Sumarlokanir á tímum loftrýmiseftirlits

Í fréttum í dag er sagt frá því að loka eigi öldrunaríbúðum á Þingeyri yfir sumartímann og flytja þá sem þar búa á Ísafjörð. Fljótlega sjáum við fréttir um sumarlokanir sjúkradeilda og aðrar sparnaðarráðstafanir vegna sumarleyfa.  Skert þjónusta er óumflýjanleg segja forstöðumennirnir vegna þess að við höfum ekki peninga til annars. Sjálfsagt allt rétt.

En hvað með peningana í óþarfa loftrýmiseftirlit. Loftrýmiseftirlit sem felst í því að fá hingað krakka frá hinum ýmsu NATO þjóðum með dýru herþoturnar sínar til að æfa sig á kostnað skattgreiðenda á Íslandi. Væri ekki nær að spara þann pening og tryggja öldruðum áhyggjulaust ævikvöld eins og Sjálfstæðisflokkurinn og Samfylkingin hafa lengi haft á stefnuskrá sinni.

Er loftrýmiseftirlit ef til vill mikilvægara en vellíðan aldraðra og öryrkja í núinu?

Almenningur er lúbarinn aftur og aftur.

Upplýsingar úr uppgjörum bankanna fyrir fyrsta fjórðung ársins sýna gengishagnað þeirra á þeim ársfjórðungi upp á 85.6 milljarða íslenskra króna. 

Hvað þýðir það?  Bankarnir keyptu erlenda gjaldmiðla fyrir krónur á þessu tímabili  og ollu að verulegum hluta miklu gengisfalli íslensku krónunnar.  Vegna þessara aðgerða bankanna gerðist m.a. eftirfarandi:

1. Bankarnir gátu sýnt góðan hagnað á ársfjórðungnum vegna gengismunarins.

2. Þeir lækkuðu gengi krónunnar verulega

3. Þeir hækkuðu með þessu gengisbundin lán.

4. Þeir hækkuðu með þessu lán bundin vísitölu neysluverðs til verðtryggingar.

5.  Seðlabankinn hækkaði stýrivexti.

Skuldirnar þínar hækkuðu og vaxtakjörin versnuðu vegna þess að stóru leikendurnir gátu gert það sem þeir vildu á þinn kostnað. Þeir eru ekki þeir einu. Það eru fleiri stórir aðilar sem geta gert þetta og ráðið genginu innan dagsins og tekið mikinn hagnað út úr kerfinu.

Ég hef gagnrýnt þetta frá því að krónan var sett á flot markaðsgengis. Það er fráleitt að minnsta myntsvæði í heimi standi gjörsamlega óvarið gagnvart öllum stórum aðilum eins og við látum viðgangast hjá okkur varðandi krónuna.

Nú sést að hluta hvaða þýðingu þetta kerfi getur haft fyrir fólkið í landinu.

Það er gjörsamlega óásættanlegt að við skulum hafa stjórnvöld sem sætta sig við og stuðla að því að almenningur í landinu skuli þurfa að sæta þeim afarkjörum sem aðilar á fjármálamarkaði og spekúlantar geta búið til vegna vitlausrar stefnu í gengismálum og algjörs ábyrgðarleysis stjórnvalda varðandi gengisskráningu krónunnar.

Elliheimilum lokað en loftrýmið er varið stundum.

Í sumar á að loka öldrunarheimilinu á Þingeyri og vafalaust fleiri öldrunarheimilum. Væntanlega hefur verið gerð áætlun um að loka deildum á sjúkrahúsum vegna þess að peningar fást ekki til að halda uppi fullri þjónustu yfir sumarmánuðina.

Á meðan borgum við fyrir erlendar flugsveitir NATO ríkjanna sem hér dveljast stundum við heræfingar sem heitir loftrýmiseftirlit. Þrátt fyrir þetta loftrýmiseftirlit er loftrýmið blessað óvarið meiri hluta ársins. Gildi loftrýmiseftirlitsins eins og það er skipulagt miðast við það að hugsanlega gætu einhverjir fávitar viljað gera eitthvað af sér í loftrými Íslands. Sæmilega skynsamur árásaraðili mundi eðlilega bíða þangað til ekkert lofrtýmiseftirlit er fyrir hendi. Þetta fyrirkomulag getur ekki verið annað en aðhlátursefni út frá herfræðilegum og húmorískum sjónarmiðum.

Það er hins vegar ekkert gamanmál og getur kostað mannslíf að forgangsraða vitlaust eins og nú er gert. Loftrýmiseftirlitið skal kosta en loka á þjónustu fyrir sjúklinga og aldraða að hluta.  

Vill Sjálfstæðisflokkurinn nýja ríkisútgerð?

Einn þingmaður Sjálfstæðisflokksins telur eðlilegt að skoða það hvort stofna eigi til nýrrar ríkisútgerðar eða eyða skattfé til að styrkja strandsiglingar.  Þingmaðurinn komst að þessari niðurstöðu eftir að samgönguráðherra sagði honum að ein ferð flutningabíls með tengivagn orsakaði jafn mikið slit á vegum og ferðir 12.000 fólksbíla.  Þetta svar ráðherra er raunar með öllu glórulaust en það er annað mál. Þó við gefum okkur það að flutningabílarnir valdi svona miklu sliti þá er það ekki þar með sagt eðlilegt ályktun að stefna skuli að ríkisstyrktum flutningum á sjó. Vandamálið er vegakerfið en ekki flutningabílarnir.

Hvort sem mér, samgönguráðherra eða þeim þingmanni Sjálfstæðisflokksins sem vill framkvæma frjálshyggju með sósíalisma líkar betur eða verr þá eru flutningar stórra vöruflutningabifreiða komnir til að vera. Vandamálið eru ekki stóru flutningabílarnir heldur lélegir vegir.  Í vegamálum hafa menn hugsað allt of skammt og dregið rangar ályktanir af gefnum forsendum eins og þingmaðurinn sem vill nýja ríkisútgerð.

Við eigum að gera stórátak í samgöngumálum og búa til raunverulega varanlega vegi og mun breiðari en nú er. Vegirnir eru víðast svo mjóir að venjulegum ökumönnum finnst oft óþægilegt að mæta stórum flutningabílum þó þeir víki vel út í kant sem raunar gerist ekki alltaf.

Ríkisútgerð er afturhvarf til fortíðar og sýnir á hvaða hugmyndafræðilegu villigötum Sjálfstæðisflokkurinn er.

Stríðsleikir á kostnað skattgreiðenda.

Franskir krakkar eru hér á landi á kostnað skattgreiðenda við að prófa og æfa sig á fínu leikföngin sín, herþoturnar. Þetta heitir á fínu máli loftrýmiseftirlit.

Í Morgunblaðinu í dag er sagt frá því að rússneskar herflugvélar hringsóli í kring um landið. Spurning er hvort við getum ekki fengið Rússa til að annast um loftrýmiseftirlitið? Fyrst þeir eru  á annað borð að hringsóla þetta í kring um landið hvort heldur er.  

Stafar okkur einhver hætta af Rússum ?  Eru þeir ekki vinaþjóð okkar?

Væri ekki best að herþjóðirnar fengju leyfi til að sýna og monta sig af flottu græjunum sínum, herþotum og öðru tilheyrandi á eigin kostnað. Við gætum selt þeim þjónustu en stríðsleikir á kostnað skattgreiðenda eiga ekki að koma okkur við. Við erum herlaus þjóð.  Er einhver sem ógnar okkur?

 

Skipulagsmál í ógöngum.

Skipulagsmál Vatnsmýrarinnar eru í ógöngum. Valin var verðlaunatillaga. Sú tillaga er að mínu mati óheppileg. Hrafn Gunnlaugsson sýndi fram á með einföldum hætti hvaða vandamál fylgja tillögunni. Ég er ánægður að sjá að borgarstjóri skuli alla vega hafa alvarlegar efasemdir um gildi tillögunnar.

Skipulag Vatnsmýrarinnar er í ógöngum hvað sem öðru líður. Þegar ákvörðun var tekin um að Háskólinn í Reykjavík skyldi vara í vesturjaðri Öskjuhlíðarinnar var ljóst að það mundi þrengja mjög að flugvellinum og raunar fannst mér það skipulag benda til þess að ákvörðun hefði verið tekin um að láta hann fara.  Ég get ekki séð að borgaryfirvöld hafi leyst mál sem lúta að umferð um svæðið eða að og frá því eftir að Háskólinn í Reykjavík tekur til starfa á svæðinu. Þá verður ekki séð að nýju skipulagstillögurnar um Vatnsmýrina leysi samgöngumálin.  Að mörgu leyti virtist þessi verðlaunatillaga dæmigerð fyrir tillögur sem líta vel út við fyrsta augnakast en duga ekki sem skipulag í borg.

Spurningin er hvað Sjálfstæðismenn segja um yfirlýsingar borgarstjóra. 

En vandamálið er miklu stærra miðborgin er vandamál meðan ekki er tekin ákvörðun um heildarskipulag miðborgarinnar sem heimilar eðlilega nýtingu fasteigna á miðborgarsvæðinu. Það má gera án þess að heildarmyndinni verði raskað. Eða miklu frekar til að fá ákveðna heildarmynd í staðinn fyrir þá hryggðarmynd sem miðborgin er í dag.

Vilja umræðu um Vatnsmýrina

Frost á fasteignamarkaði.

Formaður félags Fasteignasala talaði á fundi hjá landssambandi kvenna í Frjálslynda flokknum í hádeginu og gerði grein fyrir þeim vanda sem við er að etja á fasteignamarkaðnum og í þjóðfélaginu.

Vanda sem að hluta til má rekja fyrir aðgerða- og úrræðaleysis ríkisstjórnarinnar.

Ríkisstjórnin lagði fram frumvarp um að fella niður stimipilgjald við kaup á fyrstu íbúð sem taki gildi í sumar. Af hverju ekki strax og af hverju ekki að fella niður stimpilgjald af öllum fasteignakaupum?

Það er alvarlegt ef byggingariðnaðurinn á höfuðborgarsvæðinu dregst verulega saman. Byggingariðnaðurinn er stóriðja höfuðborgarsvæðisins.

Nú bíða allir eftir aðgerðum ríkisstjórnarinnar í efnahags- og lánamálum meðan beðið er ríkir frost á fasteignamarkaði og ofurvextirnir og verðtryggingin vega að velferð unga fólksins í landinu.

Ég hef stundum velt því fyrir mér af hverju Ingibjörgu Sólrúnu og öðrum ráðamönnum dettur bara í hug að taka dýr lán á kostnað skattgreiðenda til að standa undir gjaldmiðlinum og einkafyrirtækjum í fjármálastarfsemi en huga ekkert að því að stöðva lánaokrið gagnvart fólkinu í landinu.

Seðlabankinn telur það verðbólguhvetjandi að almenningur á Íslandi búi við svipuð lánakjör og almenningur á hinum Norðurlöndunum.  Sýnir það ekki vandann í hnotskurn?

Fólkið í landinu getur ekki sætt sig við og má ekki sætta sig við okursamfélagið.

Flott Félagskvöld Fylkis

Húsfyllir var á félagskvöldi Fylkis í gærkvöldi þar sem meistaraflokkur kvenna og karla voru m.a. kynnt til leiks. Verði árangur Fylkis í samræmi við það þann áhuga sem var í gærkvöldi og breiðum stuðningi við liðin þá ætti Fylkisfólk að vera í góðum málum. Ég veit ekki hvort það eru margar knattspyrnudeildir sem státa af því að hafa konu sem formann en knattspyrnudeild Fylkis nýtur dugnaðar og atorku Sigrúnar Jónssonar formanns knattspyrnudeildarinnar. Þar er rétt kona á réttum stað.

Ég vonast til að fara sem oftast ánægður af vellinum í sumar eftir sigur Fylkis.

Alvarleg staða.

Sú alvarlega staða sem komin er upp í þjóðfélaginu vegna vandamála í efnahagslífinu er enn alvarlegri fyrir þá sök að ríkisstjórnin heldur að sér höndum og ráðherrar tala með ýmsu móti um vandann.  Vandræðagangur ríkisstjórnarinnar leiðir til aukinnar óvissu og erfiðleika atvinnufyrirtækjanna.

Nú þegar lífskjör hafa versnað og skuldabyrði almennings vaxið  vegna verðbólgu og gengisfellingar er brýn þörf á því að ríkisstjórnin láti alla vega vita hvert hún stefnir. Óvissan og hringlandahátturinn kemur öllum í koll.

Full atvinna er fogagnsatriði. Til þess þurfa hjól atvinnulífsins að geta snúist en það geta þau ekki meðan stýrivextir eru skrúfaðir upp úr öllu valdi og ríkissjóður ætlar sér að halda öllu sínu og liðka hvergi til eða lina á skattaokrinu.

Bankastarfsmenn uggandi