Við borgum ekki.

Á loftslagsráðstefnunni í Egyptalandi krafðist Pakistan að stofnaður yrði bótasjóður, sem þjóðir Evrópu og N. Ameríku, sem bera ábyrgð á iðnbyltingunni greiddu þróunarríkjum eins og Pakistan, Kína og Indlandi, bætur fyrir tjón sem við eigum að hafa valdið vegna framþróunar,sem hefur orðið á vegna vestræns hugvits og dugnaðar.

Margir vestrænir leiðtogar þ.á.m. Svandís Svavarsdóttir tóku vel í hugmyndirnar og Svandís lofaði f.h.íslensku ríkisstjórnarinnar án allra heimilda, að leggja auknar byrðar á íslenskt alþýðufólk til að bæta þetta meinta tjón sem við eigum að hafa valdið. 

Hvað höfum við gert? Skiptir ekki máli segir VG við erum og höfum verið vondir kapítalistar og eigum að bæta fyrir þá synd. Syndaaflausn í formi nútíma aflátsbréfa v. hamfarahlýnunar.

Fulltrúi Pakistan grét og vísaði í hræðileg flóð nýverið í Pakistan, sem hefðu kostað gríðarlega mörg mannslíf og allt væri það manngerðri hnattrænni hlýnun að kenna,sem kapítalistarnir í iðnvæddu ríkjunum bæru ábyrgð á. Þróunarlöndin tóku undir þetta einum rómi enda alltaf eygt auravon í loftslags bullfræðinni.

Þegar Pakistan fékk sjálfstæði frá Bretum 1947 voru 33% landsins skóglendi. Í dag er það einungis 5% landsins. Gæti það haft þýðingu varðandi afleiðingar mikilla rigninga?

Árið 1950 voru meiri flóð í Pakistan en á árinu 2022, þar sem helmingi fleira fólk fórst en núna þrátt fyrir að fólksfjöldi væri þá mun minni en nú. Á síðustu 50 árum hefur fólksfjöldinn í Pakistan vaxið úr 65 milljónum í 225 milljónir. Gæti það haft einhver áhrif. Eigum við að borga fyrir það?

Eiga íslenskir skattgreiðendur eða skattgreiðendur og neytendur í V Evrópu og N.Ameríku að borga fyrir það að vegna framþróunar í kjölfar iðnbyltingarinnar og vestræns hugvits og dugnaðar hefur lífaldur lengst og fátækt og hungur í heiminum minnkað 

Það er svo alvarlegt mál fyrir Vesturlönd, að eiga fulltrúa á alþjóðaráðstefnum, sem eru rifnir úr tengslum við söguþekkingu og raunveruleikann og eru haldnir þvílíkri skömm á sjálfri sér og þjóðum sínum, að að þeir telja að allt sem misferst hefur í heiminum sé þeim að kenna og fyrir það verði skattgreiðendur og neytendur á Íslandi og víðar að greiða miklar bætur. 

Varla er hægt að finna verri stjórnmálamenn en þá, sem vilja rýra lífskjör eigin borgara vegna hluta sem þeim kemur ekkert við og er ekki þeim að kenna. Við stöndum á okkar rétti og virðum okkar gildi og dugnað.  Við neitum því að borga fyrir aflátsbréf Vinstri grænna í loftslagsbótasjóðinn.

 

 

 

 

The real thing

 Fjölmennasta og íburðarmesta veisla ársins, er og verður lúxus loftslagsráðstefnan í Egyptalandi Cop27. Þangað komu um 40 þúsund manns nánast allir kostaðir af skattgreiðendum og neytendum. Meir en 400 einkaþotur lentu með þáttakendur á ráðstefnunni og ótölulegur fjöldi risaþotna sá um að flytja restina. 

Þáttakendurnir eiga það sameiginlegt,að hafa stórkostlegar áhyggjur af kolefnissporinu þínu en engar af sínu.

Hin nýja stétt, nomen klatura, nýaldarinnar þarf ekkert að spara enda borgaði Kóka Kóla fyrir herlegheitin.

Auglýsingaskilti Kóka Kóla eru iðulega reisulegustu mannvirkinn í fátækustu hlutum heimsins. "The real thing" gnæfir yfir opnum klóökum í borgum og bæjum þriðja heimsins. Hjálpin mikla. Þá skiptir heldur máli að geta gripið í flösku sem hefur að geyma "the real thing".

Þáttakendum á Cop27 fannst ekkert að því að Kóka Kóla borgaði undir rassinn á þeim, þó það hafi lengi verið talið einkennismerki hins óhefta kapítalisma. Ekki þarf lengur að vandræðast yfir því þegar þeir ofurríku eru gengnir í lið með bullinu, sem þeir hafa að sjálfsögðu fundið leið til að græða á.

Svandís Svavarsdóttir og trúarsystkini hennar í loftslagskirkjunni brostu breitt og slógu taktfast, að heimurinn væri að farast ef ekki yrði gripið til þess að rýra lífskjör fólks í Evrópu og N-Ameríku.

Hin nýja stétt umhverfisverndarsinna gerði engar athugasemdir við það,að árlega framleiðir Kóka Kóla 120 milljarða einnota plastik flaskna. Þesar einnota plastik flöskur 120.000.000.000 valda mikilli eyðileggingu, mengun og  eyðileggingu á lífríkinu, ekki síst þar sem auglýsingaskiltin um "the real thing" gnæfa yfir mannlífinu.

Fyrirheitið á auglýsingaskiltinu um hinn sanna unað og velferð, sem falin er í einnota plastflösku er álíka vitlaust og annað sem gerðist á þessari ráðstefnu hinnar sjálfhverfu nýju stéttar loftslagskirkjunnar. 

Síðustu línurnar í kvæði Steins Steinars um Kommúnistaflokk Íslands, in memoriam með lítilli breytingu eiga jafnvel við  um gildi tildurráðstefnunnar Cop27

Á gröf hins látna blikar drykkjartunna frá Kóka Kóla Company.

 

 

40 manns

Sagt er að fulltrúar Íslands á loftslagsráðstefnu SÞ á sólarbaðstaðnum í Egyptalandi séu yfir 40. Vafalaust er það í anda ráðdeildar og sparnaðar að hafa sendinefndina ekki fjölmennari.

Það skiptir máli fyrir land eins og Ísland að leggja sitt að mörkum til að sýna dáð og dug í baráttunni gegn því að þjóðin megi njóta meiri hlýindi, betra og fjölbreyttara mannlífs og betri lýðheilsu.

Til að sporna við bættum hag þjóðarinnar að þessu leyti, má ekkert minna vera en að senda 40 valinkunna sómamenn og konur til að vinna sem mest og best gegn hagsmunum þjóðarinnar í bráð og lengd á alþjóðlegum vettvangi. 

Helsta framlag Íslands á loftslagsráðstefnum sem þessum hingað til, hefur verið að fjalla um kynræna loftslagshlýnun, sem hlítur að vera afar merkilegt fyrirbæri. Vafalaust er þar kominn einn helsti orsakavaldur þess, sem ógnar nú lífríkinu.

Það er þá aldrei að rödd Íslands fái ekki að heyrast á alþjóðavettvangi og þjóðir heims sjái hversu mikið og merkilegt rökrænt framlag þjóðin hefur fram að færa.

Að sjálfsögðu geta skattgreiðendur verið stoltir af því að eiga slíka og þvílíka fulltrúa á alþjóðavettvangi eða hlutfallslega langstærstu sendinefnd allra þjóða á þessari "mikilvægu" ráðstefnu, þar sem hver reynir að toppa hinn í frásögnum af því hvílíka hörmungartíma þjóðir heims lifi nú, þar sem allir eru að stikna til bana, ef ekki strax þá bráðum.

Samt deyja margfalt fleiri úr kulda en hita? 

Að snúa hlutum á haus.

Formaður Moderata Samlingspartiet(mið-hægriflokkur) leggur áherslu á að Svíar taki kjarnorkuver í notkun að nýju. Það mátti sósíalistinn forsætisráðherra ekki heyra og staðhæfði, að þá væri samstaða Evrópu rofin og þetta væri í þágu Pútín. 

Þarna var hlutum gjörsamlega snúið á haus. Það eru augljósir hagsmunir Svía að vera sjálfum sér nógir í orkumálum og þurfa ekki að leita á náðir Rússa til að fólk geti hitað heimili sín, kveikt á ljósaperum eða ekið rafmagnsbílum. Grænu lausnirnar og vindmyllurnar eru aumur valkostur þegar allt kemur til alls.

Í ræðu á Alsherjarþingi Sameinuðu Þjóðanna 2018 sagði Donald Trump þá Bandaríkjaforseti, að Þjóðverjar yrðu algerlega háðir Rússum með orkuöflun ef þeir héldu svona áfram. Þá var ekki brugðist við og sagt þetta er bara Trump af "framsýnu" stjórnmálaelítunni í Evrópu.

Svíar væru heldur betur í betri stöðu ef þeir hefðu hlustað á Trump og brugðist við í stað þess eins og sænski forsætisráðherrann gerði að stinga höfðinu í sandinn eins og strútur og færa Pútín öll trompspilin í hendurnar. Vonandi hafna sænskir kjósendur þessum sósíalska ruglanda í kosningunum

Verðhjöðnunarlögin

Demókratar í Bandaríkjunum hafa fengið samþykkt lagafrumvarp sem þeir kalla verðhjöðnunarfrumvarpið (Inflation reduction act) Í fréttamiðlum hér hefur það iðulega verið nefnt loftslagsfrumvarpið, sem er ansi vel í lagt. Fyrst og fremst er þetta frumvarp sem kveður á um auknar millifærslur og skattheimtu þó að veita eigi verulega styrki til óarðbærrar svokallaðrar grænnar framleiðslu.

Skattahækkanir eru verulegar til að reyna að vega upp á móti auknum ríkisútgjöldum. Samt sem áður er talað um að með þessu nýja eyðslufrumvarpi muni skuldastaða Bandaríkjanna verða verri en Ítalíu. 

Munurinn á Ítalíu og Bandaríkjunum er sá, að Bandaríkin hafa hingað til prentað dollara út úr efnahags mistökum af því að dollarinn er heimsmynt. Hvað lengi geta þeir það? 

Biden fékk samþykkt eyðslufrumvarp 2021, sem hleypti af stað mikilli verðbólgu ekki bara í Bandaríkjunum heldur vítt og breitt um heimsbyggðina.

Nýasta lagasetning Biden Demókratana kemur enn til að magna verðbólguna og er því heiti frumvarpsins hrein öfugmæli. 

Hætt er við að Seðlabankastjóri Íslands megi sín lítið til að vinna gegn þeirri ofurverðbólgu sem  verðhjöðnunarlög Biden eru líkleg til að hafa í för með sér. 

Efnahagsstefna Biden er einstök. Til að draga úr verðbólgu er ausið út gjafafé til einstaklinga og fyrirtækja, en á sama tíma lagðir á skattar sem m.a. hækka verð á framleiðsluvörum.

Hvenær

Jörð skelfur á Reykjanesi. Hluti ofurfjölda sérfræðinganna á Veðurstofunni biðja fólk að vera á varðbergi vegna eldgoss. 

Sérfræðin er enn ekki fullkomnari en svo, að ekki er hægt að segja fyrir með vissu hvort, hvar eða hvenær næsti stóri jarðskjálftinn eða eldgosið verður.

Sérfræðin segir þó ítrekað, að það verði gos "fljótlega" á næstu mánuðum eða árum. 

Vonandi verður eldgos ekki á næstunni. Samt væri ekki úr vegi að setja fram góðar leiðbeiningar til almennings um viðbrögð. 

Eldgos er ekkert gamanmál. Þó mín kynslóð hafi verið svo heppin að vera að mestu laus við skaðleg eldgos nema í Vestmannaeyjum, þá er hætt við að á því geti orðið breyting því miður.

Er þá ekki best að taka skátana til fyrirmyndar og vera ávalllt viðbúinn?

Baráttan um bréfalúguna

Það er fyrst núna, sem það opinberast fyrir mér hvursu vanmáttugur einstaklingurinn er og ofurseldur ofbeldinu.

Ég er áskrifandi að Morgunblaðinu í netúgáfu, þar sem að ég vil ekki eyða pappír og orkuforða þegar þess er ekki þörf. Morgunblaðið er ekki að þvinga sér upp á fólk eins og kynferðisafbrotamaður, en annað gildir um Fréttablaðið. 

Ég hef ítrekað freistað þess að vera laus við þá áþján að fá Fréttablaðið inn um bréfalúguna mína, en án árangurs. blaðberin sagði að honum væri skipað að troða blaðinu inn um allar bréfalúgur í sínu umdæmi með illu eða góðu.

Þegar ég hringdi í útgáfu blaðsins var mér bent á sérstaka miða, þar sem blaðið væri afþakkað. Ég vonaðist til að verða þá laus við áþjánina af þessu blaði, hvers útgefandi telur eðlilegt að eyða hundruðum milljóna árlega í að útbreiða fagnaðarerindið um Evrópusambandið, ásamt sagnfræðilegum fölsunum og woke skoðunum ritstjórans og fyrrum framkvæmdastýru Pírata.

En allt kom fyrir ekki. Nokkru eftir að miðarnir voru settir upp var aftur byrjað að troða Fréttablaðinu inn í póstlúguna mína og mér var þá ljóst að svo yrði áfram nema frumskógarlögmálið yrði virkjað og þessi ofbeldisaðili yrði hrakinn burtu með sambærulegu ofbeldi. 

Svo vanmáttugur er einstaklingurinn að hann ræður ekki yfir eigin bréfalúgu. 

Græna örbirgðin

Hvernig stendur á því að efnahagur Sri Lanka breytist úr einum mesta hagvexti í Asíu í mannlega hryllingssýningu sem virðist koma öllum á óvart skrifar Matt Ridley blaða- og vísindamaður í DT í dag og heldur áfram:

Hvað gerðist? Svarið er einfalt. Í apríl 2021 bannaði forsetinn meindýraeitur og tilbúinn áburð til að landbúnaðarframleiðsla landsins yrði algjörlega lífræn. Innan nokkurra mánaða hafði útflutningur á te minnkað um helming og hrísgrjónauppskeran drógst gríðarlega saman, þannig að í fyrsta skipti þurfti að flytja inn hrísgrjón.

Vegna þessa gat ríkið ekki greitt afborganir af lánum og gjaldmiðillinn hrundi. Algeng matvæli voru sýkt, sem leiddi til skorts á mat og útbreiddrar hungursneyðar. Allt var þetta afleiðing af svo kölluðum sjálfbærum landbúnaði.

Á loftslagsráðstefnunni í Glasgow í fyrra montaði forseti Sri Lanka sig af því að landbúnaðarstefna hans væri samtvinnuð og í samhljómi með náttúrunni og einn þekktasti umhverfissinninn Vandana Shiva sagði að þessi ákvörðun mundi örugglega gera bændur á Sri Lanka ríkari.

Shiva ásamt mörgum umhverfisverndunarsinnum hafa gagnrýnt grænu byltinguna sem varð upp úr 1960 með hjálp tilbúins áburðar og meindýraeiturs og uppgötvana Norman Borlaug. Sú bylting kom í veg fyrir gríðarlegan mannfelli vegna hungurs í heiminum í fyrsta skipti í sögunni, þrátt fyrir gríðarlega fjölgun mannkynsins.

Margir umhverfissinnar sjá allt vont við þessa grænu byltingu og halda því fram að hefðbundin lífrænn landbúnaður geti miklu frekar brauðfætt heimsbyggðina með mun heilusamlegri mat en græna bylting tilbúins áburðar, skordýraeiturs o.fl. geti gert.

Nú hefur tilraunin með lífrænan búskap verið reynd á Sri Lanka með hörmulegum afleiðingum. „Lífrænn landbúnaður er sjálfbær að því leyti að hann viðheldur fátækt og matarskorti .“ Landbúnaður var lífrænn þegar milljónir dóu úr hungri á hverjum áratug og rykstormarnir ríktu á sléttunum í Bandaríkjunum vegna þess að það skorti áburð.

Ef það ætti að brauðfæða 8 þúsund milljónir manna með lífrænum aðferðum, þá yrði að taka meira en helmingi meira land í notkun fyrir slíkan landbúnað eða nánast allt ræktarland og skóga í heiminum. Af hverju segja hefðbundnar fréttastofur ekki frá staðreyndunum varðandi Sri Lanka og lífræna framleiðslu.

Hvað þarf að fórna miklu áður en menn horfast í augu við raunveruleikann?

Altúnga Fréttablaðsins

Í háðsádeilusögunni Birtingi segir heimspekingurinn Voltaire frá heimspekingnum Altúngu, sem hafði þá bjargföstu lífsskoðun að allt sem gerðist væri af hinu góða. Algóður Guð hefði skapað bestu jörðina. Eftir mikla hrakninga Birtings og Altúngu, þar sem þeir höfðu misst eigur sínar og ástvinir þeirra höfðu mátt þola pyntingar, verið nauðgað og drepnir og Altúnga hafði verið hengdur, krufinn og húflettur m.a.,þá spyr Birtingur hvort honum hafi alltaf fundist að allt væri upp á það besta í veröldinni. Altúnga svarar að hann hafi sömu skoðun og fyrr enda sé hann heimspekingur og sér sæmi ekki að vera tvísaga.

Með sama hætti og Altúnga túlkaði allar hörmungar með þeim hætti að þær væru leið almættisins til einhvers enn betra, þá túlka Altúnguheimspekingar nútímans allt með þeim hætti, að loftslagsbreytingum og hamfarahlýnun sé um að kenna. 

Þessi trúarheimspeki kemur glögglega í ljós í leiðara Fréttablaðsins í dag, þar sem fyrrverandi þingmaður Sjálfstæðisflokksins skrifar um þau hörmulegu örlög sem okkar bíða. Ólíkt Altúngu hefur hún enga fótfestu í kristinni hugmyndafræði eins og Altúnga en þeim mun meiri í möntrunni um að allt sem gerist illt í heiminum sé loftslagsbreytingum af mannavöldum að kenna.

Illviðri, stormar, frost og snjókoma er loftslagsbreytingum af mannavöldum að kenna. Gott veður og hlýindi líka. Jafnvel þó að við búum á þeim tímum jarðsögunnar, þar sem öfgar í veðurfari og náttúruhamfarir séu minni en á ýmsum öðrum tímum, þá gildir það ekki og hefur enga merkingu ekki frekar en það þegar Altúnga varð þræll á galeiðu, þá var það af hinu góða. 

Jafnvel þó bent sé á þá staðreynd,að engar meiriháttar breytingar hafi orðið á veðurfari í þau rúmu 30 ár sem baráttan gegn meintri hamfarahlýnun hefur staðið, þá gildir það ekki vegna þess að stórir hópar vísindamanna nærast á að halda öðru fram og þægindastjórnmálamenn nútímans reyna að yfirbjóða hver annan í lýsingum á því illa sem sé um það bil að gerast. Þeir setja síðan lög að skapi ofurauðmanna, sem að sjálfsögðu hafa fundið leið til að græða á þessum nýju trúarbrögðum og kynda undir áróðrinum með mynarlegum fjárframlögum til mismunandi trúfélaga loftslagskirkjunnar. 

Þingmaðurinn fyrrverandi og aðrir sem eru ekki botnfrosnir í loftslagskirkjunni mættu huga að því, að engin spá hamfarahlýnunarpostulanna hefur reynst rétt í þau rúmu 30 ár sem þessi áróður hefur verið. Spádómur Al Gore um íslausan norðurpól árið 2008 hefur ekki gengið eftir og spár Karls Bretaprins um endalokin sem hann hefur framlengt í tvígang hafa heldur ekki gengið eftir. Það er ekkert að gerast í heiminum varðandi loftslag, sem ekki hefur gerst áður eða þarf að óttast. Þó svo að nokkur hlýnun hafi orðið þá er það ekkert umfram það sem áður hefur þekkst. 

Í leiðaranum er vísað til þess, að framámaður frá Kyrrahafseyju stóð með fæturna í bala með vatni á ráðstefnu í Glasgow um meinta hlýnun af mannavöldum og hélt því fram, að við þær aðstæður byggju hann og aðrir. Allt var þetta ómerkileg auglýsingamennska, sem fangaði hug þægindastjórnmálamanna.

Staðreyndin er sú, að sjávarborð hefur hækkað og lækkað á ýmsum tímum jarðsögunnar og nú er það tiltölulega stöðugt og auglýsingamennska sendimannsins var til að fá meiri peninga frá hinum "ríku" Vesturlöndum, þar sem þægindastjórnmálastéttin hamast við að finna leiðir til að draga úr lífsgæðum borgaranna og takmarka möguleika neytenda til að geta veitt sér það, sem við höfum talið sjálfsagða hluti. 

Meðan þægindastjórnmálamennirnir, leiðarahöfundar og fjölmiðlafólk hamast við að þylja bænir um hamfarahlýnun og ofurauðmenn kynda undir með myndarlegum fjárgjöfum, sem skila sér síðan margfalt til þeirra aftur, þá er eðlilegt að ungt fólk verði hrætt og trúi hamfaraboðskapnum. Það er því illa gert og þjóðhagslega fjandsamlegt að þægindastjórnmálamennirnir og fjölmiðlafólkið skuli ekki nenna að kynna sér hvað er raunverulega að gerast til að tala af þekkingu um málin. 

Áfram verður því miður haldið þangað til að neytendur og skattgreiðendur átta sig á því, að það er verið að ræna peningunum þeirra og brenna lífskjör þeirra og fjármuni á altari trúarbragða sem standast ekki, en er haldið við með skefjalausum áróðri ríkishyggjuafla nútíma stjórnmála og ofurauðmanna sem mæta á loftslagsráðstefnur á einkaþotunum til að hamra það inn í almúgann, að allt sé þeim að kenna og þeir megi ekki fara í ferðalög í farþegaflugi vegna þess að það séum við skóflupakkið en ekki forréttindaaðallinn, sem völdum því að heimurinn sé að farast vegna hlýnunar jarðar.

Samt snýst jörðin sem fyrr eins og heiðarlegi vísindamaðurinn sagði eftir að hann hafði verið neyddur til þess af prelátum kaþólsku kirkjunnar til að afneita eigin kenningum. Það gerir hún líka og mun gera. Spurningin er bara hvað mikið af vitlausum ákvörðunum verða teknar vegna þessara trúarbragða, hvað þær muni kosta og hvað þær muni rýra lífskjörin mikið.

Síberíuloftslag

Blaðamaðurinn Michael Deacon rifjaði það upp í gær, að enska blaðið the Observer hefði birt frétt í febrúar árið 2004 um innihald leyniskýrslu frá Pentagon í Bandaríkjunum, sem blaðið taldi meiriháttar afrek að hafa komist yfir. 

Skv. frétt blaðsins í febrúar 2004 þá mundu loftslagsbreytingar leiða til þess, að það mundi kólna í Evrópu og á Bretlandi mundi verða Síberíuloftslag árið 2020. Í gær var kalt í Bretlandi miðað við árstíma og lægsti hiti sjö stiga frost. En í Síberíu var frostið 52 gráður.

Þá sagði líka í frétt blaðsins, að það mundi kólna í Evrópu og leiða til skorts á vatni og orku. Þá yrðu meiriháttar þurkar, hungursneið og óeirðir í álfunni.  Skelfilegir ofsavindar mundu gera hluta Hollands óbyggilegt og borgin Haag yrði yfirgefin og tóm árið 2007. Árið 2020 var staðreyndin samt sú að íbúum í Hag hafði fjölgað um 100 þúsund manns. 

Spálíkanið sem Observer birti árið 2004 finnst okkur algjörlega galið í dag. Allar spár um loftslagsbreytingar og hlýnun jarðar hafa verið álíka galnar allt frá þeim tíma. Samt dansar pólitíska elítan og fréttaelíta heimsins í kringum þetta bull og hamast við að gera börn og unglinga dauðhrædd við ógn sem er ekki fyrir hendi. 

Draugasögur nútímans eru verri en drauga- Grýlu- og tröllasögurnar í gamla daga. Þá sussaði fólk á börnin og sagði þeim að þetta væri ekki rétt. Nú hamast æðstu menn þjóða eins og forsætisráðherra Íslands við að sannfæra fólk um að nútíma Grýlusögurnar séu heilagur sannleikur.