Íslenska krónan ekki samkeppnisfær segir fyrrum formaður Sjálfstæðisflokksins.

Þorsteinn Pálsson ritstjóri Fréttablaðsins og fyrrum formaður Sjálfstæðisflokksins skrifar mjög góðan og athygliverðan leiðara í blað sitt í dag. Þar fullyrðir hann að lantgímavandi fyrirtækja og alls almennings í landinu sé að íslenska krónan sé ekki samkeppnisfær.

Þá bendir Þorsteinn á að raunverulegar ógöngur peningastefnunnar hafi komið fram þegar gengi hennar var sem hæst, en þá hafi lífskjörin og trúin á stöðugleikann verið látin ráðast af erlendurm lántökum en ekki verðmætasköpun. Það hafi verið sýndarveruleiki.

Loks segir Þorsteinn að vandinn felist í gjaldmiðlinum og bendir á að helstu forstöðumenn hagsviðs og hagrannsókna í Seðlabankanum hafi komist að þeirri niðurstöðu að krónan geti ekki tryggt sambærilegan stöðugleika og öflugt myntkerfi. Hann  segir einnig að bankastjórn Seðlabankans hafi ekki haft styrk til að taka á þessari umræðu.

Ég er sammála þeim sjónarmiðum og rökstuðningi sem Þorsteinn setur fram í leiðaranum og finnst kærkomið að loksins skuli forustumaður í Sjálfstæðisflokknum fjalla um þessi mál af alvöru. Það voru hins vegar  vonbrigði að forsætisráðherra skuli reyna að drepa umræðunni um peningamálastefnuna á dreif.

Framlag forsætisráðherra í umræðuna er raunar afar merkileg með vísan til þess að hann er lærður hagfræðingur.

Af leiðara Þorsteins verður þó ekki annað ráðið en að framsýn öfl innan Sjálfstæðisflokksins vilji beita sér fyrir nýrri stefnumótun í peningamálum og afstöðunni til Evrópusambandsins á meðan flokkseigendafélagið í Sjálfstæðisflokknum heldur sig fast við Davíðskuna.  Svo virðist sem það verði örlög Sjálfstæðisflokksins í bráð að halda sig við Davíðskuna.

Spurning er þá hvort að framsýnt, frjálslynt fólk á heima í flokknum meðan svo fer fram.

Fylgishrun Sjálfstæðisflokks í borgarstjórn.

Sjálfstæðisflokkurinn hefur tapað  þriðja hverjum kjósanda  frá síðustu kosningum skv niðurstöðu skoðanakönnunar  Félagsvísindastofnunar HÍ sem birtist í dag.  Fylgi við borgarstjórnarflokkinn mælist  um 29% en flokkurinn fékk um 43% atkvæða í borgarstjórnarkosningunum.

Skoðanakönnunin er gerð 2-22. júní. Hanna Birna Kristjánsdóttir tók við sem leiðtogi og borgarstjórnarefni  þ. 7. júni. Ætla mætti að það ásamt því umtali sem varð við leiðtogaskiptin,  þegar flokksforustan og fleiri flæmdu Vilhjálm Þ. Vilhjálmsson úr foringjastöðu í borginni, hefði orðið til að styrkja stöðu flokksins í skoðanakönnun eins og þessari. 

Fylgi Sjálfstæðisflokksins hefur venjulega mælst meira í skoðanakönnunum um sumur. Fylgi hans í skoðanakönnunum hefur  alltaf verið meira en hann fær við kosningar.  Þessi skoðanakönnun og skoðanakönnun Fréttablaðsins fyrir nokkrum dögum um fylgi flokksins á landsvísu bendir því til að Sjálfstæðisflokkurinn sé nú í verstu stöðu sem hann hefur nokkru sinni komist í frá stofnun hans.

Þá vekur athygli að stuðningur við borgarstjóra og félaga hans í Íslandshreyfingunni skuli mælast jafn lítið. Einungis rúmt 1% borgarbúa segjast munu kjósa hann. Þetta gerist þrátt fyrir það að borgarstjóri hafi verið áberandi í fréttum á tímabilinu þegar skoðanakönnunin var gerð.

Ég tek skoðanakönnunum alltaf með fyrirvara og líka þessari en þrátt fyrir það þá eru niðurstöðurnar ljósar með slaka stöðu Sjálfstæðisflokksins og Ólafs Magnússonar. Þá virðist Framsóknarflokkurinn ekki ná sér á strik en þar verður að líta til þess að flokkurinn mælist alltaf mun verr í skoðanakönnunum en í verunni. 

Frjálslyndi flokkurinn fékk um 8% fylgi í skoðanakönnun á landsvísu í Fréttablaðinu í byrjun vikunnar.  Það er því ljóst að væri Frjálslyndi flokkurinn tekinn með í skoðanakönnun eins og þessa þá myndi fylgi annarra flokka minnka en útilokað er að segja  um með vissu frá hvaða flokkum Frjálslyndir mundu taka en þó má ætla að það væri helst Sjálfstæðisflokkur og Samfylking.

Iðnaðarráðherra hunsar "Fagra Ísland"

Sama dag og Mörður Árnason varþingmaður Samfylkingarinnar og ritstjóri vefsíðu flokksins skrifar leiðarann " Almenningur styður stefnu Samfylkingarinnar Fagra Ísland", undirritaði iðnaðarráðherra Össur Skarphéðinsson viljayfirlýsingu um byggingu 250 þúsund tonna álvers á Bakka við Húsavík.

Við það tækifæri sagði Össur að stóriðja sem þessi væri jákvæð fyrir þær sakir að aðgætni væri viðhöfð gagnvart náttúrunni og var helst að skilja að það væri vegna þess að jarðvarmi væri nýttur.

Raunar verður ekki séð að það skipti umhverfismáli hvort stóriðja notar jarðvarma eða orku úr fallvötnum. Fróðlegt væri að iðnaðarráðherra skýrði hvaða umhverfislegi munur þar er um að ræða.

Mörður Árnason vefsíðustjóri Samfylkingarinnar segir að almenningur styðji "Fagra Ísland" stefnu Samfylkingarinnar í umhverfismálum. 

Í þeirri stefnumörkun segir m.a.  að slá eigi ákvörðunum um frekari stóriðjuframkvæmdir á frest þangað til fyrir liggur nauðsynleg heildarsýn yfir verðmæt náttúrusvæði Íslands og verndun þeirra hefur verið tryggð.  Í annan stað er talað um að úthluta mengunarkvótum og í þriðja lagi að sérstök félög sem fjármagni sig á markaði og greiði fyrir afnotarétt af auðlindum reisi virkjanir fyrir stóriðju. Ekkert af þessu kemur fram í viljayfirlýsingunni sem iðnaðarráðherra undirritaði.

Viljayfirlýsingin um að byggja 250 þúsund tonna álver á Bakka af Alcoa er ekki í samræmi við stefnumótunina "Fagra Ísland."  Hafi Mörður Árnason vefsíðuritstjóri  rétt fyrir sér að almenningur styðji stefnuna þá er ljóst  að ráðherrar Samfylkingarinnar í ríkisstjórninni gera það ekki. 

Eða hvað? 

 

Álversyfirlýsing undirrituð

Kemur verðbólgan engum á óvart?

Verðbólga mælist nú meiri en verið hefur í tæpa 2 áratugi. Þessi verðbólga virðist ekki koma neinum á óvart miðað við að greiningardeildir bankanna höfðu sumar spáð meiri verðbólgu en skráð er. Þrátt fyrir Evrópumet í stýrivöxtum til að vinna gegn verðbólgu hefur Seðlabankinn aldrei náð verðbólgumarkmiðum sínum. Þvert á móti má færa rök að því að stefna Seðlabankans sé mikill orsakavaldur vandans nú og þess vanda sem við stöndum frammi fyrir.

Efnahagsstefna ríkisstjórnarinnar og síðustu ríkisstjórna, einkum skattastefnan og síaukin útþensla opinbera báknsins ásamt vanhugsuðum og allt of takmörkuðum aðgerðum Seðlabankans leiddi til hágengis, spennu í efnahagslífinu og mikillar einkaneyslu. Þjóðin verður nú að taka afleiðingum af þessari vitlausu stefnu. Það var alltaf ljóst að það mundi koma að skuldadögunum. Þrátt fyrir það markaði hvorki ríkisstjórn né Seðlabanki neina stefnu um það hvernig bregðast ætti við þegar hágenginu yrði ekki lengur haldið uppi. Þegar skuldasöfnun þjóðarinnar gæti ekki haldið áfram og þegar verðbólgudraugurinn berði að dyrum.

Efnahagskreppur á Íslandi hafa hingað til stafað af lækkandi fiskverði og minnkandi sjávarafla. Nú er fiskverð hinsvegar í hámarki og útflutningsverðmæti haldast þrátt fyrir að heimilað sé að veiða minna en oftast áður. Efnahagskreppan nú er því af öðrum toga en áður. Hún er heimatilbúin. Hún er bein afleiðing hagstjórnarmistaka Seðlabanka og ríkisstjórna í rúman áratug.

Aukin umsvif og skattheimta hins opinbera er einn af helstu orsakavöldum þeirra efnahagsþrenginga sem við erum nú að ganga í gegn um. Það er því með ólíkindum að þrátt fyrir þetta og stöðugt vaxandi hlutar hins opinbera þá skuli talsmenn sósíalismans í Vinstri Grænum og Samfylkingunni nú kalla eftir enn meiri ríkisafskiptum og jafnvel þjóðnýtingu á kostnað skattborgaranna. 

Er ekki nóg komið af sósíalismanum sem Sjálfstæðisflokkurinn hefur staðið fyrir? Sjálfstæðisflokkurinn hefur síðasta áratug aukið útgjöld og umsvif hins opinbera þvert á stefnu sína? Sjálfstæðisflokkurinn hefur aukið skattheimtuna á launafólk í landinu en lækkað skatta þeirra sem best eru settir? Sjálfstæðisflokkurinn hefur gefið sumum þjóðarauðlindir og selt öðrum rýmingarsöluverði.  Sjálfstæðisflokkurinn hefur þannig  stundað sósíalisma í anda sérkenninegrar frjálshyggju?

Væri ekki skynsamlegra að takmarka umsvif hins opinbera, lækka skatta og leyfa borgurum þessa lands að ráða meiru um fjármál sín. Er nokkur hætta á því að fólkið mundi stjórna fjármálum sínum verr en ríkið og Seðlabankinn hefur gert fyrir það?

Verðbólga mælist 12,7%

Hann Birna leiðtogi Sjálfstæðismanna í Reykjavík.

Samstillt aðför Morgunblaðsins og forustu Sjálfstæðisflokksins tókst og Vilhjálmur Þ. Vilhjálmsson hættir sem oddviti borgarstjórnarflokks  Sjálfstæðisflokksins í Reykjavík og Hanna Birna Kristjánsdóttir tekur við. 

Það var fyrirséð að þannig mundi það verða vegna þess að flokkseigendafélagið í Sjálfstæðisflokknum var greinilega búið að ákveða þetta fyrir nokkru eða jafnvel löngu. 

Það bíður Hönnu Birnu óneitanlga erfitt verkefni. Í fyrsta lagi þarf hún að vinna að því að borgarstjórnarflokkur Sjálfstæðisflokksins verði trúverðugur. Í öðru lagi bíður hennar líka það verkefni að móta stefnu í borgarmálum sem aðgreinir Sjálfstæðisflokkinn frá hinum flokkunum í borgarstjórn. Staðreyndin er sú að stefna flokkana í borgarmálum er svo áþekk og einsleit að iðulega er erfitt að gera sér grein fyrir hver ágreiningurinn er á milli flokkana ef hann er þá yfir höfðu nokkur. Þetta veldur því að allir flokkarnir í borgarstjórn eiga svo auðvelt með að vinna saman. Málefnin þvælast ekki fyrir þeim.

Verst er að það skuli ekki vera fulltrúar frjálsyndrar einstaklingshyggju í borgarstjórn. Slíkir fulltrúar mundu ekki líða þá sóun, bruðl og síðast en ekki síst óheyrilega sjálftöku borgarfulltrúa og varamanna þeirra sér til handa á fjármunum borgarbúa.

Það vantar fulltrúa aðhalds sparnaðar og heilbrigðrar skynsemi í borgarstjórn. Fulltrúa sem hafa ákveðna stefnu og framtíðarsýn í borgarmálum. Fulltrúa sem vinna að því að eðlilegar samgöngur verði í borginni og út úr og inn í hana. Sjái til að hreinsun borgarinnar sé með eðlilegum hætti en borgin fari ekki aftur og aftur yfir hættumörk vegna svifryksmengunar.  Slíka fulltrúa verðum við að fá eftir næstu borgastjórnarkosningar. 

Obama forsetaframbjóðandi Demókrata

Sem betur fer hefur Hillary Clinton loks lýst sig sigraða og mun lýsa yfir stuðningi við Barack Obama væntanlega í dag.  Frú Clinton hefði betur gert þetta fyrir mánuði síðan þegar ljóst var að barátta hennar var töpuð.

Obama ætti að eiga góða möguleika á að sigra í forsetakosningunum því að staða Repúblikana er svo slæm eftir forsetatíð George W. Bush jr. Ekki bætir úr skák að nefnd Bandaríkjaþings skuli nú hafa komist að þeirri niðurstöðu að þeir Bush og Cheney varaforseti beittu þjóðina blekkingum til að fara í löglaust stríð gegn Írak. Það gæti leitt til ákæru á hendur þeim í framtíðinni.

Þeir Davíð Oddsson og Halldór Ásgrímsson áttu hins vegar að átta sig á því að árásarstríð á Írak var ólögleg innrás á fullvalda ríki.  Samt drógu þeir Ísland inn í hóp viljugu ríkjanna sem bera siðferðilega ábyrgð ásamt Bandaríkjamönnum á ólögmætri innrás í Írak. 

En Obama er sigurvegari í fyrstu lotu og vonandi verður hann það líka í nóvember.

Pólitísk aftaka?

Skoðanir ritstjórnar Morgunblaðsins koma fram í ritstjórnargreinum blaðsins og í Staksteinum. Í Staksteinum í gær segir:

"Nú þarf stjórnmálamaðurinn Vilhjálmur Þ. Vilhjálmsson að gera slíkt hið sama og axla pólitíska ábyrgð sína og hverfa af vettvangi stjórnmálanna."

Síðar segir í Staksteinum að það hafi komið fram í fréttaskýringu Péturs Blöndal alþingismanns  í Morgunblaðinu að það sé vilji borgarfulltrúar Sjálfstæðisflokksins, þingmanna flokksins og flokksforustu að Vilhjálmur Þ. Vilhjálmsson hverfi af vettvangi stjórnmálanna.

Aldrei fyrr hefur verið veist að pólitískum forustumanni Sjálfstæðisflokksins í borgarstjórn Reykjavíkur með þeim hætti sem gert er í Morgunblaðinu. Raunar minnist ég þess ekki að Morgunblaðið hafi fyrr farið þannig fram gagnvart forustumanni Sjálfstæðisflokksins þegar eining er að öðru leyti í flokknum. Formaður Sjálfstæðisflokksins hefur raunar lýst yfir stuðningi við Hönnu Birnu og hefur þar með komið sínum skilaboðum á framfæri gagnvart Vilhjálmi Þ Vilhjálmssyni.

En hvað er vandamálið . Af hverju þarf að veitast að Vilhjálmi Þ. Vilhjálmssyni með þessum hætti í fréttaskýringum og ritstjórnarpistlum Morgunblaðsins?  

Sé það vilji borgarfulltrúa Sjálfstæðisflokksins að Vilhjálmur Þ. eigi að víkja þá afgreiða þeir málið. Málið er ekki flóknara en það.  Er það ekki sérkennilegt að það skuli vera gelt að forustumanni Sjálfstæðisflokksins með þessum hætti  utan úr bæ? Þess ætti ekki að vera þörf nema ef svo skyldi vera að borgarstjórnarfólk Sjálfstæðisflokksins sé þeim annmörkum háð að það geti ekki gengið frá nauðsynlegum afgreiðslum og tekið ákvarðanir.

Þarf Morgunblaðið og aðrir aðilar í flokkseigendafélagi Sjálfstæðisflokksins að ákveða málið fyrir borgarstjórnarflokkinn? Af hverju gengur borgarstjórnarflokkurinn ekki frá sínum málum sjálfur? 

Obama sigurvegari.

Loksins hefur Obama tryggt sér nægjanlega marga kjörmenn til að ná tilnefningu Demókrataflokksins sem forsetaefni skv upplýsingum helstu fréttamiðla vestra.  Obama verður fyrsti hörundsdökki maðurinn sem verður þá í framboði fyrir einn af stóru flokkunum vestra.

Nú er að sjá hvort að kjósendur í Bandaríkjunum láta það skipta máli hvaða húðlit Obama hefur eða ekki.  Ég hef fylgst með forkosningum Demókrata. Mér hefur komið á óvart hvað fordómarnir hafa verið litlir gagnvart Obama í þeim kosningum. Satt að segja bjóst ég við meiri fordómum gagnvart honum vegna litarháttar hans.

Barack Obama er athygliverður stjórnmálamaður hann hefur sýnt það í kosningabaráttunni að hann kveikir von í brjósti fólks og talar á jákvæðan hátt um vandamálin. Það verður gaman að fylgjast með viðureign hans og John Mc Cain. John Mc. Cain er athygliverður og góður stjórnmálamaður en hann geldur þess vafalaust að George W. Bush hefur verið mistök sem forseti. Þess vegna eru líkur á að Obama verði næsti forseti, en það er enn nokkuð í land.

Spurning er hvort Obama er ekki einmitt það forsetaefni sem að á bestu möguleika á að endurvinna traust til Bandaríkjanna í þeim hlutum heimsins sem Bandaríkin hafa gjörsamlega tapað trausti í forsetatíð George W. Bush.

Merkur ritstjóri lætur af störfum.

Styrmir Gunnarsson er tvímælalaust einn merkasti ritstjóri og blaðamaður sem við höfum átt. Hann hefið getað haslað sér völl með öðrum hætti í pólitíkinni hefði hann kosið það og orðið einn af helstu forustumönnum Sjálfstæðisflokksins á Alþingi og líklega í ríkisstjórn. Styrmir Gunnarsson kaus hins vegar að heyja sína pólitísku baráttu sem ritstjóri Morgunblaðsins. Hann hefur vafalaust séð að hann var mun áhrifameiri í íslenskum stjórnmálum með þeim hætti en með því að láta af ristjórastörfum og setjast á Alþingi.

Það er raunar nokkur nýlunda að tveir síðustu ritstjórar Morgunblaðsins þeir Matthías Johanessen og Styrmir Gunnarsson skuli hvorugur hafa setið á þingi eða gælt svo nokkru nemi við þingmennsku. Fyrirrennarar þeirra t.d. Eyjólfur Konráð Jónsson, Sigurður Bjarnason og að ógleymdum Bjarna Benediktssyni hurfu frá ritstjórnarstörfum á Morgunblaðinu og settust á þing og mörkuðu hver með sínum hætti spor sín í póilitíks síns samtíma.

Ég hef lengi haldið því fram að Styrmir Gunnarsson væri eini pólitíski áhrifamaðurinn í íslenskri blaðamennsku  og kemur þar margt til m.a. yfirburðaþekking á íslenskum þjóðmálum og stjórnmálamönnum sem því miður virðist vera af æ skornari skammti meðal íslenskra blaðamanna.

Styrmir hefur alltaf haft ákveðnar skoðanir í pólitík og verið trúr þeirri varðstöðu sem hann hefur tekið sér hverju sinni.

Við Styrmir höfum verið samferðarmenn að nokkru í íslenskri pólitík. Ég sat í stjórn hjá honum þegar hann var formaður Heimdallar félags ungra Sjálfstæðismanna og mér fannst þá og finnst enn að Styrmir hafi verið góður formaður Heimdallar og hrinti á þeim tíma stórvirkjum í gang sem sjást ekki lengur á vettvangi ungra manna í pólitík.  Ég leyfi mér að halda því fram að við Styrmir höfum yfirleitt verið sammála um stefnuna í þjóðmálum þó að okkur hafi hins vegar greint verulega á um afstöðu til einstaklinga. Það  varð til þess að við skipuðumst á sínum tíma með ólíkum hætti í hópa  innan Sjálfstæðisflokksins meðan við störfuðum þar báðir.

Styrmir Gunnarsson hefur öðrum fremur áttað sig á því í hvaða vanda Sjálfstæðisflokkurinn er í dag. Það sést m.a. á skrifum hans undanfarna daga um borgarstjórnarflokk Sjálfstæðisflokksins og margt annað.

Mér finnst ólíklegt annað en að Styrmir Gunnarsson hasli sér áfram völl á síðum Morgunblaðsins og það verður fróðlegt að lesa skrif hans þegar hann er ekki lengur bundinn af þeirri byrði sem það óneitanlega er að vera ritstjóri Morgunblaðsins.

Ritstjóraskipti á Morgunblaðinu

Ríkisstjórnin brýtur rétt á borgurum sínum.

Mannréttindanefnd Sameinuðu þjóðanna úrskurðaði á síðasta ári að íslenska fiskveiðistjórnarkerfið bryti í bág við 26. gr. sáttmálans um  borgaraleg og stjórnmálaleg réttindi. Um er að ræða sáttmála sem Ísland hefur undirritað og fullgilt.  Mannréttindanefndin gaf íslenskum stjórnvöldum 180 daga frest til að bregðast við og leggja tillögur um umbætur fyrir nefndina.

Nú eru 14 dagar eftir af frestinum og sjávarútvegsráðherra upplýsti á Alþingi í dag að hann mundi ekki leggja neinar tillögur fyrir til að koma í veg fyrir áframhaldandi mannréttindabrot og taldi auk heldur spurningu um hvort að við værum bundin af þjóðarrétti af áliti mannréttindanefndarinnar.

Í mínum huga er engin spurning um að við erum bundin að þjóðarrétti. Benda má á að um fullgildan alþjóðasamning er að ræða og við höfum skuldbundið okkur til að fara eftir honum. Þá tók íslenska ríkið til varna og véfengdi ekki hæfi nefndarinnar meðan málsmeðferð stóð gegn Íslandi.

Við þingmenn Frjálslyndra og vinstri grænna lögðum fram þingsályktunartillögu í janúar þar sem lagt var til að Alþingi ályktaði að farið skyldi að niðurstöðum mannréttindanefndarinnar. Sú tillaga fékk við umræður á Alþingi stuðning allra flokka nema Sjálfstæðisflokksins en fæst ekki afgreidd úr sjávarútvegsnefnd þingsins. Þannig kemur annar ríkisstjórnarflokkurinn í veg fyrir að vilji Alþingis í málinu komi skýrt og ótvírætt fram.

Þetta er atlaga að þingræðinu og virðingu Alþingis. Við munum ekki gefast upp við að koma málinu á dagskrá þegar þing kemur saman í haust. 

Það kemur ekki til greina að Ísland haldi áfram að brjóta mannréttindi á borgurum sínum.