrir vörurnar en þeir áttu að gera. Þess vegna hækkuðu lánin líka í stað þess að lækka.

Frá því í apríl þangað til í júlí hækkaði gengi krónunnar um tæp 12%. Af þeim sökum hefði vöruverð innfluttrar vöru átt að lækka um svipaða prósentutölu en svo er ekki. Þegar vísitölur Hagstofunnar eru skoðaðar, sést að breytingar á vöruverði vegna styrkingar krónunnar skilar sér ekki til neytenda.

Breytingar á vísitölu neysluverðs til verðtryggingar sýnir líka að  hækkun á gengi krónunnar skilar sér mjög illa til lækkunar á vöruverði. Hvað gerist þá núna þegar krónan er að veikjast?

Skrýtið að vöruverð skuli nánast standa í stað þegar Evran er 168.4 og þegar hún er 146.6. Þrátt fyrir þessa tæplega 12% hækkun krónunnar gagnvart Evru þá damlar vísitala neysluverðs til verðtryggingar á sama róli og hækkar milli júlí og ágúst en lækkar aðeins í september eða sem svarar broti úr prósenti.

Það er vitlaust gefið og það er allt á kostnað neytenda og þeirra sem skulda verðtryggð lán. Meðan stjórnvöld láta þetta viðgangast þá eru þau ekki að vinna fyrir almenning í landinu.

Er nauðgun aukaatriði?

Fróðlegt er að fylgjast með málatilbúnaði sporgöngumanna Julius Assange vegna nauðgunarákæru á hendur honum í Svíþjóð og kröfu Svía um að hann verði framseldur til að svara til saka. Vegna þeirrar kröfu var Julius handtekinn í Bretlandi, en látinn laus gegn tryggingu, sem greidd var af nokkrum vinstri sinnuðum auðmönnum. Nú hefur "sómamaðurinn" Júlíus hlaupist undan ábyrgð þrátt fyrir að hafa skriflega samþykkt að gefa sig fram yrði framsal heimilað. 

Julius Assange lætur vini sína sitja uppi með greiðslu tryggingarinnar. Hann svíkur loforð sem hann gaf þegar hann var leystur úr fangelsi gegn greiðslu tryggingar. Lygi og svik Julius Assange er afsakað af sporgöngumönnum hans sem telja að hann sé hafinn yfir lög og rétt.

Af hálfu sporgöngumanna Júlíusar hefur verið gert lítið úr ákærunni og þeim konum sem kærðu Júlíus. Vinstri sinnaðir stjórnmálamenn hafa jafnvel birt nöfn þeirra. Sjálfur hefur Júlíus neitað sök. Þrátt fyrir það hefur Júlíus verið dæmdur af þremur aðskildum óháðum dómstólum í Bretlandi til að sæta framsali til Svíþjóðar.

Nauðgun er hræðilegur glæpur sem hefur áhrif á líf brotaþola alla ævi. Með sama hætti er það hræðilegt að verða saklaus fyrir nauðgunarákæru og það hefur líka alvarleg áhrif iðulega alla ævi þess sem fyrir slíku verður. Þess vegna skiptir máli að slík mál séu afgreidd hratt og örugglega til að hið sanna sé leitt í ljós fyrir óháðum dómstól. En sporgöngumenn Assange telja hann yfir þetta hafinn.

Júlíus er þekktur fyrir að hafa verið forgöngumaður Wikileaks vefsins sem aðallega hefur birt stolin skjöl frá Bandaríkjunum. Hatursmenn Bandaríkjanna á Vesturlöndum og víðar sameinast um og  gera allt til að afsaka framferði Júlíusar og búa til sögur sem eiga að afsaka gunguskap hans varðandi það að svara til saka fyrir óháðum sænskum dómstóli. 

Sjálfur segir Júlíus að verði hann framseldur til Svíþjóðar muni hann verða framseldur þaðan til Bandaríkjanna og telur vafamál að hann sleppi lifandi frá því. Er það líklegt? Er einhver glóra í svona draugasögu? Eru Bretar ekki bestu vinir Bandaríkjanna? Af hverju ættu þeir þá ekki að framselja Júlíus frekar en Svíar?

Svíar hafa verið þekktir fyrir að vera skjól ýmissa flóttamanna undan réttvísinni í Bandaríkjunum t.d. liðhlaupa hermönnum. Er líklegt að þeir mundu ganga erinda Bandaríkjanna gagnvart Júlíus Assagne?

Óneitanlega er oft sérstakt að skoða út frá hvaða hugmyndaheimi róttækir vinstri menn í Evrópu og Suður Ameríku líta á málin. Meint brot gegn kynfrelsi kvenna, nauðgun, er afsökuð, af því er virðist eftir hver í hlut á.

Er þá nauðgun afsakanleg þegar sjóræningjar og meintar alþýðuhetjur og óvinir Bandaríkjanna eiga í hlut? Ríkisstjórn landsins sem veitir Júliusi hæli virðist líta svo á og margir vinir hans m.a. hér á landi.

Rafael Correa hinn vinstri sinnaði forseti Equador er sérstakur vinur Íran og Venesúela og annarra sem eru óvinir Bandaríkjanna. Þess vegna er Julius Assange velkominn á þeim grundvelli einum að "my enemy enemies are my friends" óháð því hvað hann hefur gert.

Það eru nöturleg örlög Julius Assange að verða skjólstæðingur Correa forseta, sem hefur bara á þessu ári lokað 14 fréttamiðlum af því að þeir gagnrýndu hann. Gefur Assange sig ekki út fyrir að vera málsvari tjáningafrelsis og upplýsingafrelsis. Þá er í góðu samræmi við hugsjónirnar að ganga í lið með gjörspilltum forseta sem takmarkar tjáningafrelsi og hefur verið sakaður um peningaþvætti og veita eiturlyfjahringjum skjól auk Írönskum fjármagnsflutningum og nú Assange. Flottur félagsskapur það.

Afsakanir Júlíus Assange eru óneitanlega holar og ómarktækar. Þarna er maður sem þorir ekki að bera ábyrgð á gerðum sínum og gerir allt til að þyrla upp rugli til að komast hjá því og gengur býsna vel.

Það sem kemur mest á óvart og er alvarlegt í þessu máli er að vinstri sinnaða "gáfumannasamfélagið" hér á landi og víðar sem á það helst sameiginlegt að hata Bandaríkin, skuli hafna því að nauðgunarákæra sé alvarlegt mál og konurnar sem kæra Július eigi rétt á því að málið verði leitt til lykta fyrir óháðum dómstól.

Ekki heyrist nú í feministum eða hetjunum á Alþingi sem helst hafa fjallað um kynfrelsi kvenna og fordæmt brot gegn konum. Af hverju ekki? Telja þessir aðilar eins og vinstri sinnaða "gáfumannasamfélagið" að Julius Assange sé hafin yfir lög?

Mannréttindi eru algild og það er engin undanþeginn að virða þau.

Neil Armstrong

Suma hluti man fólk betur en aðra. Flestir sem komnir eru yfir miðjan aldur muna eftir fyrstu tunglendingunni og þegar Neil Armstrong flutti heiminum þau skilaboð þegar hann steig fæti sínum á tunglið að þetta væri lítið skref fyrir einstakling en risastökk fyrir mannkynið. 

Áður en hann var tengdur alheimnum og bara tengdur innanhúskerfi NASA  sagði hann að vísu "Good luck Mr. Gorsky" en þau ummæli vísuðu til skemmtilegrar sögu sem hann opinberaði ekki fyrr en um árið 2000 eða um 30 árum eftir tunglferðina og margir kunna skil á.

Ég átti þess kost að hitta Neil Armstrong og félaga hans við Mývatn sumarið 1965. Þá var hann þar ásamt hópi frá NASA við að kynna sér aðstæður og jarðfræði við Öskju.  Stjórnandi þeirrar ferðar var Guðmundar heitinn Sigvaldason jarðfræðingur sem þá var kennari minn við Menntaskólann í Reykjavík.

Við strákarnir sem unnum við að byggja Kísilgúrverksmiðju við Mývatn á þeim tíma, gengumst fyrir útihátíð þá helgi sem geimfaraefnin dvöldu í Hótel Reynihlíð. Þeir mættu á hátíðina og skemmtu sér hið besta og tóku þátt í ýmsum atriðum. M.a. tókumst við á við þá í reiptogi og höfðum sigur. Það var fyrst og fremst að þakka fílefdlum þingeyskum bændum sem slógust þá í lið með  okkur strákunum úr Reykjavík.

Minningin um þetta kvöld og kynni við þessi bandarísku geimfaraefni finnst mér mjög ljúf og er enn í fersku minni. Óneitanlega er skrýtið að þessir vösku og mætu menn Guðmundur Sigvaldason og Neil Armstrong skuli nú báðir vera fallnir frá.

Blessuð sé minning þeirra.

Munaðarlausu fjárlögin

Forsætisráðherra sagði Oddnýu Harðardóttur hafa gegnt embætti fjármálaráðherra með mikilli prýði og staðið sig vel. Þess vegna taldi Jóhanna rétt að hún viki. Varaformaður Samfylkingarinnar sagði að Oddný hefði staðið sig með sóma og tók undir með formanni sínum að það væri því eðlilegt að hún léti af störfum.

Fyrir 8 mánuðum leysti forsætisráðherra, Steingrím J. Sigfússon undan því að vera fjármálaráðherra þegar ljóst var að hann réði ekki við verkefnið sérstaklega ekki á kosningaári.  Oddný Harðardóttir var síðan tekin í starfsþjálfun í fjármálaráðuneytinu í 8 mánuði meðan gengið var frá undirbúningi fjárlaga.

Nú þegar fjárlagafrumvarp er nánast alskapað þá þykir Samfylkingunni rétt að sá sem ber pólitíska ábyrgð á þeim víki vegna góðra starfa eins og það er orðað og við taki þingmaður úr Kópavogi sem hentar nú að koma úr barneignafríi.

Fjárlögin eru því munaðarlaus. Steingrímur J. hljóp frá óreiðunni og skilaði lyklum fjármálaráðuneytisins til konu sem fékk að sitja opinmynnt á skólabekk hjá starfsmönnum fjármálaráðuneytisins við undirbúning fjárlaga. Nú tekur við fjármálaráðherraembættinu kona sem hefur ekki átt þess kost að setja sig inn í þá faglegu vinnu sem unnin hefur verið við fjárlögin og sest nú opinmynnt á skólabekk til að fá fræðslu um helstur forsendur og áherslu fjárlaga.

Samfylkingin telur greinilega að pólitísk ábyrgð, forusta og frumkvæði eigi ekki við lengur.

Spámaðurinn Kúbu Gylfi minnir á sig.

Dr. Gylfi Magnússon, dósent, fyrrum mótmælandi á Austurvelli og síðar viðskiptaráðherra, var af einhverjum ástæðum tekinn í fréttaviðtal á Stöð 2 þar sem hann færði þjóðinni þá speki, að "fylgjast þyrfti grannt með gangi mála í íslensku efnhagslífi" þar sem gjaldeyrishöftin gætu valdið eignabólu. 

 Margir hafa raunar bent á þetta áður þó þeir hafi hvorki doktorsgráðu né kenni í Háskóla Íslands. Gylfa er raunar vorkunn.  Spádómar völvu Vikunnar um áramót hafa ræst mun betur en spádómar Gylfa.   Doktorinn, mótmælandinn og ráðherrann Gylfi spáði því að Ísland yrði "Kúba norðursins" ef þjóðinn samþykkti ekki undirlægjusamninga við Breta og Hollendinga svokallaða Icesave samninga. Gylfi spáði því lika að ríkið þyrfti ekki að borga neitt með SpKef og Byr. 

Ráðherrann Gylfi spáði hins vegar hvorki í né sagði þingi og þjóð rétt frá varðandi dómsmál um ólögmæti gengistryggðra lánasamninga.  Í framhaldi af því að hafa leynt Alþingi mikilvægum upplýsingum hvarf Gylfi snögglega úr ráðherrastól áður en Alþingi fékk tækifæri til að ræða þau mál. Enda lítið annað að gera fyrir ráðherra sem var beraður af því að hafa misfarið með mál gagnvart Alþingi.

En nú er spámaðurinn Dr. Gylfi semsagt upprisinn að nýju á Stöð 2. Eðlilegt að fréttamiðlarnir komi sér upp "vönduðum marktækum" viðmælendum frá Háskóla Íslands um þjóðfélagsmál eins og Stöð 2 Dr. Gylfa Magnússon og Ríkisútvarpið Sigurbjörgu stjórnsýslufræðing.

Hvar eruð þið núna Jón Gnarr og Össur?

Fyrirbrigði á tónlistarsviðinu sem kallar sig "Pussy Riot" ákvað að vekja á sér athygli með því að litilsvirða helga dóma í höfuðkirkju rússnesku réttrúnaðarkirkjunnar fyrir nokkru. Uppákoma þessara þriggja kvenna í Rússlandi leiddi til þess að þær voru handteknar og hlutu nýverið dóm fyrir athæfi sitt.

Lönd í okkar heimshluta hafa ákvæði í refsilöggjöf sinni sem varða athæfi eins og það sem þessi sönghópur í Rússlandi gerðist sekur um.  Þannig er ákvæði í 125.gr almennra hegningarlaga á Íslandi sem mælir fyrir um refsingu allt að 3. mánaða fangelsi þeirra sem opinberlega draga dár að eða smána trúarkenningar eða guðsdýrkun löglegs trúarbragðafélags. Konurnar í "Pussy Riot" hefðu því þurft að sæta ákæru og refsingu hér á landi fyrir svipað athæfi og þær gerðust sekar um í höfuðkirkjunni í Moskvu.

Allt í einu rís upp hópur hér á landi sem telur það hið  alvarlegasta mannréttindabrot að dæma þessar konur í Rússlandi í fangelsi. Fyrirbrigðið í stól borgarstjóra fannst tilvalið á þeim eina vettvangi sem hann getur sinnt sæmilega að setja á sig hettu til að hylja andlit sitt og krefjast þess að félagar í "Pussy Riot" yrðu látnar lausar. Í kjölfarði fylgdi Bandalag listamanna og "garmurinn hann Ketill", Össur Skarphéðinsson sem sagði Rússa brjóta öll mannréttindi með þessu og fór mikinn eins og aðrir af hans sauðahúsi sem hafa tjáð sig um málið.

Rússnesk refsilöggjöf tekur mun harðar á brotum af þessu tagi en gert er víða á Vesturlöndum en mun vægar en gert er í mörgum öðrum löndum. Um það hefur Össur ekki séð ástæðu til að fjalla. Í Saudi Aarabíu og Pakistan hefði fólk sem hefði brotið af sér eins og konurnar í "Pussy Riot" gerðu verið teknar af lífi og það jafnvel strax.

Sunnudaginn var handtók Pakistanska lögreglan 11 ára stúlku með Downs heilkenni sem er sökuð um að hafa misfarið með síðu eða síður úr Kóraninum. Við því broti liggur lífstíðarfangelsi í Pakistan. Ekki fer sögum af því að Össuri Skarphéðinssyni hafi fundist tilefni til að fjalla um málið hvað þá fyfirbrigðinu sem situr í stóli borgarstjóra með fulltingi og í skjóli varaformanns Samfylkingarinnar. Það mál kemur þeim ekki við frekar en Bandalagi listamanna eða öðrum slíkum pótintátum.

Þá fer ekki sögum af því að það fólk sem mótmælir nú meðferðinni á "Pussy Riot" hafi látið í sér heyra vegna refsinga Julíu Timosjenko í Úkraínu eða það alvarlegasta sem nokkur ríkisstjórn getur gert gagnvart borgurum sínum að virða ekki rétt borgaranna til lífs eins og um var að ræða í Suður-Afríku fyrir skömmu og gerist í mörgum löndum nánast daglega.

Vel má fallast á að rússnesk löggjöf sem samsvarar 125.gr. almennra hegningarlaga á Íslandi sé of hörð, en það leiðir ekki sjálfkrafa til réttlætingar á ummælum utanríkisráðherra eða annarra sem sjá flísina í löggjöf Rússlands en ekki bjálkana sem eru út um allt í heiminum varðandi samsvarandi brot. 

Borgarstjórinn viðhafði að venju takmörkuð ummæli um málið þegar hann fullnægði sýniþörf sinni vegna þess.

Ferlismálaráðherrann

Menntamálaráðherra hefur komið sér upp ákveðnu verkferli eftir því sem hún segir sjálf. Verkferlið fellst í því að setja mál í ferli. Hún er því ferlismálaráðherra.

Fyrir nokkru komu upp vandamál tengd háskólum og þá sagði Katrín aðspurð af fréttamanni. Við erum að skoða þetta mál og við erum búin að koma því í ferli.

Nú þegar fyrir liggur að tapið á músikhúsinu Hörpu er yfir 400 milljónir á ári og níu stjórnir með nánast sama fólkinu á níföldum stjórnarlaunum gera það sem ein stjórn gæti gert, þá segir menntamálaráðherra að þetta sé að sjálfsögðu ekki gott en málið sé komið í ferli. Þá geta allir verið ánægðir tapið í ferli, stjórnirnar 9 með níföldum stjórnarlaunum, spillingin og bruðlið allt í ferli 

Í kjölfarið á ferlismálum Hörpunnar kom í ljós að ekki hafði verið hugsað fyrir að allir nemendur fengju skólavist í framhaldsskólum. Aðspurð um það vandamál sagði menntamálaráðherra að þetta mál væri að sjálfsögðu ekki gott en málið væri komið í ferli.

Nú gegnir Katrín Jakobsdóttir formennsku í Vinstri grænum meðan Steingrímur J hvílir lúinn hug og bein í París. Þá fannst Katrínu rétt að setja umsóknina að Evrópusambandinu í annað ferli, væntanlega eftir að ferlisnefnd hefði kannað með hvaða hætti rétt er að haga ferlinu.

Gleymdi einhver, að mál sem eru í ferli eru óafgreidd. Mál sem eru í ferli hefur ráðherra ekki tekið ákvörðun um.

Menntamálaráðherra sem ætti að heita ferlismálaráðherra virðist ekki geta tekið eina einustu ákvörðun og því væri e.t.v. réttara að hún segði að ferlismálaráðherrann væri í verulegum ferlisvanda af því að hún hefði ekki hugmund um það ferli sem hún vildi setja málin í eða hvað hún vildi fá út úr ferlinu.

Hætt er við að mál sem heyra undir Katrínu Jakobsdóttur verði endalaust í ferli meðan hún er ráðherra.