Dauða höndin

Kreppustjórnin gerir allt sem hún getur til að komast hjá niðurskurði í ríkisrekstrinum.  Skattar voru  hækkaðir á áfengi, tóbaki og bensíni auk þess  sem virðisaukaskattur var hækkaður. Allt leiddi þetta til hækkunar á verðtryggðum lánum fólksins. Samt er ríkissjóður rekinn með hundraðmilljarða halla.  Hin dauða hönd ríkisumsvifanna leggst með meiri þunga og stöðnunarmætti á þjóðlífið.

Nú hefur villta vinstrið þau Lilja Mósesdóttir og Ögmundur Jónasson fundið leið til að skattleggja þjóðina meira til að komast hjá nauðsynlegum niðurskurði ríkisútgjalda. Eða eins og Ögmundur segir að þá sé hægt að komast hjá niðurskurði á velferðarkerfinu. Hvaða velferðarkerfi? Ef til vill velferðarkerfi flokkslíkamabarnanna í Samfylkingunni og Vinstri grænum sem verið er að koma fyrir vítt og breitt í ríkiskerfinu.

Það felst ekki nein velferð fyrir venjulegt fólk í aukinni skattheimtu. Færa má rök að því að það hefði verið skynsamlegra til að koma athafnalífinu í gang að lækka virðisaukaskatt og bensíngjald í stað þess að hækka. Þá skerum við okkur úr meðal þeirra þjóða sem hafa lent í niðursveiflu vegna efnahagskreppunnar í heiminum. Í löndum eins og Lettlandi og Ungverjalandi hefur verið tekið myndarlega á ríkisútgjöldum og gerðar ráðstafanir til að örva atvinnulíf.   Þar eru ríkisstjórnir sem hugsa um framtíðarhagsmuni þjóðarinnar. Þar eykst hagvöxtur og atvinnuleysi minnkar.

Hér eykst atvinnuleysi og framleiðsla dregst saman annars vegar vegna rangrar stefnu ríkisstjórnarinnar í efnahags- og skattamálum en hins vegar vegna úrræða- og getuleysis hennar.

Það eina sem hefur verið til bjargar á þessum vetri er eldgos á Fimmvörðuhálsi, en það hefur ekkert með aðgerðir ríkisstjórnarinnar að gera nema það megi túlka það svo að landvættirnir sjái að málum sé nú stefnt í hið versta óefni og eitthvað verði að gera þjóðinni til bjargar þar sem stjórnvöld hvorki geri það né geti það.

Athugasemdir

[Marat (IP-tala skráð) 6.4.2010 kl. 17:50]

Eru þau ekki að taka undir (ágætar og skynsamlegar) tillögur Sjálfstæðisflokksins um að skattleggja lífeyrissparnað fyrr frekar en síðar?

 PS. Ég er ekki viss um að þú vildir búa í Lettlandi núna? Þetta er einsog í Sovétinu: Paradís kemur síðar. Reyndist vera bið á því.

[Jón Magnússon, 6.4.2010 kl. 18:04]

Jú þau eru að taka undir tillögur sem settar voru fram af þingflokki Sjálfstæðisflokksins um heppilegri skattheimtu en þá sem ráðist var í. Hér er verið að tala um að halda skattahækkununum og bæta þessu við.  Ég hef aldrei viljað búa í Lettlandi og ég veit að þeir urðu að taka myndarlega á sínum málum í kjölfar hrunsins og þeim virðist ganga það vel.

[Anna Sigríður Guðmundsdóttir, 6.4.2010 kl. 19:46]

Dauða höndin drepur fyrir peninga og völd! Samviskulaust! Við skulum forðast flokka-auglýsingar á þessum erfiðu tímum. Almættið hjálpi okkur að komast frá þessari pólitísku svikastefnu. M.b.kv. Anna

[Anna Sigríður Guðmundsdóttir, 6.4.2010 kl. 19:48]

Ég verð alltaf jafn sorgmædd þegar athugasemd birtist eftir að síðuhöfundur hefur samþykkt mína skoðun? M.b.kv. Anna

[Jón Magnússon, 6.4.2010 kl. 20:57]

Ég get fallist á það með þér Anna að það er leiðinlegt að þurfa að setja svona síu á varðandi athugasemdir. En því miður kemst ég ekki hjá því. Bæði er að til er fólk sem reynir að eyðileggja það sem er verið að fjalla um. Einnig koma iðulega fram ógeðfelldar persónulegar ávirðingar gagnvart óviðkomandi fólki og málefnum. Í sumum tilvikum koma líka athugasemdir sem eiga ekkert erindi miðað við færsluna. Ég leyfi allar málefnalegar athugasemdir sem eru lausar við svívirðingar eða rugl.

[Ægir Óskar Hallgrímsson, 6.4.2010 kl. 22:54]

Mér finnst vera meira atriði að auka tekjur en að draga saman..ég vil allavega að ríkið alls ekki bólgni út..samdrátt á einhverjum sviðum..en losa um gjaldeyrishöftin..aukningu á kvótann..alls ekki hækka skatta..algjört glapræði.

[Jón Magnússon, 7.4.2010 kl. 10:27]

Sammála þér Ægir. Skattahækkun sérstaklega hækkun neysluskatta við þessar aðstæður var algjört glapræði. Í dag eru stóru olíufélögin a auglýsa verðhækkun á olíuvörum. Hvað skyldum við borga mikið til ríkisins fyrir hvern ekin kílómetra? Síðan vill vegamálaráðherra Kristján L. Möller að við greiðum til viðbótar sérstakan vegatoll samkvæmt staðsetningarbúnaði.