40 manns

Sagt er að fulltrúar Íslands á loftslagsráðstefnu SÞ á sólarbaðstaðnum í Egyptalandi séu yfir 40. Vafalaust er það í anda ráðdeildar og sparnaðar að hafa sendinefndina ekki fjölmennari.

Það skiptir máli fyrir land eins og Ísland að leggja sitt að mörkum til að sýna dáð og dug í baráttunni gegn því að þjóðin megi njóta meiri hlýindi, betra og fjölbreyttara mannlífs og betri lýðheilsu.

Til að sporna við bættum hag þjóðarinnar að þessu leyti, má ekkert minna vera en að senda 40 valinkunna sómamenn og konur til að vinna sem mest og best gegn hagsmunum þjóðarinnar í bráð og lengd á alþjóðlegum vettvangi. 

Helsta framlag Íslands á loftslagsráðstefnum sem þessum hingað til, hefur verið að fjalla um kynræna loftslagshlýnun, sem hlítur að vera afar merkilegt fyrirbæri. Vafalaust er þar kominn einn helsti orsakavaldur þess, sem ógnar nú lífríkinu.

Það er þá aldrei að rödd Íslands fái ekki að heyrast á alþjóðavettvangi og þjóðir heims sjái hversu mikið og merkilegt rökrænt framlag þjóðin hefur fram að færa.

Að sjálfsögðu geta skattgreiðendur verið stoltir af því að eiga slíka og þvílíka fulltrúa á alþjóðavettvangi eða hlutfallslega langstærstu sendinefnd allra þjóða á þessari "mikilvægu" ráðstefnu, þar sem hver reynir að toppa hinn í frásögnum af því hvílíka hörmungartíma þjóðir heims lifi nú, þar sem allir eru að stikna til bana, ef ekki strax þá bráðum.

Samt deyja margfalt fleiri úr kulda en hita? 

Þið skuldið okkur

Á loftslagsráðstefnu Sameinuðu Þjóðanna í Sharm El Sheik, sem nú stendur yfir reynir hver ræðumaðurinn að yfirbjóða annan við að lýsa hörmulegu ástandi vegna manngerðrar hlýnunar. 

Hin meinta manngerða hlýnun hefur aldrei verið sönnuð heldur er um getgátu að ræða. Þá liggur fyrir að allar spár hlýnunarsinna hafa reynst rangar og engar þær breytingar hafa orðið á undanförnum 40 árum á loftslagi, sem geta talist marktækara langtímabreytingar.

Sjávarborð hefur ekki hækkað og þau lönd og borgir sem áttu að vera sokkin í sjó vegna meintrar hamfarahlýnunar hafa ekki gert það og engar breytingar á tilveru þeirra sjáanlegar. Þá hafa engar þær veðrabreytingar orðið sem hlýnunarsinnar hafa spáð. 

Samt sem áður koma forustumenn ákveðinna ríkja saman á loftslagsráðstefnum Sameinuðu þjóðanna öðru hvoru og hamast við að reyna að yfirbjóða hvern annan í fullyrðingum um það hrikalega ástand sem á að vera í heiminum.

Pakistan hefur forustu fyrir ríkjum, sem gera kröfu til að Vesturlönd greiði þeim og fjölmörgum öðrum ríkjum bætur vegna meintrar loftslagshlýnunar. Fyrir þessi ríki hefur þetta alltaf verið spurning um að ná peningum frá Vesturlöndum og þau hafa því barmað sér sem mest má vera. 

Af hverju ættu Vesturlönd að greiða bætur vegna meintrar hlýnunar af mannavöldum, sem engar sannanir liggja fyrir um. Það getur ekki verið nema þau viðurkenni sök. Eiga skattgreiðendur á Íslandi að fara að borga peninga skattgreiðenda til þursaríkisins Pakistan. Gerðum við þeim eitthvað einhverntímann? Væri ekki réttara fyrir þá að gaumgæfa að vandamál þeirra stafa fyrst og fremst af þeim trúarbrögðum sem þeir aðhyllast nánast allir, sem hafa bundið þjóðfélagið í klafa hjátrúar, hindurvitna og öfga.

Að sjálfsögðu er leiðtogi Kína,Xi Jinping, forsætisráðherra Indlands,Narendra Modi fjarverandi, eins og Justi Trudeau forsætisráðherra Kanada og foræstisráðherra Ástralíu Anthony Albanese fjarverandi, en síðari ríkin tvö flytja út gríðarlegt magn af olíu og kolum. Leiðtogar þessara ríkja eru að hugsa um að bæta lífskjör eigin borgara í stað þess að rýra þau eins og þeir stjórnmálamenn eru að gera sem eru hlaupatíkur loftslagstrúboðsins.

Við skulum sitja hjá í þessu og gefa þeim stjórnmálamönnum hér á landi frí, sem ætla sér að skattleggja borgarana úr hófi vegna þessa og stuðla að hærra vöruverði til neytenda. Nóg er samt.

 

 

Lygum hæfa laun ill

Illt er að vinna hjá vanþakklátum vinnuveitanda. Enn verra ef vinnuveitandinn skipar þér til verka og skammar þig síðan fyrir að gera það sem fyrir þig er lagt. 

Hugsið ykkur starfsaðstöðu Útlendingastofnunar og lögreglu við að framfylgja lögum um útlendingamál. Lögin kveða á um ákveðna framkvæmd, sem ákveðin er af Alþingi og stjórnvöld skipa starfsfólki Útlendingastofnunar og lögreglu til verka í samræmi við lögin. Síðan kannast stjórnmálamennirnir ekki við neitt og fordæma jafnvel lögreglu fyrir að vinna þau verk sem þeir hafa sjálfir lagt fyrir hana að vinna. 

Forsætisráðherra harmar að lögregla skuli hafa farið að lögum og krefst rannsóknar og fjármálaráðherra og umhverfis- og orkumálaráðherra, sem báðir sækjast eftir formannsstöðu í Sjálfstæðisflokknum fara undan eins og hérar í málinu þegar um er spurt. 

Til stóð að flytja 28 ólöglega innflytjendur úr landi í gær, en 13 fundust ekki og eru því hér enn ólöglega. Áróðursmiðill opinna landamæra á Íslandi RÚV brást við með því með einhliða áróðursfréttum og torveldaði störf lögreglunnar og gerði þau tortryggileg. Útvarpsstjóri sem var lögreglustjóri ætti að hafa þá starfsskyldu að benda starfsfólki sínu á skyldu sína skv. lögum m.a. um hlutlægni í fréttaflutningi. En útvarpsstjóri virðist ekki hafa fundið sér neitt verkefni enn. Forveri hans las þó altént fréttir þannig að ekki var hann með öllu ónýtur.

Biskupinn yfir Íslandi þverar forsíðu Fréttablaðsins og biður um miskunn fyrir ólöglega innflytjendur, sem hefur þegar verið sýnd öll sú miskunn, sem útlendingalög kveða á um og þar er af miklu að taka enda hefur miskuninn þegar kostað skattgreiðendur hundruði milljóna hvað þessa ólöglegu innflytjendur eina varðar. Sjálf telur þessi biskup ekki neina ástæðu til að sýna öðrum þessvegan undirmönnum sínum neina miskun og hefur hamast við að gleyma dæmisögu Jesú um bersyndugu konuna. (Sá yðar sem syndlaus er o.s.frv.)

Loks geltir Viðreisnarþingmaðurinn fyrrverandi, sem var talinn út af þingi eftir síðustu kosningar í leiðara Fréttablaðsins og segir að við búum við "fjandsamlega stefnu í útlendingamálum" Maðurinn veit greinilega ekki að það er engin þjóð í Evrópu, sem hefur jafn vinsamleg lög hælisleitendum og við Íslendingar.

Stjórnmálaelítan og fréttaelítan ásamt Garminum í Gnipahelli í líki biskupsins yfir Íslandi eru annað hvort á harðahlaupum undan eigin ákvörðunum eða stefna að því væntanlega vísvitandi, að eyðileggja íslenskt velferðarkerfi, öryggi og velferð þessarar þjóðar með því að skipta um þjóð í landinu. Aumt er að sjá þetta lið allt í einni lest eins og Bólu Hjálmar orti á sínum tíma.

Eru virkilega ekki til stjórnmálamenn á Íslandi sem þora að stíga fram og taka upp baráttuna fyrir íslenska þjóð, menningu og gildi og standa vörð um að þessi auðæfi glatist ekki í þjóðarhafinu vegna skammsýni stjórnmálafólks, sem þorir ekki að standa við sannfæringu sína og eigin aðgerðir en varpar meintri sök á þá,sem skipað er til þeirra verka sem það sjálft hefur krafist af þeim.

 

 

 

Boris valdi rétt

Boris Johnson hefur ákveðið að gefa ekki kost á sér við leiðtogakjör íhaldsflokksins að þessu sinni. 

Vafalaust var það rétt ákvörðun hjá honum. Hann hefur takmarkaðan stuðning í þingflokknum og í partygate málið er enn óuppgert. Allt partístandið við embættisbústað hans á tímum útgöngubanns og samkomutakmarkanna vegna Covid mæltist illa fyrir. En enn verr, að hann skyldi ekki segja þinginu satt.

Í Bretlandi er það litið allt öðrum og alvarlegri augum en hér þegar ráðherra segir þinginu ekki satt. 

Tími Boris Johnson að leita eftir endurkjöri svo skömmu eftir að hann hrökklaðist úr leiðtogastöðunni var því klárlega ekki núna. Hann þarf því að bíða enn um stund eftir að þjóðin kalli á hann, ef hún gerir það þá nokkru sinni aftur.

Boris gefur ekki kost á sér

Flóttamannabúðir

Meira en 3 þúsund beiðnir fólks um alþjóðlega vernd, þ.e. mismunandi löglegra og ólöglegra innflytjenda hafa borist á árinu 2022. Talsmaður Rauða Krossins í þessum málum segir að e.t.v. þufi að koma upp flóttamannabúðum (notaði fínna orð.) 

Neyðarkallið kemur ekki á óvart. Við erum með gölnustu stefnu í innflytjendamálum í allri Evrópu. Eðlilega eykst því straumur fólks hingað í stöðugt auknara mæli eftir því sem kostir þrengjast fyrir gervihælisleitendur í öðrum löndum.  

Í haust mótmælti hópur ungs fólks í Reykjavík vegna skorts á dagheimilisplássum fyrir börn vinnandi fólk. Að hluta til stafa erfiðleikarnir af fjölgun hælisleitenda. Sama er varðandi húsnæðisskortinn. 

Á sama tíma og Kína tekur ekki við hælisleitendum og Saudi Arabar telja að flóttamannavandi í Arabíu komi þeim ekki við og þá ekki heldur Japanir, þá er pólitíska elítan á Íslandi svo snargalin, að telja að við séum Guðs útvalin þjóð, til að taka við hvaða hlaupastrák sem vera skal á kostnað skattgreiðenda.  

Ríkisstjórnin stefnir að því lóðbeint með hælisleitendadekri sínu að gera lífskjörin í landinu verri og svipta Íslendinga aðgangi að  grunnþjónustu. 

Samþykkja kjósendur það að stjórnmálaelítan haldi áfram að skaða lífskjörin í landinu með þessari gölnu stefnu í málefnum útlendinga.  

 

Glæsilegur sigur hægri manna á Ítalíu. Til hamingju Ítalía.

Hægri fylkingin á Ítalíu vann góðan sigur í þingkosningunum í gær. Talið er að hægra bandalagið muni fá allt að 60% þingsæta í báðum deildum ítalska þingsins.

 

Sigurvegari kosningana er Giorgia Meloni í flokki sem fjölmiðlaelítan á Vesturlöndum  hefur stimplað sem fasistaflokk. Þegar stefna Meloni og flokks hennar er skoðuð, þá verður ekki séð að um svonefndan hægri öfgaflokk sé að ræða eða stjórnlyndan andlýðræðissinnaðan flokk eins og fasistar voru. 

Nú þegar Meloni hefur unnið góðan sigur og fylgi rúmlega 26% þjóðarinnar og hægri fylkingin með góðan meirihluta, þá segja þessir sömu fjölmiðlar að nú fái Ítalía hægri sinnuðustu stjórnna frá því að gamli Benito Mussolini var við völd fyrir 100 árum. Hugmyndafræði hans var hinsvegar rótfest í sósíalisma og hann var pennavinur Lenin. Stjórn Mussolini var því engin hægri stjórn, en vonandi verðu stjórn Meloni það og því ólík stjórn Mussolini.

Sérkennilegt að konur skuli ekki fagna því, að kona verði forsætisráðherra í fyrsta skipti á Ítalíu. E.t.v. passar það ekki vinstri sinnaðri femínistahreyfingu að gera það. 

En hver eru helstu baráttumál Meloni og flokks hennar?

Aðaláherslan er fjölskyldan og hefðbundin fjölskyldugildi. Er það öfgafull hægri stefna?

Í annan stað leggur Meloni áherslu á að stjórna með þeim hætti, að fólk verði stolt af því að vera Ítalir. Sjálfsagt ofstopafull hægri stefna eða hvað?

Hún hafnar því að samtökin 78 hafi með kynfræðslu í skólum Ítalíu að gera. Eitthvað sem að íslensk stjórnvöld og bæjarstjórnir ættu líka að gera enda sérstakt þegar kirkjan má ekki koma með sína boðun í skólana, en transarar mega prédika fagnaðarerindi kynskiptaaðgerða. 

Meloni vill að Ítalir taki stjórnina á landamærum landsins og takmarki innflutning fólks. Er það öfgafull hægri stefna að vilja stjórna landamærum eigin ríkis. Valdhafarnir í Brussel segja það.

Sú afstaða Meloni, að hafna kynfræðslu samtakanna 78 á Ítalíu og berjast gegn óheftum innflutningi og útbreiðslu Íslam á Ítalíu hefur orðið til þess að Evrópusambandið og Gilitrutt von der Leyen hóta öllu illu ef stjórn Meloni ætlar að gera alvöru úr því að framkvæma stefnu sína í innflytjendamálum og hafna forsjá samtakanna 78 í kynfræðslumálum skólabarna.

Þá liggur það alla vega fyrir hvað eru mikilvægustu og hjartfólgnustu baráttumál Evrópusambandins og þingmenn á Íslandi mættu skoða það hvort þeir vilja lúta yfirþjóðlegu valdi eins og strákana í Brussel og sætta sig við það að geta ekki tekið sínar eigin pólitísku ákvarðanir án þess að eiga það á hættu að Evrópusambandið beiti refsiaðgerðum. 

Raunar má segja að sigur Meloni og félaga hafi um leið verið ósigur Evrópusambandsins. Nú bætist Ítalía í flokk með Pólverjum, Slóvökum og Ungverjum o.fl., sem hafna stefnu Evrópusambandsins í þessum málum og gera kröfu til þess að njóta fullveldis varðandi það hvað börnum er kennt í skólum og hverjir fái að setjast að í löndum þeirra. 

Er það virkilega svo, að það sé stór hópur þingmanna á Íslandi,sem vill afsala fullveldi íslensku þjóðarinnar til Brussel og sæta því að búa við ógnanir, hótanir og refsiaðgerðir Evrópusambandsins ef ekki er farið að því sem valdhafarnir í Brussel vilja. Það er nauðsynlegt að afhjúpa þá, sem vilja selja fullveldi þjóðarinnar fyrir baunadisk eins og Esaú gerði forðum þegar hann afsalaði sér fæðingarrétti sínum.

 

Kominn tími til að breyta.

Fáir hefðu trúað því,að forsætisráðherraskipti í Bretlandi mundu leiða til mikilla pólitískra breytinga. Sami flokkur, annað fólk.

Forsætisráðherran, Liz Trusss ætlar að stjórna á hugmyndafræðilegum forsendum hægri manna. Þó Íhaldsflokkurinn hafi verið í ríkisstjórn síðustu 10 ár, þá hefur ríkisbáknið þanist út og skattheimta aukist. Til hvers var þá barist?

Það verður að breyta þessu segir Liz Truss og fjármálaráðherra hennar Kwasi Kwarteng og fylgja loforðum og stefnumálum, hægri manna um að draga úr umsvifum ríkisins og lækka skatta.

Kwasi Kwarteng fjármálaráðherra lagði fram fjárlagafrumvarp sitt í síðustu viku og þar komu fram breytingar sem miða við að auka samkeppni í þjóðfélaginu, laða að alþjóðlega fjárfestingu m.a. með skattalækkunum. Stefnt er að auknum hagvexti með því að gefa borgurunum tækifæri til að nota peningana sína sjálfir í auknum mæli í staðinn fyrir að ríkið ráðskist með þá í allskonar millifærslum og gæluverkefnum.

Mikið hefði verið ánægjulegt, að sjá samskonar stefnumótun hér á landi varðandi báknið og fjárlagafrumvarpið. 

Það þarf að lækka skatta hér og megra ríkisbáknið, þók ekki væri til annars en að fólk hefði aukna möguleika til fjárfestinga t.d. í íbúðarhúsnæði.

Er ekki löngu tímabært að lækka tekjuskatt, tryggingargjald, fjármagnstekjuskatt og hætta að vaða í aldraða og öryrkja með því að skattleggja lágmarkstekjur sem og sparnað eldri borgara sbr.séreignarlífeyrissparnað. 

Ísland þarf á því að halda ekki síður en Bretland, að vikið sé af leið vinstri manna um upptöku fjármuna einstaklinga, gegndarlausra millifærslna og sívaxandi ríkisbákns þar sem meir en helmingur vinnuaflsins vinnur nú orðið hjá hinu opinbera. Það getur aldrei gengið. 

Það er löngu tímabært að fara í markvissa stefnumótun til að draga úr ríkisbákninu og ofurskattheimtunni á stjórnmálalegum forsendum í stað þess að láta möppudýrin í stjórnarráðinu, ein, ráða ferðinni. 

Stjórnarskipti í Svíþjóð

Þegar örfá atkvæði eru ótalin í sænsku kosningunum er hægri blokkin með meirihluta og tekst vonandi að koma á starfhæfri ríkisstjórn.

Stórtíðindi kosninganna er að Svíþjóðardemókratarnir eru orðnir næststærsti flokkur Svíþjóðar með yfir 20% fylgi. Við sem eigum hugmyndafræðilega samleið í innflytjendamálum með Svíþjóðardemókrötum bæði fögnum þessari niðurstöðu og óskum þeim til hamingju með gott starf og árangur. 

Hingað til hafa aðrir hægri flokkar komið fram við Svíþjóðardemókratana eins og þeir séu óhreinir. Góðir til að styðja hina, en eigi samt engu að ráða. Þannig er ekki hægt að fara að í pólitík og þessi afstaða tryggir eingöngu sósíalistum áframhaldandi völd. 

Staðreyndin er sú, að einn af hverjum 5 Svíum telja Svíþjóðardemókratana hæfasta til að leiða landsstjórnina. Það þýðir því lítið fyrir talsmenn flokka með 5-6% fylgi að vandræðast með að þeir séu ekki nógu góðir. Kjósendur hafa alltaf síðasta orðið í lýðræðisþjóðfélagi.

 

Svíar þrufa að fá góða starfhæfa ríkisstjórn hægri manna til að taka á orkuvandamálunum, bregðast við glæpagengjunum og vandamálum sem innflytjendastefna Svíþjóðar hefur valdið. Það er brýnt að vitræn ríkisstjórn taki við í Svíþjóð eftir langvarandi óstjórn sósíalista þar sem allt hefur rekið á reiðanum og ástandið orðið verra og verra. 

Sænskir sósíalistar sýna sitt rétta andlit

Vel til fundið hjá sósíalistum í Svíþjóð, að halda lokafund kosningabaráttunnar í Rinkeby hverfinu í Stokkhólmi. Þar hamaðist forsætisráðherran að Svíþjóðardemókrötum og kallaði þá öllum hefðbundnum illum nöfnum. Hún minntist hins vegar ekki á, að í Rinkeby hverfinu eru fjölmargir íbúar, í tengslum við Hamas, Hezbollah, Abu Nidal o.fl. hryðjuverkasamtök Íslamista og fannst allt í lagi að vera í samneyti með þeim.

Sósíaldemókratar eiga mikið fylgi í Rinkeby hverfinu þar sem um 90% íbúa eru innflytjendur eða afkomendur innflytjenda. Svo margir Sómalar búa í þessu hverfi, að það hefur stundum verið uppnefnt litla Mogadishu. Óeirðir eru tíðar í hverfinu, mikið um glæpi og eignaspjöll. Ráðist var ítrekað á lögreglustöðina og þegar byggja þurfti nýja,  neituðu verktakar að fara inn í hverfið nema að fá lögregluvernd. 

Í þessu umhverfi virðist sósíalistum í Svíþjóð líða best enda eiga þeir mest fylgi þar sem innflytjendur eru flestir. 

Það er dapurlegt að horfa upp á þessa miklu hnignun og þjóðfjandsamlegu stefnu sænskra sósíalista. Vonandi bregðast kjósendur við með að kjósa þá ekki, en greiða þess í stað Svíþjóðardemókrötunum og Moderata Samlingspartiet atkvæði sitt. 

Svíþjóðardemókratar hafa heldur betur unnið til þess, að Svíar veiti þeim öflugt brautargengi. Þeir hafa verið rödd skynseminnar í innflytjendamálum og mátt þola útilokun stjórnmálastéttarinnar og fjölmiðla, en hafa samt aukið fylgi sitt í hverjum kosningum og vonandi gengur það eftir í dag. 

Svíþjóð þarf að skipta um stefnu í innflytjendamálum og huga að hagsmunum sænskra borgara, eflingu sænskrar menningar og þjóðlegra gilda. Raunar er brýn nauðsyn að Ísland geri það líka ef þeir vilja komast hjá að lenda í sama öngþveiti og Svíar.

Undir stjórn sósíalista þar sem innflytjendastefnu þeirra hefur verið framfylgt og ekki má segja frá neinu sem þá varðar, hefur glæpatíðni aukist gríðarlega, fjöldi nauðgana er hlutfallslega mest í Svíþjóð í veröldinni, mörg hverfi eru lokuð innflytjendahverfi og skotárásir eru orðnar daglegt brauð í þessu áður fyrirmyndarríki. 

Vonandi sjá sænskir kjósendur að það þarf gjörbreytta stefnu í innflytjendamálum, stefnu þar sem hagsmunir sænskra borgara eru í öndvegi.

 

Tjaldað til einnar nætur

Þegar nokkur sveitarfélög sömdu við ríkið um móttöku ólöglegra innflytjenda, töldu sveitarstjórnarmenn sig vera að gera góða samninga og peningar streymdu í bæjarsjóð. 

Þau lögðust á árar ásamt ýmsum öðrum skammtíma hagsmunaaðilum, við að troða sem flestum ólöglegum innflytjendum inn í landið og verja gjörsamlega galna stefnu um opin landamæri. 

Að því hlaut að koma að þessi stefna gengi ekki upp. 

Staðan er sú að þeir sem koma til landsins ólöglega eru komnir til að vera og er nánast aldrei vísað burt og jafnvel þó að dómar hafi fallið um að þeir séu hér ólöglega halda þeir samt styrkjum frá ríkinu, sem er ekkert annað en fráleit og siðlaus meðferð á almannafé.

Sveitarfélögn tjölduðu til einnar nætur og eru nú að uppskera eins og þau sáðu. Kostnaður við hælisleitendur er óendanlegur. 

Svo furðar fólk sig á því að það sé skortur á íbúðarhúsnæði, heimilislæknum, dagheimilum, skólum o.s.frv. og setur það almennt ekki í samband við þann fjölda, að hælisleitenda, sem streymir til landsins og allt fólk þarf almenna þjónustu. 

Hvernig stendur á því að það er ekki meirihluta vilji fyrir því á Alþingi að taka upp svipaða stefnu í innflytjendmálum og Danir hafa tekið upp. Af hverju viljum við hafa greiðustu leiðina fyrir innflytjendur til okkar. Hún þýðir bara það eitt, að við fáum ekki lengur við neitt ráðið svipað og bæjarstjórn Hafnarfjarðar hefur nú áttað sig á. 

Alþingi verður að breyta lögum um innflytjenda- og hælisleitendamál þannig að þau veiti ólöglegum innflytjendum eða svonnefndum hælisleitendum ekki greiðari leið til velferðarkerfisins á Íslandi en nágrannalanda okkar. 

Það verður fróðlegt að fylgjast með störfum Alþingis í þessum málum í vetur og sjá hvort meirihlutinn vill standa með þjóð sinni og velferð hennar eða halda áfram á þeirri braut opinna landamæra, sem kostar gríðarlega fjármuni og það er bara byrjunin með óbreyttri stefnu. 

 

 

 

Innviðir sprungnir