Ítrekað lögbrot umboðsmanns Alþingis

Umboðsmaður Alþingis hefur það hlutverk að gæta þess að stjórnsýslan fari að lögum, starfi samkvæmt vönduðum stjórnsýsluháttum og siðareglum.  Umboðsmanni ber að gefa Alþingi og almenningi árlega skýrslu um starfsemi sína, og segir í lögum um umboðsmann nr. 85/1997 að skýrsluna skuli „prenta og birta opinberlega fyrir 1. september ár hvert“.

Í byrjun þessa mánaðar var fundur í stjórnskipunar-og eftirlitsnefnd Alþingis þar sem nýútkomin skýrsla Tryggva Gunnarssonar, umboðsmanns Alþingis, fyrir árið 2011 var kynnt.  Þetta var um tveimur mánuðum eftir lögbundin tíma.  Skýrsla umboðsmanns fyrir árið 2010 kom einnig töluvert eftir lögbundinn tíma.  Þannig hefur umboðsmaður ítrekað brotið lög sem um störf hans gilda.  

Tryggvi Gunnarsson, umboðsmaður, hefur í fjölmiðlum borið því við að stofnunin sé fáliðuð og verkefnin hafi aukist.  Sjálfsagt geta flestar stofnanir ríkisins sagt sömu sögu.  Umboðsmaður sjálfur hefur dæmt slík viðhorf léttvæg og ekki sparað stóru orðin þegar stjórnsýslustofnanir brjóta gegn lögbundnum frestum.  Þannig sagði hann t.d í einu máli :

„Þegar löggjafinn hefur bundið afgreiðslufresti í lög ber stjórnvöldum að haga skipulagi í störfum sínum og meðferð mála með þeim hætti að tryggt sé að þessir frestir séu haldnir“.

Það er illt í efni þegar eftirlitsaðili stjórnsýslunnar brýtur ítrekað lög.   Umboðsmaður Alþingis getur ekki gert minni kröfur til sjálfs sín en hann gerir til þeirra sem eftirlit hans beinist að – þá glatar embættið trúverðugleika og athugasemdir þess missa marks.

Nú er spurningin hvernig Alþingi  tekur á ítrekuðu lögbroti undirstofnunar sinnar, einkum í ljósi atlögunnar að Ríkisendurskoðun.  Alþingismenn hafa viðhaft stór ummæli um reglufestu, ábyrgð og aðhald í stjórnsýslunni.  Starfsemi umboðsmanns er á ábyrgð Alþingis. Nú reynir á hvort að þingmönnum er alvara eða hvort undirstofnun þingsins kemst upp með lögbrot og slæma stjórnsýslu áminningarlaust?

(Grein sem birtist í Morgunblaðinu í dag 13.11.2012.)

Athugasemdir

[jóhanna (IP-tala skráð) 13.11.2012 kl. 23:37]

Við þurfum ekkert að kippa okkur upp við seinagang hjá embættum alþingis. Umboðsmaður alþingis. Hefur hann nokkuð úrslitavald í einu eðe neinu? Var ekki Ríkisendurskoðun lika eitthvað aftarlega á merinni tímalega séð? Átta eða níu ár var skýrslan í bígerð. Fyrir rest var litið á þessa pappíra sem nokkurs konar sagnarit sem hentugt væri að grípa í til seinni tíma litið. Já, það gerast hlutir í kring um Alþingi ennþá.Og ekki er öll nótt úti enn, sagði draugurinn. Svo við eigum von á ýmsum skondnum gjörningum frá þeim sem sem vilja selja undan okkur Hólmann.

[Óli Már Guðmundsson, 14.11.2012 kl. 10:32]

Ég held að alþingismennirnir séu ekki í stakk búnir að dæma einn eða neinn, ekki fyrr en þeir hafa gert hreint hjá sér með peningamál sín í prófkjörum og kosningum.