Úrslit liggja fyrir.

Ég vil nota þetta tækifæri hér til að þakka þeim fjölmörgu sem studdu mig og greiddu mér atkvæði í prófkjöri Sjálfstæðisflokksins í Reykjavík nú um helgina.  Niðurstaðan liggur fyrir og kjósendur hafa kveðið upp sinn dóm og þeim dómi verður að una hvort sem frambjóðendum eða stuðningsmönnum þeirra líkar það betur eða verr.

Ég vissi það allan tímann frá því að ég gaf kost á mér í prófkjörinu að það yrði á brattan að sækja. Bæði var það að ég var nýkominn inn í flokkinn eftir 18 ára fjarveru og hafði engin tengsl inn í flokkskerfið í Reykjavík. Það kom í ljós að það skipti máli. 

Ég hef lagt áherslu á að byggja Sjálfstæðisflokkinn upp sem víðsýnan fjöldaflokk og ég tel að það sé mikið verk að vinna til að ná því marki og hef fullan hug á að taka þátt í því uppbyggingarstarfi.

Stefnulega verður Sjálfstæðisflokkurinn að taka ákvörðun um verðtryggingu og íslensku krónuna. Aðildarumsókn að Evrópusambandinu eða ekki og hvort flokkurinn vill óbreytt fiskveiðistjórnarkerfi svo nokkur dæmi séu nefnd.

Ég  óska vinum mínum og félögum sem skipa efstu sætin á í prófkjörinu í Reykjavík til hamingju með árangurinn og óska þeim allra heilla í starfi sínu.  Þau eiga mikið og vandasamt verkefni fyrir höndum í þeim erfiðu Alþingiskosningum sem framundan eru.

 

Athugasemdir

[Heidi Strand, 15.3.2009 kl. 12:20]

Fólk þakkaði fyrir sig með að kjósa hrunið.

Þetta var skelfileg niðurstaða!

[Jón Magnússon, 15.3.2009 kl. 12:56]

Það verður hver að skoða það með sínum augum en það eru alltaf kjósendur sem eiga síðasta orðið í lýðræðiskerfinu.

[Ólafur Als, 15.3.2009 kl. 16:17]

Sæll Jón,

þrátt fyrir að ég telji þig hafa viðrað margar heilbrigðar skoðanir að undanförnu - að verðtryggingarandstöðu þinni slepptri - má ljóst vera að þú ert ekki maðurinn til þess að vinna þeim brautargengi á komandi Alþingi. Því miður verð ég að segja, en við því er ekkert að gera, m.a. í ljósi fortíðar þinnar á pólitíska sviðinu.

Þetta verður erfitt í vor og ljóst að flokkurinn er laskaður. Margir eru ósáttir við að ekki varð meiri endurnýjun og maður spyr sig hvað sumir hafi fram að færa umfram það sem þegar hefur komið í ljós á síðustu misserum.

Í stjórnarandstöðu sé ég fyrir mér of marga bitlausa þingmenn og lítt fallna til þess að auka vinsældir Sjálfstæðisstefnunnar - sem mér fannst þú koma ágætlega orðum að þegar þú fjallaðir um þess konar markaðshagkerfi, sem eftirsóknarvert er. Það mun þurfa hæfilega blöndu af strigakjöftum og rökföstum málsvörum til þess að endurvinna traust kjósenda.

[Guðmundur Paul, 15.3.2009 kl. 17:39]

Framundan eru erfiðir tímar í landinu, einstaklingar og fyrirtæki eru að sligast undan skuldum og takmörkuð fyrirgreiðsla er fyrir hendi. Jafnvel fyrirtæki sem hafa í áratugi byggt upp viðskiptavild erlendis eru setti í fyrirframgreiðslu eða jafnvel algjörlega hundsuð og þeim ekki svarað. Frelsi er vandmeðfarið, á sínum tíma var kjörorð okkar báknið burt, en við gerðum okkur ekki grein fyrir þá að það hefði þurft að setja takmörk á frelsið. Störf þín hjá neytendasamtökunum hefðu átt að fleyta þér áfram á þessum tímum og hefði þjóðinni ekki veitt af að hafa málsvara á þingi og innan flokks, en flokkurinn okkar er ekki enn búin að fyrirgefa þér að þú skyldir fara annað. Kjörorð Gunnars Thor var: Hús okkar rúmar alla!! þú hefðir átt að berjast innan frá. Ég vil óska þér velfarnaðar og er ósáttur við þessa niðurstöðu í prófkjörinu.

[Halldór Jónsson, 15.3.2009 kl. 20:39]

Sorrí  vinur Jón, Sjálfstæðisflokkurinn er ekkert þekktur fyrir að taka vel á móti týnda syninum.

Það koma aftur kosningar Jón fyrr en varir. Þá hlustarðu kannski á mig betur en nú ? Sjáumst á landsfundinum. 

[Haraldur Haraldsson, 15.3.2009 kl. 23:50]

Þetta er upphaf af lélegum árum hjá X-D!!!

[Guðbjörn Guðbjörnsson, 16.3.2009 kl. 09:29]

Þetta eru sömu mál og ég barðist fyrir og skíttapaði! Ég er sammála þér að við verðum að una því, hvort sem okkur sjálfum eða stuðningsmönnum okkar líkar betur eða verr. Ég mun áfram vinna fyrir minn flokk og reyna að fá fram breytingum á stefnu hans í átt við það sem þú nefnir hér að ofan.

Flokksbundnir sjálfstæðismenn eru hins vegar þeirrar skoðunar að hvorki þurfi að breyta um stefnu eða fólk. Síðan er bara að sjá hvað þeim sem kosið hafa flokkinn finnst.

Eru þessir listar sölulegir, þ.e.a.s. fólkið sem er á þeim og þau mál sem hafa staðið fyrir og standa fyrir?

Svari hver fyrir sig, en mér finnst það ekki!

[Jóhanna Magnúsar- og Völudóttir , 16.3.2009 kl. 18:53]

Það er augljóslega á brattann að sækja í  tröppum Val(hallarinnar)..